Corébana jamatabënaexana pepopenamatacaitorobiwi pacuenia Moisés, Aarón-beje
16
Itsamatacabi,a Levípijinëb pexënato Coat-pijinë pemomoxiyajuwënënë, Coré, Izhar pexënato pijamonae yajawa, tsimaxëpata anaeya peyanijobinexa Moisés, Aarón-bejejawabelia, pewetsicuenebeje yabara. Caejamatabëcuene xainanua Datán, Abiram-beje, pexënatobeje Eliab-pijinë, On-ata, Pelet pijinë pexënao. Bajarapa-acueyabi ponëbeje Rubén-pijinë pemomoxiyajuwënëwi. 2 Orijibia, bajarapacuatro ponëbeje natsicueyajunata itsamonae, doscientos cincuenta ponëbeje israelitawiyajuwënëwi, pejamatabëcueneyanabinexatsi. Bajarapamonae pijamonaetuatuajëta penamatacaitorobiwi, pewënëliwaisijonewanapaewi. 3 Bajarapamonae caejamatabëcuene pexainaexae, tsimaxënacaetuata cueneca-ëbiaya peyanijobinexa Moisés, Aarón-bejejawabelia. Nexata, Coré jumaitsi:—Apoxanepanae baja pematatsënëa paxamëbeje patanenamatacaitorobaponaponaejawamëbeje, be-ayaijamatabëcuene panenataexaebeje. Daxita israelitawitsi baja picani wajanaca-itapetsiwi Dioso. ¿Detsa xuajitsia nexata paxamëbeje panajamatabëxainamebeje paxanë patanenamatacaitorobinexamëbeje Jehová papijajiwinë? ¿Apopayapëtaemebeje tsaja Jehová daxitatsi wajanacayajawajawa? —jai anaeya bajaraponëbejejawabelia.
4 Moisés bajarapacuenia pejumetaejawata pejumaitsijawatsi, yaiyataeya pematabacata nuca itapapatsiaya irabelia, pewajëcaenexa Jehovájawabelia. 5 Pewajëcaeweretsicujinae, jumaitsi Coréjawabelia, daxita peyajawapatsiwijawabelia-ata:
—Merawia raja bajayacunua, Jehová nacayapëtaeya-exanaena pamonae israelitawituatuajëta itapeta petonacuenebawanapaewinexa Dioso pijacarpabota, israelitawi pecapatsidajubi petotajuitabiabiwinexa-ata altar-jumata. Jehová penato-itapetsiwi,c ëbajarapamonae cuenecaëjëpaenatsi pepatsinexa pijataxunaejawabelia. 6 Bajarapacuenia xaniawaetsia wajayapëtaenexa, xamë, Coré, daxita nebarënajamatabëcuenejëpaewi yajawa, merawia pacapatsianame pawaxianëta patajuitsijitsiamë inciensopërë Jehovájawabelia. 7 Nexata, bajarapawaxianëta pajename iso-ita-ire. Bajarapa-iso-ita-irejumawereca pa-othocaename inciensopërë. Bajaraxuanë pacaponaename, panecobenanubenaenexa Jehová pitabarata, pijacarpabopijibaupa pewajënaeya. Bajarajota nexata, Jehová nacatsitajëtsiana ponë itapeta Levípijinë pemomoxituatuajëta, petonacuenebaponaponaenënexa Dioso pijacarpabojawata. Paxamë rabiji be-ayaijamatabëcuene panenataewi Jehová pitabarata —jai Moisés.
8 Orijibia, Moisés jumaitsi Corébanajawabelia:
—Xaniawaetsia panejumetaema, paxamë Levípijinë papemomoximë. 9 Israelitawituatuajëta Dioso paca-itapeta, panetonacuenebawanapaewinexa pijacarpabojawata, pane-imoxoyotabiabinexa, paneyapijiwinacuenebiwinexanuad panijamonaetuatuajëta Jehová pijataxunaejawata. ¿Apopacatsitanamatamotsi tsaja bajaraxua paxamë? 10 Coré, Jehová pecajitsipaexae, xamë ca-itapeta daxita itsamonae Levípijinë pemomoxi yajawa, pane-imoxoyotabiabinexa pijacarpabojawata. Itsiata, aeconoxae, ¿pematatsënëa jitsipaponame tsaja sacerdotenëcuenia nenacuenebaponaponaejawa? 11 Xamë, daxita nebarënajamatabëcuenejëpaewi yajawa apopaxainaemë picani xua yabara pibisiacuenia pabaracuaicuaijamëjitsia Aarón, tsipaji bajaraponë pepobeweliajamatabëcuenenë Jehováwecua. Nexata, xua pa-exaname Aarón-jawabelia panetsimaxënacaetuatsijawata, bajaraxua pepacuene pato-exaname Jehovájawabelia —jai Moisés Corébanajawabelia.
12 Bajaraxuacujinae, Moisés itoroba petojunatsinexatsi Datán, Abiram-beje, Eliab pexënatobeje. Itsiata baitsi jane, bajaraponëbeje jumecanawiatsiaya tonajume-itorobabeje mapacueniaje:
—Apopajitsipaenëbeje bajarabelia pataponaejawabeje. 13 Xamë panejutame Egipto nacuawecua, panacuata picani nawita daxitacuene pexaejawa. Nexata, panecaponame mapatsewitusatonacuayaberenaje patanetëpaeya-exanaenexamë. Bajarapapibisiacuenejawanë paneto-exanae-atamë, ¿abaxë icatsia jitsipaponame patacajumecowënëtsinexa patanenamatacaitorobaponaecueniamë? 14 Orijibia, abaxë apopanecaponaemë pa-irajawabelia daxita pexaejawacuene nawita. Apopanerajutsimënua abaxë pataja-uvabacabonënexa, iranë-ata patanacuenebinexa, patajapabianë pata-ubinexa. ¿Jamatabëpaneyamaxë-itojorobame tsaja patawajënaeyajawabelia, be-apopatanetsiwajënaetaewicuenia? ¡Ajibi cajena! Paxanëbeje apopaponaenëbeje tsane xamëjawabelia —jai Datán, Abiram-beje petonajume-itorobicuenia.
15 Moisés nexata bitso itaxutejema anaepana. Nexata, jumaitsi Jehovájawabelia:
—¡Jehová, pëtsa tocopiapitame xua carajutsianae bajarapamonae! Xanë rabaja caenë-ata pijaburro apowecuapitsinëf bajarapamonae. Bajarapacuenia caepibisiacuenejawa apoto-exanaenë tane-itoyanexa —jai Jehovájawabelia.
16 Bajaraxuacujinae, Moisés najamatabëcuenenapitsia-exanaeya jumaitsi Coréjawabelia, peyajawapatsiwijawabelia-ata:
—Merawia patsianame bajayacunua, daxita pamonae-ata pecajamatabëcuenejëpaewi, panenaitajëbinexa Jehová pitabarata. Bajarajota-ata raja, napatsiana Aarón, penanucaenexa. 17 Caejiwi canacujitsia, paxamë pacapatsianame pawaxianëta patajuitsijitsiamë inciensopërë Jehová pitabarata; doscientos cincuenta paponëmëbeje daxitata. Bajarapawaxianëta pa-othocaename inciensopërë iso-ita-irejumawereca. Nexata, daxita paxamë, Aarón-ata, nacobenanucaena bajaraxuanë Jehová pitabarata —jai Moisés.
18 Bajarapacuenia exana baja. Nexata, bajayacunua, caenë canacujitsia, nota pija-incienso pecatajuitabiabiwaxiyo. Bajarapawaxiyota, jia altar-piji-iso-ita-ire.g Xuacujinae, inciensopërë përëca iso-ita-irejumawereca. Nexata jane baja, nacaetuata penajuacanubenaenexa Moisés, Aarón-beje yajawa, Dioso pijacarpabobaupa wayafowelia. 19 Itsa baja Coré barënacaetuata Dioso pijacarpabopijibaupa wayafowelia, daxita pejamatabëcueneyanabiwitsi yajawa, bajarapaepatota Jehová pijapeniweniwenaecotia tsitanaitajëtatsi daxita israelitawi pitabarata. 20 Nexata, Jehová jumaitsi Moisés, Aarón-bejejawabelia:
21 —Pawecuanatsarebeje bajarapamonae penacaetuatsiwi, tsipaji raja cae-epatoyocujinae bajarapamonae werebiabianajë —jai Jehová.
22 Itsiata baitsi jane, Moisés, Aarón-beje, bajarapaepatota irataeya bocajunuabeje, petowajëtsinexabeje bajarapamonae Jehovájawabelia. Jumaitsi tsanucaebeje:
—Diosomë xamë baja cajena daxitajiwi nenajumalirajutsinë, pejamatabëcuene-ata neyapëtaenë. Caenë picani pibisiacuene exana. ¿Detsa xuajitsia xamë bara-anaepanaeme daxita bajarapanacaetuatsibitsaëtojawabelia? Apoxanepanae bajaraxua —jaibeje.
23 Nexata, Jehová jumecanawiatsiaya jumaitsi Moisés-jawabelia:
24 —Itorobare daxita israelitamonae pewecuanatsanaenexa pamonae imoxoyo jinawanapa Coré, Datán, Abiram-ata, pijacarpabonëwecua —jai Jehová.
25 Bajarapaepatota nexata, Moisés nonotapuna. Yajawapona itsamonae israelitawi pewetsiwi, itsajotalia ponaponabeje Datán, Abiram-beje, pijacarpabobejejawabelia. 26 Nexata, Moisés jumaitsi israelitawijawabelia:
—¡Pawecuanatsanare baja mapamonaeje piajamatabëcuenebejewi, pijacarpabonëwecua imoxoyo panejinawanapaewi! Pëtsa papitame itsacuenejawayo-ata bajarapamonae pecobecowëyajuwënëjawanëmi, Jehová papecayajawananeconitsia-exanaeyaniwa pijaneconijamatabëcuene —jai Moisés.
27 Nexata jane baja, daxita israelitawi wecuanatixibatsi Coré, Datán, Abiram-ata pijataxunaebonëwecua. Bajarapaepatota Datán, Abiram-beje pijawabeje, pexi-ata, yajawanucabeje wayafowelia pijacarpabobaupa imoxoyojawata. 28 Nexata, orijibia jumaitsi Moisés israelitawijawabelia:
—Maxuaje papecatsita-exanaejawata Jehová, payapëtaename pepacuene Dioso tane-itorobijawa daxitaxuah exanabiabajë patacanamatacaitorobaponaponaejawata. Bajaraxuanë apo-exanaenë xanë tajacuata tanatojitsipaecuenia. 29 Nexata, bajarapamonae itsa tëpaejitsipa saya jiwi petëpabiabicuenia, peneta Jehová xanë aponitorobi tsipae, bajarapacuenia ta-exanaenexa. 30 Jehová itsiata itsa exanaena jiwi apopetaecuenia abaxë, pewerebiabijawata bajarapamonae, peneta xanë Jehová nitoroba. Bajaraxuata, bajaraPonë ira nawoconaeya-exanaena, ya-asaëya pequijoninexatsi bajarapamonae, daxita pecobecowë yajawa. Bajarapacuenia payapëtaename bajarapamonae bajaraPonëjawabelia penanecontsijawa, beweliacuenia petaexae —jai Moisés.
31 A̱jena̱ najumewereta bajaraxua yabara Moisés pejumaitsijawa, nexata jane baja, ira nawocona bajarapamonae pebëxëpanatsina. 32 Nexata, bajarapacuenia ira quijonetsi Coré pijamonae, daxita pamonae-ata caejamatabëcuene xaina bajaraponëjawabelia, daxita pecobecowëjawanë yajawa. 33 Daxita bajarapamonae othopareca ya-asaëya irabëxëpanayabereca, daxita pecobecowëjawanë yajawa. Bajaraxuacujinae baja, ira icatsia pijacuenia na-acata. Nexata, irabelia pëcaewa. 34 Pejumetaejawata penatsi-aëaëjaijawa ira pequijonijawatatsi, daxita imoxoyo penubenaewi rëcëpecaeya jumaitsi: «Pëtsa saya waxaitsi-ata ira nacayajawaquijone», jai tsecae. 35 Bajarapaepatota pijinia, Jehová caecuenia tsitoroba isoto athëbëwetsica, petajuenexatsi doscientos cincuenta ponëbeje, petajuitawanapaewi abaxë incienso Dioso pijacarpabopijibaupa wayafowelia. Nexata, bajarapamonae tëpa isotota petajuecueniatsi.
36 Bajaraxuacujinae, Jehová jumaitsi Moisés-jawabelia:
37 —Itorobare sacerdotenë Eleazar, Aarón pexënato, pecaetuatsinexa bajarapamonaemi pawaxixita tajuitanubena inciensojawanë. Bajaraxuanëmi raja tsiteca tanetotsatsijawanë ëxanënexa. Itsiata, pa-iso-ita-ire abaxë itatsajawanubena bajarapawaxianë-ënëta, penetsia-exanare tajë panijataxunaebonëwecua. 38 Bajaramonaemi tëpae-ata pibisiacuene pexanaejamatabëcuene, pecanacuenebiwaxianë nacopabiana tajajawanënexa, incienso pecatajuitsixae bajaraxuanëta taitabarata. Nexata, panecaetuatsicujinae, bajarapawaxianëmi patsaquitsianame, pepanaxi pane-exanaenexa. Xuacujinae, bajarapapanaxita pajumaxatatsianame piniji-altar-jumawelia. Bajarapapanaxi itsa taena israelitawi, najamatabënapitabiabiana pexanaeyaniwa Corébana pexanaecuenemicowëya —jai Jehová.
39 Nexata, pamonaemi tajuatsi isotota, daxita incienso pecatajuitsiwaxianë, broncenanito pexanaejawanë, Eleazar, sacerdotenë, caetuata. Xuacujinae, itoroba pepanaxi pexanaenexa bajaraxuanëmita, piniji-altar-jawa pejumaxatatsinexa. 40 Bajarapapanaxi petaejawata penajamatabënapitabiabinexa daxita israelitawi pacuenia caenë Aarón cuenecaëjëpatsi, pecujitabiabinexa petajuitsijawata incienso Jehová pitabarata. Nexata, ponë apopemomoxiyajuwënënë Aarón, sacerdotewi pepopenamatacaitorobinë,i apocuenecaëjëpaetsi bajarapacuenia pexanaejawa. Najamatabënapitsia-exanatsinua Jehová petocopiapatsia-exanaejawa xua tocopiapatatsi Corépijinëmi, pejamatabëcueneyanabiwitsi-ata, itsa apoyaiyatae bajaraPonë pijacuene. Daxita pacuenia baja jumaitsi Jehová Moisés-jawabelia Eleazar pexanaejawanexa, bajarapacuenia exana, israelitawi pecuenejëpaeyaniwa Corébana.
41 Itsamatacabijawabelia, bajayacunua, daxita icatsia israelitawi taxuxuaba Moisés, Aarón-bejejawabelia anaeya pebaracuaicuaijaijawa mapacueniaje:
—Paxamëbeje raja pabeyaxuabamebeje Jehová pijajiwimi —jai tsaponae.
42 Bajarapamonae matatoyorotsia itsa tsimaxëpata Moisés, Aarón-bejejawabelia, bajaraponëbeje ponabeje Dioso pijacarpabojawabelia. Bajarapaepatota, bajarapamonae tane piapiapajubo pemata-acatsijawa daxita bajarapacarpabo. Bajarapapajubojawata, naitajëta Jehová pijapeniweniwenaecotia yajawa. 43 Nexata, Moisés, Aarón-beje, imoxoyotabeje Jehová pijacarpabojawalia, pewajënaeya penucaenexabeje.
44 Nexata, Jehová, bara-anaepanaeya israelitawi, jumaitsi Moisés-jawabelia:
45 —¡Bajarapamonae pawecuanatsarebeje!, tsipaji raja, bajarapamonae cae-epatoyocujinae piawitanecuenia werebiabianajë —jai.
Nexata, Moisés, Aarón-beje, bajarapaepatota irataeya bocajunuabeje, petowajëtsinexabeje israelitawi yabara Jehovájawabelia. 46 Petowajëtsicujinaebeje, nexata Moisés jumaitsi Aarón-jawabelia:
—¡Pire pawaxiyota tajuitabiabame incienso! ¡Pirenua iso-ita-ire piniji-altar-wecua, nejenexa bajarapawaxijawabelia! Nexata, tsijumabuare inciensopërë bajarapa-ita-irejumata. Bepijiayo baja ponare itsajotalia tëpapona israelitawi. Netajuitsijawata inciensopërë, yajiwiwajëtsianame Jehovájawabelia, bajaraPonë pesiwajamatabëcuenecaewinexatsi pijaneconi, tsipaji pawitane tsi-itorobiapaebatsi pebara-anaepanaexaetsi, tocopiapataponatsitsi baja bajarapamonae —jai.
47 Aarón nexata exana pacuenia Moisés itorobatsi. Pita pawixiyota tajuitabiaba incienso. Nexata, cujinaetabijirawalia itsajotalia tëpapona israelitawi, Jehová pawitanecuene tsi-itoroba pewerebiabinexa. Nexata, Aarón jane baja, bajarapaepatota yajiwitajuita inciensojawa. Yajiwiwajëtanua Jehovájawabelia, pesiwajamatabëcuenecaewinexatsi pijaneconimi. 48 Bajaraxuacujinae, bajaraponë tuatuajëta yacaranatsianuca pamonae bobena petëpaewi, pamonae-ata abaxë asaë tsanubenae. Nexata, bajarapaepatota petëpaponaejawa copiaruca. 49 Bajarapawitanejawata yatëpa catorce mil setecientos pajiwibeje, namata-ëjëtsinejewa pamonae copiaya tëpa pebara-anaepanaejamatabëcuene Coré pejamatabëcueneyanatsiwitsi. 50 Paepatota baja copiaruca jiwi petëpaponaejawa, bajaraxuacujinae Aarón nawialia Dioso pijacarpabojawabelia, itsajota Moisés nuca.