Pacuenia sacerdotewi naxatabijitsia saicayacuenia, yabara peliwaisi
(Éxo. 39:1-31)
28
Icatsia, Jehová jumaitsi Moisés-jawabelia Sinaítsutojumata:—Neto-itapetsianame nematapijinë Aarón, pexi yajawa, Israel-pijinë pemomoxituatuajëta tanetotsatsinexamë, saicaya tajasacerdotewinexa tajacuene tanetonacuenebiwinexa. Itapetsianame mapamatabëxëyoje: Aarón, yajawapexibitsaëto pebijiwi Nadab, Abiú, Eleazar, Itamar. 2 Nexata, saicayacuenia patsijumajorocaename penaxatabijawanënexa nematapijinë Aarón, penacuene-itajëtsinexa peyaiyataenëtsicuenia, naitabëtsiayanua peponaponaenexa. 3 Nexata, xamë barëcuaicuaijamë tsane pamonae petsiyapëtaewi pitabëtsicuene pexanaewi penaxatabijawanënexa; xanë pamonae jamatabëcuenecaëjëpaeya-exanajë peyapëtaewinexa bajarapitsicuene. Bajaraxua peyabaracujaniwitsijawabelia yapëtaeya-exanaename Aarón penaxatatsinawa peto-exanaenexatsi, bajarapanaxatsijawa penaxatatsijawata daxitajiwi peyapëtaenexa ta-itapetsinëcuene bajaraponë tajasacerdotenëcuenia tanetonacuenebinënexa. 4 Nexata, mapawirianaxatatsijawanëje pato-exanaeya-exanaename: penatsimipabërutsipana, naniawelia penajumaxuabinawayonexa, pe-epa-ucutsicorobë-ata, efod-wënëjawa. Bajarapacuenia to-exanaeya-exanaename itsanawa, mantowënë nawa. Bajarapamantonawa pemuxubërëa, pecuejawanë xainaena itabëtsiaya pexaniacuenia linowiriajilomaëtota. Orijibia, to-exanaeya-exanaename itsanawa bëpënëa penaxatatsinawanexa, túnicanawa.a To-exanaeya-exanaenamenua penamataxatatsijawa linowiriapanata, bajarapacuenia pena-epacëtsijawa pexanaejawa linojawata. Bajarapacuenia to-exanaeya-exanaename saicaya nematapijinë Aarón penaxatatsijawanënexa, bajarapacuenia pexinexanua saicaya penaxatabijawanënexa pamonae tanetonacuenebiwinexa tajasacerdotewicuenia. 5 Daxita bajarapanaxatatsijawanë pexanaenexa, canacuenebiana pejutsimaëtoyo pexanaejawata oronanitojawawerena, perajejaipananë, pesaëjaipananë, petsobiapananë, pefirabilinowiriamaëtoxi-ata —jai Jehová. 6-30 […]
31 Orijibia Jehová jumaitsi:
—Aarón pijamantonawa to-exanaeya-exanaename pesaëjaipapaëbërëpanata pesaëjaitsautsaucaenawa, penajumaxuabicorobëyo efod-wënëjawacujinae penaxatatsijawanexa. 32 Bajarapanajumaxuabinawayo towëwojorutsiana, jamatejema penamatabocoxatatabiabinexatsica. Bajarapawëwojorutsimuxubërë towëfunaeya-exanaename xaniawaetsia piatajanexa, pewëtitititicaeyaniwa. 33 Nexata, bajarapanawa tomuxubërërubiana itabëtsiaya pesaëjaitsautsaucaebëxicuenia pecuejawa, granadacuaitob jumapecataecuenia pexanaebëxi. Bajarapabëxinexa canacuenebiana pesaëjaitsautsaucaemaëtota, perajejaimaëtota, petsobiamaëtota-ata. Yajawa muxubërërubiana oronanitota pexanaecampanaxi-ata. 34 Nexata, torubia-exanaename jërëatsiacuenia bajarapasaëjaitsautsaucaenawatabujawa. Copiaya rutsia-exanaename tsiquiricampanayo, bajaraxuacujinae icatsia pesaëjaitsautsaucaebëyo granadacuaito pecuenecataebëyo, bajaraxuacujinae itsacampanayo, bajarapacuenia daxitamuxubërë peyacaëjëpaenexa. 35 Nexata, Aarón naxatatabiabiana bajarapamantonawa pacujinae netonacuenebijitsia sacerdotenëxae tajacarpabo-ënëta. Bajarapanawa penaxatatsixae tajacarpabo-ënëaberena pejonewajënaeya, nexata bajaraponë xanë Jehovánë taitabarata penacuenebanucaejawa, pepitsapaejawalia-ata nayapëtaena penajumetsijawata bajarapacampanaxi. Nexata, bajarapacuenia penaxatatsixae tsane, bajaraponë apotëpae tsane.
36 »Bajarapacuenia to-exanaeya-exanaenamenua tsiquiripanayo pepopexania-oronanitota pexanae-itafacaepanayo. Bajarapa-oropanayo pejumata itanerubia-exanaename pematabicuenia mapaliwaisiyoje: «Jehová pitapetsinëtsi», pejai-itanetoxi. 37 Bajarapapanayo nexata xaniawaetsia cëtarutsianame Aarón penamataxatatsijawata pesaëjaimaëtota petojopaeyaniwatsi. Tocëtarutsianame penamataxatatsijawa pitajawawenia —jai Jehová Moisés-jawabelia Aarón yabara sacerdotewi pepopenamatacaitorobinë. 38-39 […]
40 Orijibia, Jehová jumaitsi Aarón pexi pebijiwi, sacerdotewi yabara:
—Nexata, Aarón pexinexa to-exanaeya-exanaename pijinia pijatúnicajawanë penaxatatsijawanexa itsamonaewecua saicayacuenia, bajarapacuenia pena-epacëtsijawa, bajarapacuenia penamataxatatsijawanënua. Bajaraxuanë to-exanaeya-exanaename peyaiyataenexatsi, naitabëtsiaya pejinawanapaenexanua. 41 Pamatacabi taxuxuabijitsia sacerdotewicuene,c bajarajota nexata xamë xatabianame Aarón, pexi yajawa, daxita bajarapanawanëta. Nexata, xuacujinae bajarapamonae tsimata-epacaename aceiterata, ne-itajëtsinexa pecanacopatsijawa sacerdotewicuene, bajarapacuenianua penaitajëtsinexa tatsatsijawa penacuenebawanapaenexa tajasacerdotewicuenia. 42 Bajarapacuenia-ata to-exanaeya-exanaename petsiwajënaerutsijawa bëpënëa petoya-ecaematabacajawa linowiriapanajawata, bajarapatsiwajënaerutsijawa bëpënëa penajumamatacaranatsinexa, penathaëbëxëpanacaranatsinexanua. 43 Nexata, Aarón, pexi yajawa, bajaraxuanë jumaponabiabijitsia taneyaiyataenexa paepatota bajarapamonae junua tajacarpabojawalia, paepatotanua incienso petajuitabiabi-altar-jawata nacuenebijitsia Lugar Santojawata penucaejawa. Itsa apo-exanae tsipae ta-itorobicuenia, pibisiacuene exanaejitsipa. Bajarapacuenia tëpaejitsipa. Mapaliwaisije tonajumecopatajë Aarón-nexa piasaëtsaponaponae-epato, bajarapacuenia daxitamatacabijawabelia peca-asaëtsawanapaenexa bajaraponë pemomoxi, pamonae sacerdotewicuenia nacuenebawanapaena —jai Jehová Moisés-jawabelia Sinaítsutojumata.
C29 […]