Pacuenia exanaejitsia piniji-altar broncenanitota pexanaejawa
(Éxo. 38:1-7)
27
Icatsia, Jehová jumaitsi:—¡Paneto-exanaename penamatajëpae-altar-jawa acacianaepijitablajawanëta. Piapiajawa xainaena anijametrobeje pematatsënëa veinticinco pacentímetrobeje, bajarapacuenia epatajërëtsialia-ata. Pijinia pemuxubërë-apiajawatsina athëbëabetsina xainaena caemetro pematatsënëa veinticinco pacentímetrobeje. 2 Nexata, bajarapa-altar-jawata, cuatro pa-upibejejawata, panacuenebianame cuatro xuabeje pemata-etocuenia. Cae-upita canacujitsia pamata-erubianame. Bajarapamata-ejawa pa-exanaename caejawacuenia penaexanaenexa bajarapa-altar-jawata. Bajarapa-altar-jawa pane-exanaeweretsicujinae pajumaxatatsianame daxitajawa broncenanitojawanëta. 3 Daxitaxuanë panamatawenonaejitsiamë panecanacuenebinexa bajarapa-altar-jawata, bajaraxuanë pa-exanaename broncenanitojawanëta; pacuenia ipumana pecapenetsijawanexa, pecajucaepalayonexa-ata, pacuenianua waxijawanë, pewi-ata pecayotsijawanë, pacuenia-ata pitajuruajawi-ita-ire pexaniawaetsiwaxinexa! 4 Bajarapacuenia pa-exanaename broncenanitota pesasawijawa betonebërëcuenia penamatajëpaejawa bajarapa-altar-ënëta panebuatsinexa. Nexata, bajarapasasawijawa cae-upi canacujitsia parutsianame petoyororocaewojotojawanë jamatejema pewaetabijawanexa peyotsijawata! —jai Jehová Moisés-jawabelia. 5-8 […]
Dioso itoroba pijacarpabo matatoyorotsia pecaranatsipana
(Éxo. 38:9-20)
9 Icatsia, Jehová jumaitsi:
—Tajacarpabo matatoyorotsia panetonacuenebianame pijapanabonexa. Bajarapacarpabo pijapanabonexa parutsianame caranatsiaya pexanialinowiriapapaëbërëpananë. Nexata, bajarapacaranatsijawa matonotsiareca xainaena ununenia payenepanaa cuarenta y cinco pametrobeje piapiajawa. 10 Xaniawaetsia panerubinexa bajarapapananë, patsi-exanaename veinte panaesiturutobeje broncenanito pexanaejawanë. Bajarapacuenia panenubijawanënexa bajaraponaenë, patsiwajënaefera-exanaename broncenanitojawanëta panetabuxatabanubinexa. Caebroncenaesituruto canacujitsia piupijawata, athëbëyo pa-upixatatsianame palatananitota pexanaejawanë. Bajarapamataxatatsipalatananito petabutoyoronaejawata patsi-exanaename petsijeyonaejawa, pecapitsatsinexa bajarapalinopananë bajarapanaesiturutonëta. 11 Bajarapijinia pacuenia, matatsënënenia payenepana bajarapacaranatsipananë matonotsiareca xainaena cuarenta y cinco pametrobeje piapiajawa. Xainaenanua itsaveinte panaesiturutobeje. Bajarapacuenia bajaraponaenë pato-exanaename petabuxatabanubijawanënexa broncenanitojawanëta panetsiwajënaefera-exanaejawanë. Bajarapacuenia-ata pijinia piupita palatananitota panetsi-exanaetoyoronaejawanë petsijeyonaejawa yajawa parubianame, jamatejema panerubabiabinexa naesiturutota bajarapalinopananë. 12 Waënenia pijinia bajarapapanabo epatajërëtsialia xainaena veintidos pametrobeje epatuajawa yajawa. Bajarapalinopapaëbërëpananë parubabiabianame diez panaesiturubejejawata broncenanitota pexanaejawanë. Bajarapanaesituru patabuxatabanubianame broncenanitojawanëta panetsiwajënaefera-exanaejawanëta. 13 Pemutonenia pijinia bajarapapanabo epatajërëtsialia xainaena veintidos pametrobeje epatuajawa yajawa. Bajarapalinopapaëbërëpananë parubabiabianame diez panaesiturubejejawata broncenanitota pexanaejawanë. Bajarapanaesituru patabuxatabanubianame broncenanitojawanëta panetsiwajënaefera-exanaejawanëta. 14-16 Itsiata, bajarapapanabo peyacaranatsipananëjawata, baupa pacopatsianame waënenia ocho pametrobeje pexainaejawa. Nexata, baupa pecujuanenia xainaena siete pametrobeje linowiriapapaëbërëpananë perubenaejawa acueyabi pabroncenaesiturujawata. Petsawenonenia pijinia itsasiete pametrobeje linopapaëbërëpananë perubenaejawa itsa-acueyabi pabroncenaesiturujawata. Itsiata, baupa pitacaranatsipananexa pa-exanaename nueve pametrobeje pexainaenexa piapiajawa. Bajarapapananexa pacanacuenebianame pesaëjaimaëtonëta, perajejaimaëtonë-ata, bajarapacuenia petsobiamaëtonë-ata, linopapaëbërëpanata. Pa-itanerubianame daxitamuxubërëa matatoyorotsia bajarapapana panecuejawata. Patsi-exanaename cuatro pabroncenaesiturutobeje, bajarapacuenianua bajaraponaenë petabuxatabanubijawanënexa broncenanitojawanëta panetsiwajënaefera-exanaejawanëta, jamatejema panerubabiabinexa bajarapabaupapana. 17 Nexata, daxita bajarapabroncenaesiturujawanë xainaena petabuxatabanubijawanexa broncenanitojawanëta panetsiwajënaefera-exanaejawanë. Xainaenanua athëbëyo piupita caebërëtoyo palatananitota pane-exanarubijawa, bajarapacuenianua petsijeyonaejawa linopana pecapitsatsijawanexa. 18 Nexata, bajarapapanabo daxitata xainaena cuarenta y cinco pametrobeje piapiajawa, bajarapacuenia veintidos pametrobeje epatuajawa yajawa epatajërëtsialia. Peyacaranatsipananexa pacanacuenebianame pexanialinopapaëbërëpana. Xainaena piapiajawatsina athëbëabetsina anijametrobeje treinta pacentímetrobeje yajawa pematatsënëa. Bajarapacuenia caenaesituruto canacujitsia xainaejitsia broncenanitojawanëta panetsiwajënaefera-exanaejawanë panetabuxatabanubijawanexa. 19 Daxitaxua canacuenebijitsia tajacarpabopanabojawata, pa-exanaename broncenanitonëta. Bajarapacuenia broncenaebonë piupisotsijawanë pamatabiabaponaename irabereca, pemaëtonë panecëbabiabinexa bo pemata-acatsipana piababanexa, bajarapacuenia panabo peyacaranatsipananë penutsinaesituru pejopaeyaniwanua, piababanexa —jai Jehová. 20-21 […]