(Audio de ce chapitre disponible dans Fuliik Atúuha)
Ecet Lasaar
11
1-2 Nꞌésuk yan guroge mee Betani,
babaj ukoña gúruba Mari bugo mꞌMaata,
nꞌáliiniil Lasaar gacine dó.
Lasaar násomut.
Mari ho ammee akoña aahu amus mee alogos watiiŋoe goot Acila aahu Yéesu afaak,
naŋar walool nátih goa.
3 Funak fucee,
Mari bugo nꞌatiool Maata nguboñ an arok Yéesu :
« Acila aahu,
apaali ásomusomut. »
4 Nan Yéesu ajam mee gakoŋen gaagu,
narok :
« Gásomut Lasaar let gara ecet,
bare gara eliik muruuk Atúuha,
ban nu go Aleeh Atúuha abil mee ebaj gasal. »
5 Tooge Yéesu nacamencamen máamak Maata,
Mari nꞌLasaar.
6 Haani min Yéesu ajam mee mara Lasaar ásomusomut,
alakolako to gunak gúruba benen.
7 Púr to narok ulagenaool :
« Ubaañaal bu Yúde. »
8 Ngurogool :
« Anafaanóli,
piyout nan Esúiif bugara Yúde gucameneene etegi sílankiin jaram ucet,
ban nucamen ebaañ bu bo ? »
9 Narogiil :
« Etufunak ebaje kum siwaato guñen nꞌsíruba.
An ajow mee tufunak,
mat alonk nꞌwaaf,
mara nañoñow maŋantoe mara dúniya ye ;
10 bare an ajow mee nu fuk,
ho be elonk,
mara maŋantoe maamu mulet nu ho. »
11 Nan alob mee gurim gaagu afaak,
narogiil :
« Apaalolaal Lasaar umu ngaŋot ;
bare be ejow íliwo'ool. »
12 Ulagenaool ngurogool :
« Acila aahu,
éeni gaŋot déhooro naam nu go,
ho bu gakolo. »
13 Tooge Yéesu mara ecet Lasaar nalobeiil ;
bare bugo gujojok arogiirok Lasaar umu ngaŋot.
14 Ñeer Yéesu nalobiil set arogiil :
« Lasaar acecet.
15 Jajak tambi bu mꞌbuguul min ileheenut to mee.
Súumansuum,
dó ñum mee ecil njíyinenom.
Ujaal utoogaalool bo. »
16 Ñeer Tomas,
(gajaool gaagu “Akunsa”),
narok gupaalool ulagena Yéesu :
« Alaal may ujaal bu bo,
mbil ucehaal nu ganur nu ho ! »
Yéesu ammee buroŋ baabu
17 Nan Yéesu átiiŋ mee,
najam mara Lasaar afogifok baje gunak gubaagiir.
18 Ban Betani ekuhiut Yéruusalem,
tíiŋut simetaar síwuli sífaajiir (3,000).
19 Esúiif gameeŋe gujaalojow gulob mꞌMaata bugo mꞌMari ngubeneniil búyeget mara ecet áliiniil.
20 Nan Maata ajam mee mara Yéesu acigulo,
najow ngurehoor.
Bare Mari,
ho alakolako dó nꞌyaŋ yaayu.
21 Nan Maata arehoor mee nꞌYéesu,
narogool :
« Acila aahu,
éeni aw umueen to,
áliinom mat acet.
22 Bare haani bu jaat,
nímimir mara wanoowan núciine,
Atúuha be eseni wo. »
23 Yéesu narogool :
« Alíini bu gayiho. »
24 Narogool :
« Nímimir mara ho bu gayiho funak fúsola fan gacet mee gubil mee gayiho. »
25 Yéesu narogool :
« Injé iyihene mee gacet mee,
ínje emmee buroŋ baabu.
An áyinenaam mee,
haani acehe,
ho be eroŋ.
26 Ban anooan aam mꞌburoŋ náyinenom,
mat amus acet.
Uyínenyinen mo ? »
27 Maata násuupool arogool :
« Eem,
Acila aahu,
íyinenyinen mara aw ommee Kirista aahu,
Aleeh Atúuha,
abil mee éjool bu baabe dúniya. »
28 Nan Maata alob mee gurim gaagu afaak,
nabaañ.
Nawook atiool Mari nasaboorool arogool :
« Acila aahu umu dáare.
Aw nasonkene. »
29 Nan Mari ajam mee gurim gaagu,
nayiho puc ajow bu bo nꞌYéesu.
30 Tootook Yéesu banogenerut nꞌésuk yaayu,
ho baroŋerúl tan Maata arehoor mee nu ho.
31 Esúiif yaayu gan dó mee nꞌyaŋ yaayu bugo mꞌMari bu gabenenool búyeget,
nguñowool ayiho puc nápur.
Ngulagenool mara nꞌgapinooriil ho be ejow bu bo nꞌfuyaak faafu nahuu.
32 Mari nátiiŋ tan Yéesu ammee.
Nan añowool mee,
naloh to nꞌgoohool narogool :
« Acila aahu,
éeni aw umueen to,
áliinom mat acet. »
33 Nan Yéesu añow mee Mari ahuu,
Esúiif galagenulool mee may gon nuhuu,
njogool ŋáar.
Búyegehool mbútaañi máaamak.
34 Narogiil :
« Tuu njifogool ?
» Ngurogool :
« Acila,
újool,
aw be eñow. »
35 Mufuu Yéesu mmúlohul.
36 Ñeer Esúiif yaayu ngurok :
« Apa jiñeer nacamenool mee reh mee ! »
37 Gucee mꞌbugo ngurok :
« Ho akaan mee an ápimpiim nañow,
ájuheenut may akaan jambil Lasaar acet ? »
38 Ñeer Yéesu mbaañ táañiool máamak,
najow bu bo nꞌfuyaak faafu.
Fuyaak faafu kankaan búwaay ban guŋare ekenkereŋ yáamak ngutoj.
39 Ñeer Yéesu narok :
« Jípuren ekenkereŋ yaayu.
» Maata,
áliin hacet mee,
narogool :
« Acila,
jaat funagool fubaaligen.
Ho be eput. »
40 Bare Yéesu narogool :
« Let irogirok éeni úyinen,
aw be eñow muruuk Atúuha ? »
41 Ñeer ngúpuren ekenkereŋ yaayu.
Yéesu náraahulo añeer fatiya narok :
« Paam,
ínje umu nesali mara níciineiciin nusenom.
42 Injé fannaom ímimir mara nanoonan nja úyentenom.
Eéni uñow ilob mee,
mara gayooŋ gayiho maa taahe,
mbil gúyinen mara maregen aw uboñulaam. »
43 Nan alob mee gurim gaagu afaak,
narok máamak :
« Lasaar,
úpurul dáaru ! »
44 Ñeer amaañen aahu aceheen mee nápurul,
goohool nꞌguñenool min gubooñeni útaar,
gábil nguguben buhulool.
Yéesu narogiil :
« Jijalool,
njikahool najow. »