(Audio de ce chapitre disponible dans Fuliik Atúuha)
Gasaboor Yéesu bugo nꞌNikodem
3
Dó nꞌgayooŋ efarisiit yaayu,
bajembaj áseef hara Esúiif yaayu,
gurogool Nikodem.
2 Nájool nu fuk atook Yéesu narogool :
« Anafaanom,
éli úmimir mara Atúuha aboñuli bu galiigenóli,
mara an bo mee ájuhut akaan naŋ aw waaf waawu uwu wajaahali mee mee bugan,
éeni Atúuha alet nu ho. »
3 Yéesu narogool :
« Irogiee,
maregen maregen,
éeni an abajuti benena,
mat ájuh añow Jáyiih jara Atúuha. »
4 Nikodem narogool :
« An buu nájuhe abaji benen ho bafallener ?
Ho pére be ebaañ anogen nꞌfar jaawool min abajulool benen ? »
5 Yéesu narogool :
« Irogiee,
maregen maregen,
an habajuti mee mꞌmal,
ban abajuti mꞌbúyeget Baset mee,
mat ájuh anogen nꞌJáyiih jara Atúuha.
6 Babajer bara an,
bo an ;
bare wabaji mee mꞌbúyeget Baset mee,
wo búyeget.b
7 Jambil ujaahali min irogi mee :
“Fok jibaañ jibaji.”
8 Erús be etek ban súum yo mee ;
nujam gawel yo,
bare mat úmir béy népurulo son ban yon nejow.
An may habaji mee mꞌbúyeget Baset mee,
mee nanogoore naŋ érus yaayu. »
9 Ñeer Nikodem narogool :
« Urú buu njúhe kaan ? »
10 Yéesu narogool :
« Aw ammee aliiga háamak dáare nꞌIsirayeel,
ujamut wan emmee nelobi ?
11 Irogiee,
maregen maregen,
éli ulobeuulob wan úmir mee,
uliigeuuliik may wan uñow mee,
bare buguul jilet ngáyinen elobóli.
12 Nan ilobuul mee mara waaf wara baabe nꞌetaam jíyinenutom,
buu njíjuhe jíyinenom éeni ilobuul mara wara fatiya ?
13 Bajut an ajiŋe bu fatiya nꞌémit,
bare babaj an awaloulo ró,
hammee ínje *Aleeh An.
14 Naŋ min Móyiis aŋar mee no enaab yaayu yara mañ akok nꞌegol ayihen bújooŋoor ésuk yaayu bo nꞌerampaasa yaayuc,
mo may ngubil mee gateben Aleeh An
15 mimbil anooan áyinenool mee naroŋ ñáleb.
16 Atúuha náboolibooli bugan jaram áji'iil Aleehool Hanur aahu,
mimbil anooan áyinenool mee mat acet,
naroŋ bu nanoonan.
17 Maregen maregen,
Atúuha aboñuloot aleehool be ecaf dúniya ye,
bare bu gapagen yo.
18 An áyinenool mee,
mat acafi.
Bare an áyinenutool mee,
acaficaf afaak mara ho áyinenut aleeh Atúuha Hanur aahu.
19 Ecaf yaayu,
yo yaaye :
maŋantoe mútiiŋulotiiŋ nꞌdúniya,
bare bugan gaagu emooc ngurege ngucamene,
mara bakaaneriil bufeegut.
20 Maregen maregen,
anooan akaane wajagut be efoy maŋantoe maamu ;
mat acamen ejow bu mꞌmaŋantoe jambil bakaanerool búmeeyulo.
21 Bare an ammee mꞌmaregen,
ho be ejow bu mꞌmaŋantoe maamu.
Nset mara bakaanerool búsunsuum Atúuha. »