Fuguub falob mee mara aruga
4
Púr to,
Yéesu nabaañ alako gawaare nꞌgapana fal faafu.
Gayooŋ gáamak ngújool guhomenoor to nu ho,
ñeer nájupo mꞌbusaana ban dó nu fal faafu nalako dó.
Gayooŋ gaagu peepe ngom bo nꞌgabereberef fal faafu.
2 Ñeer nak awaareiil waaf wameeŋe nꞌelob yara fuguub.
Narogiil :
3 « Jíyenten !
Baje aruga acee hápurulo be eruk.
4 Ho neruk,
ecee yo neloh nꞌgahaja bulago.
Upuu nújool utiñ yo peepe.
5 Ecee yo neloh tan bakenkereŋ buregene mof.
Népurul tímer mara guraar yo gújuhut gunogen júpo.
6 Bare nan bunak búsup mee,
nehay kaŋŋ mara eyahut júpo.
7 Ecee yo neloh mꞌmafos mabaje unuk.
Mafos maamu mmúbaagul jaram mugoncen yo.
Ñeer éjuhut ebuk mutiñ.
8 Ecee yo neloh mꞌmof majajak.
Yo nebaak jak jaram ebugoor meeeŋ.
Fukoŋol fucee nfubuk gafaakan nꞌguñen (30),
faafu gafaŋ gúfaajiir (60),
fúfaaten eceme (100). »
9 Yéesu narok :
« Hakaan mee ajama,
najam. »
10 Nan gommee nooniil,
gapii mee nak gucik Yéesu bugo nꞌulagenaool gammee guñen nꞌgúruba ngusonkenool mara guguub gan alob mee.
11 Narogiil :
« Buguul Atúuha nasenuusen min jíjuh jijok furim fárooŋo mee fara Jáyiihool.
Bare mꞌbugaagu,
kankaan fuguub fujaluti.
12 Busafer baabu burorok kum :
“Manooman nguñeere,
mat guñow,
manooman ngúyentene,
mat gujok.
Dó peepe jambil funak fucee ngúbaañul bu nꞌAtúuha
min abonket síjunubeiila.” »
Yéesu najal fuguub falob mee mara aruga aahu
13 Yéesu nabenen arogiil :
« Jijogut wan fuguub faafu fulobe ?
Buu ñeer njibile éjuh jijok gucee guguub ?
14 Yoo.
Aruga aahu,
Furim fara Atúuha nan neruk.
15 Bugan gucee bugo gommee naŋ gahaja bulago baabu dan furim faafu furugi mee.
Gujanjam fo déhooro,
Seetaane nájool ápuren furim farugi mee mꞌbugo.
16 Bugaagu gammee naŋ tin tabaje bálankiin,
bugo gujam fo mee,
nguyab fo to bújooŋoor nsúumiil máamak,
17 bare fuyahut guraar mꞌbugo.
Bugo bugan gajogut liŋ.
Nan sílaam son galat sibil mee étiiŋul mara furim faafu,
bugo be ebaañ búsol.
18 Bugaagu gammee naŋ tin tabaje mafos mara unuk,
bugo ngujam fo,
19 bare gapinoor gara dúniya ye,
gafogo fubaj,
son fuŋes gásuum ganoogan nogeniinogen,
ngoncen furim faafu jaram fújuhut fubuk mutiñ mꞌbugo.
20 Gammee naŋ mof majajak,
bugo gujam fo mee,
nguyab fo wári jaram fubuk mutiñ mꞌbugo.
Acee gafaakan nꞌguñen (30),
aahu gafaŋ gúfaajiir (60),
áfaaten eceme (100). »
Fuguub falob mee mara fujaaŋa faafu
21 Yéesu nabaañ arogiil :
« Taŋ an nja asapensapen fujaaŋa afaak naŋar fo árur nꞌebara mba fataam eral ?
Let ho bu gariten fo nꞌejaaj ?
22 Bajut waaf wakoopeni wañumuti gámeeyul.
Bajut waaf waguubi wañumuti gápuren mꞌmaŋantoe.
23 Hakaan mee ajama,
najam. »
24 Nabenen arogiil :
« Wanoowan njijame,
mbil jikaan to úyegehuul.
Gaciibum gan jibil mee eŋar njiciib bugan gaagu,
nu go may Atúuha abiluul mee eciib afaak,
nabenenuul to waaf ucee.
25 An abaj mee,
be eyab reg to ;
bare an abajut mee,
be ebohool peepe káŋ bu nꞌjan ákagum mee ró. »
Fuguub falob mee mara bariiler eruugiit
26 Yéesu nabaañ arogiil :
« Jáyiih Atúuha jinogoonogoor naŋ aruga nꞌekunko.
27 Min aŋohe mee náliyo,
fuk nꞌtufunak,
eruugiit yaayu be eriil nebaak jaram éjalako ho bámirut to waafóowaaf.
28 Etaam,
yo nja épurenooroul mafos.
Mo be emundum muriil,
mmubuk,
kindiŋ mmubaj sooh.
29 Bare nan mutiñ maamu mubil mee ehal,
ho be eŋar gajihumool,
mara eyim étiiŋe. »
Fuguub falob mee mara jooh bugoyaab
30 Yéesu nabaañ arok :
« Jáyiih Atúuha nu waa pére nújuhaale uliigooraal jo ?
Fuguub féy pére fújuhe fúpajul jo ?
31 Jinogoonogoor naŋ jooh bugoyaab jan guruge nꞌetaam.
Jo jirege barehoor sooh saasu peepe.
32 Bare éeni jirugi,
be eriilúl jaram jikaay mununuk maamu peepe mara ufat,
njibaj uhan wáamak mimbil upuu waawu újuh umeeyo ró,
nuleef. »
33 Yéesu guguub gameeŋe naŋ gaagu ugu nja aŋar naliigeniil Furim Fásuum mee,
reh nu wan gújuh mee gujok.
34 Nꞌguguub déhooro nja alob mꞌbugo.
Bare éeni alako bugo nꞌulagenaool nooniil,
nápajuliil go peepe.
Yéesu nayaaŋen fúrus fáamak nfuyoom
35 Funak fanur faafu nan tinak tijon mee,
Yéesu narok ulagenaool :
« Utípaal fal faafu bu nꞌgaaga gahaja. »
36 Ñeer ngukat to gayooŋ gaagu min gújupo mꞌbusaana baabu dan Yéesu ammee.
Mbaj may usaana ucee wajaoore mꞌboola.
37 Piyout,
fúrus fáamak nfuyihoúl ;
gulonkos gaagu nak gúlohul dó mꞌbusaana baabu jaram bon epuus.
38 Bare Yéesu ban ammee nꞌfúruum busaana baabu,
ákakag fukowool min an gaŋot.
Ulagenaool ngúliyo'ool ngurogool :
« Anafaanóli,
buu noomaal mee nejow be ecet,
aw nuwaayen mee ? »
39 Ñeer nayiho nayaaŋen fúrus faafu ban narok fal faafu :
« Ubeb !
Uluugoor !
» Fúrus faafu nfuyihen kak,
ñeer nníf yemm.
40 Yéesu narogiil :
« Waa ucile njísebi reh mee ?
Jíyinenerut paa ? »
41 Ñeer ngureg ngúsebie nak gurogoor :
« An buu umu,
han érus yaayu son fal faafu síkaanume ? »