(Audio de ce chapitre disponible dans Nouha)
Gásuumaay gara bapaalaay bafaagoériit
54
Yéruusalem,
Acehériit mee aroge :
« Ukaroor,
aw habajeenut mee aleeh !
Uyah sikaaw sara jisula ban nóoni nꞌgásuumaay,
aw hámireenut mee buyok bara gabugoor.
Aw akoña hábiñeneeni mee,
be ebaj guleeh garege bameeŋ bugara akoña añuuhoe.
2 Ubenen muruuk mara éguuhi,
usugen ulec waawu benen ;
jambil utiih.
Uraaw gundaap gara éguut yaayu
nuyah síriiŋui siliŋ,
3 mara aw be epeñ jaram upiis.
Guleehi be ebot mof maamu
man gúlingoor mee,
ban sísuk sakahi bo mee,
so be ebaañ sibaj bugan.
4 Jambil úsebi,
an abiloohi gáfookul maareer.
Jambil usuu,
an mat asuuleni benen.
Aw bu gamojen ñisuu ñaañu ñara nꞌfuleehei,
mat ubaañ upinoor ñisuu ñara nan uŋareen mee ejandu ;
5 mara hátuuhi mee bu gáani araaŋi,
gajaool Acehériit mee,
Amansa hara Dúniya.
Haset mee hara Isirayeel,
bu gáani apagenai,
Atúuha hacil mee mof maamu búroom mo.
6 Injé Atúuhai niroge :
« Búyegehi bútaañitaañi,
naŋ akoña ábiñenibiñen,
Bare ínje Acehériit mee iwoogiwook nirogi úbaañul.
Mee pére íjuhe ikahen akoña han iyabe ínje nꞌgápur ?
7 Nikaheneenikahen maaa fáriit
bare bu gabaañenuli
mara ibonkehibonket máamak. »
8 Acehériit mee ammee apagenai naroge :
« Fiiñom futiñentiiñ máamak,
níwugeeni búsol maaa ;
bare ínje nemmee abonkeha,
bu gáriikeni bu nanoonan. »
9 Naŋ min ikali mee ganaay Nówe
mara mat baj benen búyiik bara mal bu ganimen etaam yaayu,
nikali'i may fiiñom mat futiñ benen miiya
ban mat ibaañ ilasi. »
10 Acehériit mee hábooli'i mee naroge :
« Haani mbi simontaañ saasu sigoroor
ban gúlankiin gaagu ngutosoor,
mat íyolo gáriikeni
ban bapaalayom nꞌaw baseni mee gásuumaay mat bufaago. »