Rúut
Búwuy Elimelek
1
Bajembaj bacaar balohulo nin naanu nan éseef guyeken mee mof mara Isirayeel.
Mbaj amaañen acee,
ésugool Beteleem mꞌmof mara Suda,
háwuye bugo nꞌakoñaool nꞌguleehool gumaañen gúruba bu mꞌmof mara Mowab.
2 Amaañen aahu gurogool Elimelek,
akoñaool Naomi.
Guleehiil Maalon bugo nꞌKiliyon.
Ngukaan bugan bugara Efarata yara Beteleem dó nꞌSuda.
Ngujow gútiiŋ mof mara Mowab ngucong dó.
3 Elimelek dó nacet mee min ŋaño to akoñaool Naomi nꞌguleehool gumaañen gammee gúruba.
4 Guleehool gumaañen gammee gúruba nguyab ukoña bugara mof mara Mowab ;
aahu gurogool Orepa min aahu gurogool Rúut.
Ngucong to wátiiŋe símit guñen.
5 Maalon bugo nꞌKiliyon márubaiil to may ngucehe.
Ñeer Naomi nalako baagut amaañen baagut aleeh.
6 Funak fucee Naomi najam mara Acehériit mee abonkebonket mofool Isirayeel,
naseniil guwaagen gajajak,
nahomenoor bugo nꞌúsaabaulool be épur Mowab,
nabaañ bu ban ápurulo mee.
7 Ñeer nápurul to nꞌésuk yaayu dan acongeen mee ho nꞌúsaabulool gammee gúruba,
nguŋar bulago bara ebaañ bu mꞌmof mara Suda.
8 Naomi narok úsaabulool gammee gúruba :
« Jibaañ,
anooan bu síndo'ool bo nꞌfiil fara jawool.
Emít ekaan mimbil Acehériit mee ajogooruul naŋ min jíjogoli mee jak ínje nꞌguleehom gacet mee.
9 Irúwaruwa mimbil Acehériit mee asenuul umaañen gabiluul ejok.
» Afaak,
nagaabiil.
Ñeer úsaabulool nguhuu máamak.
10 Ngurok Naomi :
« A-a !
Elí bu gajaoor nꞌaw bu mꞌmofi. »
11 Naomi narogiil :
« Usáabulom,
jibaañ bu mꞌbuganuul.
Waa ukaane njicamen galagenom ?
Pére íjuhe ibaj guleeh gucee gabile éjuh guyabuul ?
12 Jijow,
ínje ífaanufaanul mbil amaañen ayabom.
Haani irogeene gálaagen,
íjuhe ibaj amaañen nꞌfuk fe nibaj guleeh gumaañen ?
13 Buguul be éjuh jinaakiil jaram guliŋ bañuuhout nꞌamaañen acee ?
Usáabulom,
buroŋom burege booluul bataf mara Acehériit mee ategantek. »
14 Usáabulool ngureg nguhue.
Orepa nagaab asomool ngukahoor.
Bare Rúut najok to liŋ nꞌasomool,
mat ajow.
15 Naomi narok Rúut :
« Abehi awuje bu mꞌbuganool bo nꞌútuuhaiil,
ulagenool. »
16 Rúut násuupool arogool :
« Jambil ufarenom min ikaheni nibaañ bu síndo'om.
Tanootan nubil mee ejow,
ínje bu galageni ;
tanootan nubile gaŋot,
ínje bu gaŋot to.
Bugani be ekaan buganom,
Atúuhai be ekaan Atúuhaom.
17 Tan uñum mee ecet ngufogi,
ínje be ecet ngufogom to.
Ñeer ínje nꞌaw ecet ebilola gafanjen,
naŋ let mo,
mimbil Acehériit mee ategom máamak. »
18 Naomi nan añow mee mara Rúut abiloot ebaañ búsol,
nasoŋ ngujawoor.
19 Ñeer ngulalenoor márubaiil jaram gútiiŋ Beteleem.
Esúk yaayu peepe nan eñowiil mee,
néwollo.
Ukoña waawu ngurok :
« Umu pére Naomi ? »
20 Naomi násuupiil arogiil :
« Jambil jirogom Naomi (akoña habaj mee gásuumaay),
jirogom Maara (akoña ábonteni mee) mara Atúuha ara sembe akaanankaan íbonteni.
21 Bápurerom taahe nꞌfubajom dó,
Acehériit mee nabaañenulom waroorom.
Jíyolo erogom Naomi,
mara Acehériit mee Atúuha ara sembe áwuganwug búsol,
nakaanaam gáwuusa. »
22 Maa Naomi abaañulo mee mꞌbúwuy baabu bugo nꞌásaabulool Rúut hara mof mara Mowab.
Gútiiŋulotiiŋ Beteleem bugo nejook eyim wan guroge mee Ors (nogoonogoor mꞌbárut).