Atúuha nápajul Móyiis bugo nꞌAharoŋ nꞌgagaan gátiyaara gara Paak
12
Acehériit mee narok Móyiis bugo nꞌAharoŋ ban gommee nꞌEsípt :
2 « Fujenna fe fo fubil mee gáani mꞌbuguul bugara Isirayeel fujenna fútiyaara.
Fo fuñumuul mee eliik émit ewuugul.
3 Jijow jitook bugara Isirayeel búroomiil njirogiil :
Nan fujenna fe fubil mee ebaj gunak guñen,
fiil fanoofan nfuŋes ésaaja mba yaŋ yanooyan neŋes ésaaja.
4 Yaŋ yan bugara yo gumeeŋut mee jaram gújuhut efaak gabarak,
gújuhe gunap nꞌgucinooriil gareg mee ngucigiil min guwaajoor.
Ngucaap ésaaja yabiliil etook.
5 Fújikel faafu bu gáani fabajut gafoj nfubaj émit yanur.
Eéni jibajut fújikal fara ésaaja,
njiŋar fara ejaameen.
6 Buguul be ebaŋ go bu nꞌfunak fakaan mee guñen nꞌgubaagiir nꞌfujenna fe.
Nꞌfunak faafu bunak baloher,
giil gaagu peepe gara Isirayeel ngutaan gújikeliil.
7 Mbi jiŋar fúsim fara go jilogos sítipenum saasu nꞌsijaaj saasu sara úpeegum wara siyaŋ dan jibil mee fúcaho.
8 Nu fuk faafu,
eluu go be esowi netogoñi nꞌfúmbuur fabajut élewiir nꞌutoj wátalie.
9 Jambil jilaben yo,
jambil may jísaawul yo déhooro,
bare jisow yo peepe :
fukow faafu,
goot gaagu son may wan dó mee nu far faafu.
10 Buguul be etogoñ eluu yaayu peepe bajut gaŋañen bu mꞌbújom.
Eéni waaf uŋaño,
njisow wo jaram ureem.
11 Éeni joon mbutogoñ yo,
njikok gukoŋoluula,
njikaano usamatauul njíyeken gugol nꞌguñenuul.
Njitogoñ yo tímer.
Gagaan gara Paak,
mee ngubil mee ekaani bu garuuken ínje Acehériit mee.b
12 Nu fuk faafu,
ínje bu gabosoor mof mara Esípt búroom mo,
ban bu ganimen aleehóoleeh átiyoora nꞌyaŋóoyaŋ yara Esípt búroom yo,
kábiriŋ bugan gaagu káŋ bu nꞌsikaj saasu ró.
Mo ínje be ecaf útuuha galet mee maregen bugara Esípt peepe.
Injé emmee Acehériit mee.
13 Fúsim faafu falogosi mee nꞌúpeegum waawu,
fo fubil mee gáani fúfaasum fañum mee eliik siyaŋ dan buguul jommee.
Yaŋóoyaŋ dan ibil mee eñow fúsim faafu,
be ewuj yo,
ban mat yon dó nꞌganimen gaagu gan ibil mee etek mof mara Esípt.
14 Mbil jibaŋ funak faafu nꞌúyegehuul,
ban émihoomit njikaan nꞌfunak faafu gagaan bu garuuken Acehériit mee.
Mbil jijok gagaan gaagu naŋ fuyuhoum bu mꞌbuguul káŋ bu mꞌbúbajumuul ró bu nanoonan.
15 Buguul be etiñ fúmbuur fabajut élewiir butum gunak futok nꞌgúruba.
Jógum nꞌfunak fútiyaara,
jambil jibaañ jibaj élewiir nꞌsiyaŋuul.
Anooan abil mee futiñ fúmbuur fabaje élewiir dó nꞌgunak gaagu,
ho bu gápureni nꞌgayooŋ Isirayeel.
16 Nꞌfunak fútiyaara son fakaan mee futok nꞌgúruba,
buguul bu gahomenoor njíciinom.
Nꞌgunak gaagu gammee gúruba,
gújagagoojagak mat gukaani.
Anooan mꞌbuguul ésiil déhooro nájuhe akaan.
17 Émihoomit buguul be ekaan gagaan gaagu gara gúmbuur gabajut élewiir,
bu gawosen funak fan ípurenulo mee uyooŋuul mꞌmof mara Esípt.
Gákaanum funak faafu bu gáani naŋ fuyuhoum bu mꞌbuguul mꞌbúbajumuul bu nanoonan.
18 Nꞌgárusa gara funak fakaan mee guñen nꞌgubaagiir fara fujenna fútiyaara,
buguul be etiñ fúmbuur fabajut élewiir bu nꞌgárusa gara faafu funak fakaan mee gafaakan nu fanur (21).
19 Jambil an atook élewiir nꞌsiyaŋuul butum gunak futok nꞌgúruba.
Anooan abil mee futiñ fúmbuur fabaje élewiir,
kábiriŋ nꞌan hara Isirayeel káŋ bu nꞌajawoora ró,
ho bu gápureni nꞌgayooŋ Isirayeel.
20 Maareer ñeer banooban njicine,
jambil jitiñ wabaje élewiir.
Haani fúmbuur njibile futiñ,
jambil fubaj élewiir. »
21 Púr to,
Móyiis nawook unafaan bugara Isirayeel peepe narogiil :
« Mbil jiŋar ejaameen mba ésaaja jimuk bu nꞌgiiluul min jikaan gagaan gara Paak yaayu.
22 Jiweehen nꞌefeem fúsim fara ekaj yamugi mee,
njiŋar jihan jara bununuk ban guroge mee hisop c njiyaaf jo dó,
njiŋar jilogos étipenum yaayu son sijaaj sammee síruba sara gápeegum gaagu.
Jambil an mꞌbuguul ápur nꞌyaŋool káŋ bu mꞌbújom.
23 Nan Acehériit mee abil mee éjool be etek bugara Esípt nañow fúsim faafu fammee nꞌétipenum yaayu nꞌsijaaj saasu sammee síruba,
ho be ewuj fatiya gápeegum gaagu ban mat akat amalayika amuge mee nanogen nꞌsiyaŋuul be eteguul.
24 Dáaru peepe bu gáani fuyuhoum bu mꞌbuguul mꞌbúbajumuul fan jibile gákaanum bu nanoonan.
25 Nan jibil mee ganogen mꞌmof man Acehériit mee arok mee be esenuul,
buguul be ekaan búsimen baabu bátig mee.
26 Nan guleehuul gubiluul mee gasonken :
“Waa ucile njikaan búsimen baabu ubu”,
27 buguul be erogiil :
“Dáaru búsimen bara Paak yaayu bu garuuken Atúuha hapagenolaal mee ho newuj siyaŋolaal nan atege mee bugara Esípt.”
» Ñeer bugara Isirayeel nguyah gújuul min gunaak Acehériit mee,
28 nguyuho gujow gukaan waaf waawu peepe wan Acehériit mee arok mee Móyiis bugo nꞌAharoŋ.
Ecet aleehóoleeh amaañen átiyoora hara Esípt
29 Bu nꞌetut fuk,
Acehériit mee namuk aleehóoleeh amaañen átiyoora hara Esípt,
kábiriŋ nꞌhara Firawuna,
ammee áyiih,
káŋ bu nꞌaleeh hara an ammee nꞌfupeek,
son babajer bútiyoora bara sikaj saasu.
30 Nu fuk faafu ufu,
Firawuna nꞌújagagaool peepe bu mꞌbugara Esípt búroomiil ngúliyo.
Sikaaw sáamak nsípurul nꞌEsípt mara bajut yaŋ yabajut eñalen.
31 Nu fuk fanur faafu,
Firawuna nawook Móyiis bugo nꞌAharoŋ min arogiil :
« Jípur mꞌmofom,
jijow buguul mꞌbugara Isirayeel jíciin bo Acehériit mee naŋ min jirok mee.
32 Jiŋar may sikajuul njijow naŋ min jilob yo mee.
Njíciinom bo min Atúuha ásoonienom. »
33 Bugara Esípt gupinoopinoor gurok :
« Alaal bu gafaago necet !
» Ngusommen guyannoor bugara Isirayeel min gúpur tímer mꞌmofiil.
34 Yo ecil mee bugara Isirayeel nan gommee nejow,
nguteb ukunaŋ waawu wara epor yabajut élewiir yan gucookoor mee be ekaan gúmbuur.
Nguŋar újuwoiil nguguub wo,
nguteb gubaŋ nꞌubandiil.
35 Tootook min bugara Isirayeel gukaane wan Móyiis arogiil mee.
Gúcinciin bugara Esípt wañ son waaf wakaani nꞌékori,
nꞌéwuruus.
36 Acehériit mee akankaan min bugara Isirayeel mooliil músuum bugara Esípt min gusoŋ,
nguseniil wan gúciiniil mee.
Maa nguwuut mee bugara Esípt peepe.
Epúr bugara Isirayeel nꞌEsípt
37 Bugara Isirayeel ngúpur Ramises bu Sukoot.
Umaañen gajow mee nꞌgoot gújuhe gútiiŋ síwuli siceme futok nu yanur (600,000).
Ukoña waawu nꞌguleeh gaagu gupinuti.
38 Gayooŋ gásuupoore sísiwo samemmeeŋ ngujawoor mꞌbugo.
Bugara Isirayeel guŋaruloŋar ekoore yáamak yara sikaj.
39 Bugara Isirayeel nan gukamuliil mee nꞌEsípt,
gubajout be enaak epor yaayu neriit.
Erutugaay yaayu yan gutebulo mee,
guŋaŋar yo gusow gukaan gúmbuur gabajut élewiir mara gubajout be eŋar múcahoaay mꞌbulago.
40 Bugara Isirayeel gucocong nꞌEsípt wátiiŋe símit siceme sibaagiir nꞌgafaakan nꞌguñen (430).
41 Nꞌfunak fe fara jaat,
nꞌgafaagoum símit sammee siceme sibaagiir nꞌgafaakan nꞌguñen (430),
no uyooŋ Acehériit mee úpurulo mee nꞌEsípt.
42 Fuk faafu ufu,
fuk futakajom bu nꞌAcehériit mee mara no napooy mee buganool ban nakaaniil ngúpur mꞌmof mara Esípt.
Mo may émihoomit nu fuk faafu ufu,
bugara Isirayeel gubiloot mee gaŋot bu garuuken Acehériit mee.
Gambacóogambac gam bo néjool,
mo may ngubil mee ekaan.