Búyiik búsola babil mee elohúl nꞌEsípt
11
Acehériit mee narok Móyiis :
« Ŋañoŋaño búyiik banur búsola ban ínje ibile gawalenúl bu nꞌFirawuna son mof mara Esípt búroom mo peepe.
No ho bu gakahenuul min jípur,
nakamuul bakam mꞌmofool.
2 Ujow urok bugara Isirayeel mbil amaañen nꞌakoña anooan najow áciin acinoorool wakaani mee nꞌéwuruus son wakaani mee nꞌékori. »
3 Acehériit mee akankaan min bugara Isirayeel mooliil músuum bugara Esípt.
Benen,
Móyiis fannaool kankaan an háamak han újagaga Firawuna bu mꞌbugara Esípt ró gunaake.
4 Ñeer Móyiis narok Firawuna :
« Acehériit mee waawe nalobe :
“Nꞌetut fuk ínje bu gabosoor Esípt,
5 nimuk aleehóoleeh amaañen átiyoora hara Esípt,
jógum nꞌaleehi aw ammee áyiih,
káŋ bu nꞌhara ájagaga akoña ammee nébam,
son may babajer sikaj saasu bútiyoora.
6 Sikaaw sáamak be épurul mꞌmof mara Esípt peepe san an amusut ajam,
ban mat simus sibaj benen.
7 Bare mꞌbugara Isirayeel,
haani yen mat erok an,
mat erok énunkureŋ.
Mo buguul be émir mara ínje Acehériit mee mat irehen Isirayeel nꞌEsípt.” »
8 Móyiis nabaañ arok Firawuna :
« No ñeer újagagai peepe be éjool guyahom gújuul min gurogom :
“Ujow,
aw mꞌbugani galageni mee.”
Kindiŋ nijow.
» Móyiis ñeer nápurul nꞌyaŋ áyiih aahu máñigene.
9 Acehériit mee narok Móyiis :
« Firawuna abiloohuul gáyenten,
mimbil íjuh ikaan buñof dó nꞌEsípt waaf wabile gajaahali an. »
10 Móyiis bugo nꞌAharoŋ gukankaan fácil Firawuna waaf waawu peepe wajaahali mee an.
Bare Acehériit mee nakaan nꞌFirawuna balas min afoy gakahen bugara Isirayeel ngúpur mꞌmofool.