Suseef ápajula síyaut
40
1-2 Jow bo jow, tíiŋ funak fucee újagaga gúruba bugara áyiih aahu hara Esípt ngúpanden nu ho : anafaan újagaga múremiinaay bugo nꞌanafaan usowa gúmbuur. Ayíih aahu náñigen mooliil. 3 Naŋariil apeek dó nꞌfupeek fan dó mee nꞌyaŋ anafaan upooya áyiih aahu, dan gupeek mee Suseef. 4 Anafaan upooya áyiih aahu naseniil Suseef añeer. Epirisoŋ gammee gúruba ngubaj gupiyo dó nꞌfupeek faafu.5 Fuk fucee unafaan gammee gúruba ara múremiinaay bugo nꞌara gúmbuur bugara áyiih aahu ngúyaut. Bare anooan síyauhool, nꞌelob so. 6 Bu mꞌbújom, nan Suseef ajaalo mee be eñowiil, natoogiil min gúkaboore. 7 Nasonkeniil arogiil : « Waa ucile jaat njilako bonteni mee ? » 8 Ngúsuupool gurogool : « Uyáuyaut bare ubajut ápajula so. » Suseef narogiil : « Atúuha ájuhe ápajul so. Jilobom síyauhuul. »
9 Anafaan múremiinaay maamu nagaan Suseef síyauhool : « Iyáuyaut iñow bumoobaay fácilom. 10 Bumoobaay baabu bubaje wa'an úfaajiir. Bureeb déhooro, mbúruup, mbubuk gútugus gara gumoobaay gájuujuuk. 11 Nijok nꞌguñenom éraanum yara áyiih aahu, niŋar gumoobaay gaagu iñaafen dó nꞌéraanum yaayu, nisen áyiih aahu. »
12 Ñeer Suseef narogool : « Síyauhi elob so yo yaaye : wa'an waawu úfaajiir wo wommee gunak gúfaajiir. 13 Taahe nꞌgunak gúfaajiir, áyiih hara Esípt be eseni fuyuhoum fáamak, ho be ebaañeni to nꞌgújagagi. Aw be esenool éraanumool naŋ no. 14 Nanoonan jagi, jambil umojenom. Ubonket ulob múmbaam áyiih aahu min úpurenom dáare nꞌfupeek fe. 15 Maregen maregen, nꞌsembe ngúpurenulaam mꞌmof mara éhebura yaayu, ban taahe ikaanut waafóowaaf wátiiŋe epeek. »
16 Nan anafaan usowa gúmbuur añow mee mara Suseef ajajal síyaut saasu ban gásuumaay gon dó, narogool : « Injé may íyauyaut, íjutenoor nꞌfuko'om mutegel múfaajiir mara gúmbuur. 17 Jitegel jammee fatiya, búsuupoor gúmbuur gan nja áyiih atiñ mee gon dó. Ñeer upuu nújool uñut wan dó mee nꞌjitegel jaaju nꞌfuko'om. »
18 Suseef narogool : « Síyauhi elob so yo yaaye : mutegel mammee múfaajiir mo mommee gunak gúfaajiir. 19 Taahe nꞌgunak gúfaajiir, áyiih hara Esípt be ébuy fuyuhoumi nabaŋi tin tárookene. Bugo be ecagi nꞌekondoor nulangahen mꞌbununuk, min upuu uwaloúl uñut eniini. »
20 Mbaj gunak gúfaajiir, áyiih aahu nakaan gagaan gan nja akaan mee émihoomit nꞌfunak fan abaji mee. Násiil jak asen újagagaool gúcaho, naliigiil fuyuhoumool nꞌunafaan gammee gúruba ara múremiinaay bugo nꞌara gúmbuur. 21 Nabaañen anafaan ukaana múremiinaay nꞌgújagagool gupiye, ho umu nabaañ nak asen áyiih aahu éraanumool. 22 Ñeer anafaan usowa gúmbuur, nacagool nakogool fatiya mꞌbununuk nalangahen, naŋ min Suseef alob yo mee eeno. 23 Bare anafaan ukaana múremiinaay maamu, alobut mara Suseef ; amojenoomojen bándoor.