Fúcihum 38

Tamar nabanten Suda

Nin naanu unu, no Suda ápur to mee nꞌgutiool min ajow acin bugo nꞌamaañen acee hara Adulaam, gurogool Hira. 2 To nañow mee ájur, aleeh Suwa akanaaniit aahu, nayabool nguñuuho. 3 Naŋar búteb nabajool aleeh amaañen, Suda nakaanool gajow arogool Er. 4 Nabaañ aŋar búteb nabajool aleeh amaañen, akoñaool nakaanool gajow arogool Onan. 5 Nabenen abajool aleeh amaañen, narogool Seela. Bare nan Seela abaji mee, Suda bajaer Kesib.

6 Púr to, Suda naŋes aleehool átiyoora ammee Er akoña ayab, gurogool Tamar. 7 Er bakaanerool búsuumeriit Acehériit mee, namugool. 8 Ñeer Suda narok aleehool Onan : « Utun akoña ati'i mimbil aŋañenool aleeh bukooŋun jambil aniiho. » 9 Onan nan ámir mee mara búbajum baabu bubiloot ekaan boola ; éeni gunap, náyuh fúsimool nꞌetaam, jambil abaj atiool guleeh. 10 Onan may bakaanerool búsuumeriit Acehériit mee, namugool. 11 Ñeer Suda narok ásaabulool Tamar : « Uŋar futiko faafu nujow ulako yaŋ paayi min unaakaal aleehom Seela náling. » Mara Suda acamenut mbil Seela acet naŋ gutiool. Tamar nabaañ ñeer bu yaŋ paayool.

12 Jojow jaram piyo bo, akoña Suda, ammee aleeh Suwa, nacet. Ñikul ñaañu nñifaago, Suda najow bugo nꞌapaalool Hira hara Adulaam bu nꞌésuk yan gurege mee Timina be eñow úsahula bufal sísaajaool. 13 An nájool arok Tamar : « Pay araaŋi umu nejow bu gásahul bufal sísaajaool Timina. » 14 Ñeer Tamar nápuren wañool wara fútinjo, min aŋar futiko aguben buhulool jambil an afaasool. Najow alako mꞌbúnogen ésuk yan guroge mee Enayim, mꞌbulago bara Timina ; tootook min búyegehool buseno'ool mara Seela áliling ban Suda aseneruhool ho ayab.

15 Nan Suda añow mee Tamar, najogool akoña áraaria mara nagubene buhulool. 16 Suda nacigool tan alako mee mꞌbulago baabu. Afaasutool, narogool : « Icamencamen unapa. » Tamar násuupool arogool : « Waa nubilaam esen éeni iseni fukowom ? » 17 « Injé be eseni gabarak gara ejaameen dó nꞌekooreom. » Narogool : « Yoo. Bare waa nubile esenom paañeer ijok naŋ gayihen^a ? » 18 Suda narogool : « Waa nucamene iseni ? » Narogool : « Usenom ejaarui yabaj mee fúfaasumi nꞌfundaap yo son egol yan ujok mee. » Ngujamoor, nasenool wan gulob mee min gunap. Ñeer naŋar búteb bara Suda. 19 Tamar nayiho, najow ápuren fútiko'ool fan aguben mee buhuluul min abaañ akaano wañool wara fútinjo faafu.

20 Ñeer Suda naboñ apaalool Hira, adulaamiit aahu, gabarak gaagu be esen Tamar mbil abaañenulool wan asenool mee, atoogutool bo. 21 Hira nan átiiŋ mee, nasonken gan atook to mee arogiil : « Akoña anoomene mee taahe fukowool, úmey ? » Ngurogool : « Taahe musut baj akoña han nja anoomen fukowool. » 22 Hira nábaañul arok Suda : « Iñowutool, ban gan itook to mee gurogaam musut baj bo akoña han nja anoomen fukowool. » 23 Ñeer Suda narogool : « Ukahool bo naŋar ! Bare jambil akaanola ñisuu ! Niboñooboñ gabarak gaagu bare utoogutool bo. »

24 Baj bo gujenna gúfaajiir, an nájool arok Suda : « Asáabuli Tamar, anoomennoomen fukowool jaram aŋar búteb. » Suda narogiil : « Jípurenulool bu tíyaŋ min asowi ja guroŋ. » 25 Nan gommee ngápuren Tamar bu tíyaŋ, naboñ gurok pay araaŋool : « Amaañen hakaanaam mee búteb be, ho acile ejaaru ye nꞌfundaap yo son egol ye. Jiŋes njímir ay hoom. » 26 Ñeer Suda nafaas wo narok : « Tamar aregaam bátiliŋ, akankaan mo mara inaakut aleehom Seela nayabool. » Suda abaañut ñeer gunap nꞌTamar.

27 Ewaato'ool nétiiŋ yara búnogen, nañow mara kunsa naakene. 28 Nan ammee ngataaso, aceeiil nápurenul gañenool. Akoña hayiho'ool mee najok gañen gaagu min akok go búbil bújuugak narok : « Ume, ho ammee átiyoora. » 29 Bare aleeh aahu nabaañen gañenool min atiool ápurul. Akoña aahu hayiho'ool mee narok : « Aahe ápeegule butum ! » Aleeh aahu ngurogool Peres (yo yommee : butum). 30 Kindiŋ atiool akogi mee búbil bújuugak nápurul, ngurogool Seraah (yo yommee : gápurum tinak).