Atúuha nabehúl mutiñ mucee
16
Gayooŋ gara Isirayeel ngúpur Elim.
Nꞌfunak fakaan mee guñen gaat fara fujenna fúruten bápureruliil nꞌEsípt,
ngútiiŋ nꞌerampaasa yara Siin,
yammee etuhoor Elim son emontaañ yan guroge mee Sinay.
2 Bo nꞌerampaasa yaayu,
gayooŋ gaagu peepe ngon ngaloloboor guyah mꞌMóyiis bugo nꞌAharoŋ
3 gurogiil :
« Acehériit mee amugeenóli nꞌEsípt nan nja ugongen mee ukaraari wara eluu son nan nja utiñ mee gúmbuur jaram ukat bo,
yo ekolo'óli.
Bare buguul njiŋarulóli bu baabe nꞌerampaasa ye be emugóli mꞌbacaar. »
4 Ñeer Acehériit mee narok Móyiis :
« Injé be ekaan min émit élubul mutiñ bu mꞌbuguul.
Funagóofunak,
bugan gaagu be ejow guforúl mutiñ mara funak fanur.
No ñeer nibil mee ekaan niñow teer bugo be esoŋ elobom ngukaan wan ilobiil mee.
5 Nꞌfunak fakaan mee futok nu fanur,
nan gubil mee gacookoor mutiñ man guforulo mee,
bugo be eñow mara mubenenobeneno ñoono ñáruba reg gaagu gunak. »
6 Móyiis bugo nꞌAharoŋ ngurok bugara Isirayeel peepe :
« Gárusa ge,
buguul be émir mara Acehériit mee ápurenuluul nꞌEsípt.
7 Gajom mꞌbújom,
buguul be eñow sembe sara Acehériit mee,
mara najanjam baloloboorer ban jiloloboor mee jiyah nu ho.
Taŋ éli bugan buu mbil jiloloboor jiyah nꞌéli ? »
8 Móyiis nabenen arogiil :
« Gárusa ge,
buguul be eñow nan abiluul mee esen eluu jitogoñ,
mꞌbújom nasenuul mutiñ jitiñ jipooñ,
min jímir Acehériit mee ajanjam balolobooreruul jiyah nu ho.
Taŋ éli bugan buu ?
Let nꞌéli njiloloboore jiyah bare nꞌAcehériit mee njiloloboore jiyah. »
9 Móyiis narok Aharoŋ :
« Urok gayooŋ guleeh Isirayeel peepe gucik Acehériit mee mara ajanjam balolobooreriil. »
10 Nan Aharoŋ ammee nelob nꞌgayooŋ guleeh Isirayeel peepe,
to mee Acehériit mee nápurul nꞌfumooc fáamak nꞌerampaasa yaayu min aliigiil sembeool.
Ngúlowulo guñeer bu bo.
11 Acehériit mee narok Móyiis :
12 « Ijanjam baloloboorer guleeh Isirayeel.
Urogiil :
“Gárusa ge,
buguul bu fúcaho eluu,
mꞌbújom njitiñ mutiñ mucee jaram jipooñ.
No njibil mee émir mara ínje emmee Acehériit mee Atúuhauul.” »
13 Gárusa ganur gaagu,
upuu umeeeŋ nulohúl tan guyah mee síguuhiil upuus to tipa.
Bu mꞌbújom,
gamon gáamak nguwaloúl gugongeniil.
14 Nan bunak butebulo mee min gamon gaagu guloh,
waaf ucee uhiina nuref nogoor naŋ múlankiin nuŋaño to nꞌetaam nꞌerampaasa yaayu.
15 Bugara Isirayeel nguñow waaf waawu,
nguloloboor gurok :
« Taŋ dáaru waa ?
»,
mara gúmirut waaf buu.
Móyiis narogiil : « Dáaru mutiñ man Acehériit mee asenuul mee bu futiñ.
16 Bare aroge :
“Mbil anooan nafor wabil mee etook bu nu ho,
naciib gábef bu nꞌfukowóokow.
Ho be efor wabil mee etook bu nꞌanooan an dó mee nꞌyaŋool.” »
17 Guleeh Isirayeel ngukaan naŋ min arogiil mee.
Gucee ngufor meeŋ,
bugaagu ngufor rehoor.
18 Bare nan gujow mee guciib baforeriil,
gafor mee meeŋ bajut wabenenoe,
min gafor mee rehoor bajut wáŋesuloe.
Anooan afofor wabilool mee etook bu futiñ.
19 Móyiis narogiil :
« Jambil an abaŋ haani waaf káŋ bu mꞌbújom. »
20 Bare guceeiil gukaanut wan Móyiis arogiil mee,
ngubaŋ káŋ bu mꞌbújom.
Wan gubaŋ mee nuput jaram uloh bápus.
Ñeer Móyiis náñigen bu mꞌbugo.
21 Bújomoojom,
anooan nja afofor wan abil mee éjuh atiñ.
Nan nja bunak búsup mee,
waforuti mee bu gasaano.
Funak fara gáyolen
22 Nꞌfunak fakaan mee futok nu fanur,
wan guforulo mee kankaan mutiñaay gunak gúruba,
anooan úbef úruba.
Unafaan gayooŋ gaagu ngújool gugaan Móyiis.
23 Narogiil :
« Acehériit mee aroge :
“Gajom funak fulako,
fara gáyolen.
Fúmbaam.
Jisow wan jibil mee esow,
njiñul wan jibil mee eñul.
Waŋaño mee,
njibaŋ wo bu gajom.” »
24 Ngubaŋ waŋaño mee bu gajom naŋ min Móyiis arogiil mee,
bare upuhut,
ulohut bápus.
25 Móyiis narogiil :
« Jaat funak fulako,
funak fara Acehériit mee.
Jitiñ wan jiŋañen mee,
mara mat jiñow jaat mutiñ maamu tíyaŋ.
26 Buguul be efor mutiñ maamu wátiiŋe gunak futok nu fanur.
Bare fakaan mee futok nꞌgúruba,
fo fara fulako,
mat jitook bo waafóowaaf. »
27 No nꞌfunak fakaan mee futok nꞌgúruba,
gucee dó nꞌgayooŋ gaagu gujojow be efor mutiñ maamu.
Bare gutoogut bo haani waaf.
28 Acehériit mee narok Móyiis :
« Káŋ bu néy njibile efoy elobom son ekaan wan ilobuul mee ?
29 Jijok mara ínje Acehériit mee isenuul funak faafu fara fulako.
Yo ecil mee nꞌfunak fakaan mee futok nu fanur,
nisenuul mutiñ bu nꞌgunak gúruba.
Jilako tan jommee.
Nꞌfunak fakaan mee futok nꞌgúruba,
haani an jambil ápur nꞌyaŋool. »
30 Ñeer bugara Isirayeel ngúyolen nꞌfunak fakaan mee futok nꞌgúruba.
31 Bugara Isirayeel ngurok mutiñ maamu Maan (yo yommee :
dáaru waa ?)
Mutiñ maamu munogoonogoor naŋ mooh mareref.
Muhiinahiina mmúsuum naŋ epankeet yabaje múkum.
32 Móyiis narok :
« Acehériit mee aroge :
“Mbil jiŋar mutiñ maamu butum gábef,
jibaŋ búfaen bu mꞌbúbajumuul,
mo bugo be eñow mutiñ buu nisenuul jitiñ nꞌerampaasa yaayu nan ípurenuluul mee nꞌEsípt.” »
33 Ñeer Móyiis narok Aharoŋ :
« Uŋar fúpalaŋ min ukaan dó mutiñ maamu,
nubaŋ fo fácil Acehériit mee mimbil kaan búfaen ban gambacóogambac gam bo néjool gújuhe guñow. »
34 Aharoŋ nakaan wan Acehériit mee arok mee Móyiis,
nabaŋ fúpalaŋ faafu fara búfaen to tan gubaŋ mee uwala wan guyuhoum Atúuha gusaferi mee.
35 Ñeer bugara Isirayeel ngutiñ mutiñ maamu wátiiŋe símit gafaŋ gúruba (40) jaram gútiiŋ mꞌmof macinicin.
Yo yommee gutintiñ mo jaram gútiiŋ nꞌélinga yara mof mara Kanaan.
36 (Uciibum wara úbef,
wan guroge mee omer,
woono guñen be ekaan gaciibumiil gan guroge mee efa.)