Bugara Esípt nguteylen bugara Isirayeel
14
Acehériit mee narok Móyiis :
2 « Urok bugara Isirayeel gúbaañul guhomenoor fácil Pihahiroot etuhoor Migedol son fal faafu.
Njiyihen síguuhuul sijooŋoor Baal-Sefoon nꞌgahaja gara fal faafu.
3 Firawuna be ejok bugara Isirayeel ubugu bo ngulilioore mꞌmof maamu ban erampaasa yaayu elimbeniilimben.
4 Injé Acehériit mee be ekaan nꞌFirawuna balas min ateylenuul.
No ñeer nibilool mee eliik sembeom bu mꞌbuganool ró min anooan asalom.
Bugara Esípt be émir mara ínje emmee Acehériit mee.
» Ñeer bugara Isirayeel ngukaan wan Acehériit mee alobiil mee.
5 Nan gugaan mee áyiih aahu mara bugara Isirayeel gutetey gúpur,
Firawuna mꞌbuganool gagongenool mee nguloloboor gurok :
« Taŋ buu nunaaŋooraal maa maa nukahenaal bugara Isirayeel min gujow ?
Mat gukaan ñeer emiigeelolaal. »
6 Firawuna nakok sisarehool,
nahomen buganool,
7 nacaap sisaret sareg mee batakajomet sammee siceme futok nu yanur (600),
naŋar may saasu sisaret sara futiik sara Esípt peepe :
esarehóosaret nꞌutiiga yo.
8 Ñeer Acehériit mee nakaan nꞌáyiih aahu balas min alagen bugara Isirayeel gápur mee mawaayene.
9 Bugara Esípt nguteylen bugara Isirayeel jaram gutoogiil tan guhomenoor mee nꞌgapana fal faafu.
Sisaret saasu sara Firawuna,
nꞌutiigaool mꞌbugara sipilinj saasu peepe ngútiiŋ Pihahiroot fácil Baal-Sefoon tan bugara Isirayeel gommee.
10 Nan Firawuna aciguliil mee,
bugara Isirayeel ngúraahulo,
nguŋanden bugara Esípt gon gateylenuliil.
Ngúsebi máamak,
nguyah sikaaw bu nꞌAcehériit mee,
11 ngúlowulo bu mꞌMóyiis ngurogool :
« Mo Esípt gubajut guyaak gatootook ecil mee nuŋarulóli mbil ucet baabe nꞌerampaasa ye ?
Waa ucile núpurenuloli nꞌEsípt ?
12 Nan oomaal mee nꞌEsípt,
urogirok ukahóli nukaan emiigeel bugara Esípt,
mara yo ekolo'óli ecet baabe nꞌerampaasa ye. »
13 Móyiis násuupiil arogiil :
« Jambil jísebi !
Jiyiho tan jommee njiñow min Acehériit mee abil mee gapagenuul jaat.
Bugara Esípt gan jiñow mee mee jaat,
mat jimus jiñowiil benen.
14 Jambil an agoroor ;
Acehériit mee bu futiik bu mꞌbuguul. »
Atúuha nakaan bulago dó nu fal faafu
15 Acehériit mee narok Móyiis :
« Waa ucile nukaawúl bu baabe nꞌínje ?
Urok bugara Isirayeel guyuho min jijow.
16 Bare aw,
uteb egoli nuñuhen yo ejooŋoor fal faafu nujis fo nꞌetut,
mbaj bulago mbuhay min guleeh Isirayeel gujow dó nꞌgoohiil.
17 Min ínje,
be ekaan balas mꞌbugara Esípt ngulagenuul mꞌbúsol.
No ñeer nibil mee eliik sembeom Firawuna,
nꞌutiigaool búroomiil,
nꞌsisarehool,
mꞌbugara sipilinj.
18 Bugara Esípt be émir mara ínje emmee Acehériit mee nan ibil mee eliik sembeom nꞌFirawuna bu nꞌsisarehool mꞌbugara sipilinj ró. »
19 Ñeer amalayika hara Atúuha aameen mee fácil bugara Isirayeel,
nábaañul alako mꞌbúsoliil.
Fumooc faafu may falakoeen mee fáciliil,
nfúbaañul fulako mꞌbúsoliil,
20 nfúginden etuhoor bugara Esípt mꞌbugara Isirayeel.
Fumoocemmoocen gapana gacee,
nfuŋanten gaagu gapana nu fuk.
Nu fuk faafu búroom fo,
bajut gájuhe gutook gupaaliil.
21 Móyiis nañuhen gañenool bu nu fal faafu.
Acehériit mee náfuuhen nu fal faafu érus yáamak yápurulo nꞌgápurum tinak nu fuk faafu búroom fo,
mal maamu mmujiso nꞌetut,
mbaj bulago bahahay.
22 Guleeh Isirayeel ngujow dó nꞌgoohiil nꞌetut fal faafu.
Mal maamu mmuyiho naŋ guteep nꞌgañen gárib son gañen gamay.
23 Bugara Esípt nguteyleniil ;
sipilinj sara Firawuna peepe,
sisaret saasu mꞌbugara sipilinj saasu ngulageniil mꞌbúsol káŋ bu dó nꞌetut fal faafu.
24 Bare nan jow mee jaram bunak bújooŋoor gakahen,
Acehériit mee dan ammee nꞌfumooc faafu son sambun saasu,
nañeerúl utiiga bugara Esípt,
nakaaniil min gúruujoor.
25 Nakajen gugang sisarehiil jaram gújuhut guteylen so.
Ñeer bugara Esípt ngurok :
« Uteyaal min ukuhiaal bugara Isirayeel,
mara Acehériit mee nayayab gámuy gaagu mꞌbugo min atiigenolaal. »
26 Acehériit mee narok Móyiis :
« Uñuhen gañeni gujooŋoor fal faafu min fúbaañul fuloh mꞌbugara Esípt,
nꞌsisarehiil bu mꞌbugara sipilinj saasu ró. »
27 Móyiis nañuhen gañenool bu nu fal faafu.
Bu mꞌbújom,
mal maamu mmubaañ naŋ min mulakoeen mee.
Bugara Esípt galako mee etey,
ngubaañ gon nꞌetut fal faafu,
Acehériit mee nanimeniil dó.
28 Mal maamu mmuguben sisaret saasu,
mꞌbugara sipilinj saasu,
nꞌutiiga Firawuna peepe ganogen dó mee nu fal faafu bu galagen bugara Isirayeel.
Haani an hanur apagut.
29 Bare guleeh Isirayeel gútitip nꞌetut fal faafu goohiil baboojut mara fuyuhoyuho naŋ guteep gúruba,
faafu nꞌgañen gárib,
faafu nꞌgañen gamay.
30 Maa Acehériit mee apagen mee nꞌfunak faafu ufu bugara Isirayeel nꞌguñen gara Esípt.
Bugara Isirayeel nguñow siñalen bugara Esípt nꞌgabereberef fal faafu,
31 ban nguñow mara Acehériit mee nꞌsembeool natiigene bugara Esípt.
Ñeer bugara Isirayeel ngúsebi Acehériit mee,
ngúyinenool,
ngúyinen may Móyiis ammee ájagagaool.