Adama
Fúcihum dúniya
1 1 Nꞌfúcihum faafu Atúuha átuutuut fatiya nꞌetaam.
2 2 Etaam yaayu yoomensoon gúuh-gúuh ban waafóowaaf uleheenut dó.
Kaanenkaan fal fáamak fájupojupo ;
moocemmooc bíp.
Búyeget Atúuha nja bujawooreen fatiya mal maamu.
3 3 Ñeer Atúuha narok :
« Maŋantoe mubaj !
» Mbaj maŋantoe.
4 4 Atúuha nañow mara maŋantoe maamu mujajak ;
nafanjen mo son emooc yaayu.
5 5 Atúuha narok maŋantoe maamu « tufunak »,
min emooc yaayu « fuk.
» Mbaj gárusa,
mbaj bújom ;
nkaan funak fútiyaara.
6 6 Atúuha narok :
« Baj muwuŋ mabile ejis mal maamu nꞌetut. »
7 7 Ñeer Atúuha nakaan muwuŋ maamu min mufanjen mal maamu.
Maamu fatiya,
maamu nꞌetaam.
Mbajo.
8 8 Atúuha narok muwuŋ maamu « émit.
» Mbaj gárusa,
mbaj bújom ;
nkaan funak fúruten.
9 9 Atúuha narok :
« Mal maamu mammee nꞌetaam muhomenoor tin tanur min mof maamu múpurul » ;
nkaan mo.
10 10 Atúuha narok mof maamu « etaam »,
min mal maamu narok mo « fal.
» Atúuha nañow mara jajak.
11 11 Atúuha nabaañ arok :
« Etaam épurenul wabaj mee utoj :
étuuhuur yabaje eruugiit yo,
son bununuk banooban ban eruugiit bo yon dó mꞌmutiñ bo.
» Mbajo.
12 12 Etaam yaayu népurenul wabaj mee utoj :
gátuuhuurootuuhuur eruugiit go,
bununugóonunuk mutiñ bo son eruugiit bo.
Atúuha nañow mara jajak.
13 13 Mbaj gárusa,
mbaj bújom ;
nkaan funak fúfaajiten.
14 14 Atúuha narok benen :
« Mujigenum mubajo nꞌémit mabile gápajul fuk nꞌtufunak nkaan múfaasum mañum mee eliik nan ugaan waawu ubile ekaan,
nꞌgunak gaagu son símit saasu.
15 15 Dan mubil mee gáani nꞌémit,
mmuŋantenúl etaam yaayu.
» Mbajo.
16 16 Atúuha nátuut mujigenum máamak moono múruba.
Mareg mee baruuk mmuŋar tufunak,
min mareg mee barehoor bu nu fuk.
Nátuut may siwuut.
17 17 Nabaŋ mo fatiya nꞌémit mimbil muŋanten etaam yaayu,
18 18 mmuŋar fuk son tufunak,
mmufanjen maŋantoe maamu son emooc yaayu.
Atúuha nañow mara jajak.
19 19 Mbaj gárusa,
mbaj bújom ;
nkaan funak fubaaligen.
20 20 Atúuha narok benen :
« Sínunkureŋ siroŋ dó nꞌfal faafu nsimeeŋ jaram fúrepo,
min upuu úyihoor etuhoor émit nꞌetaam. »
21 21 Ñeer Atúuha nátuut sínunkureŋ sáamak sara fal son sínunkureŋ peepe sateoore mee dó nu mal maamu sábuto'oore jaram sírepen fal faafu.
Nátuut may upuu úbuto'oor.
Atúuha nañow mara jajak.
22 22 Atúuha násoonien so min arok :
« Jibugoor,
njimeeŋ jaram jipuusen fal faafu,
upuu waawu may numeeŋ nꞌetaam yaayu. »
23 23 Mbaj gárusa,
mbaj bújom :
nkaan funak futogen.
24 24 Atúuha nabenen arok :
« Etaam yaayu ebaj wanoowan warondoŋ wábuto'oore :
sikaj,
sínunkureŋ sáamak,
son sáriita sáfuuloore mee ;
síbuto'oor.
» Mbajo.
25 25 Ñeer Atúuha nátuut sínunkureŋ sáamak sara etaam sábuto'oore,
nꞌsikaj sábuto'oore son sáriita sáfuuloore mee síbuto'oor.
Atúuha nañow mara jajak.
26 26 Atúuha narok :
« Utúuhaal an anogoor naŋ alaal mimbil waaf waawu peepe wóoni nꞌguñenool :
bucaaŋen baabu bara nu fal,
upuu waawu,
sikaj saasu,
etaam búroom yo son sínunkureŋ sáfuuloore mee. »
27 27 Ñeer Atúuha mꞌbúnogoorool nátuuhe bugan
ngunogoor nu ho,
amaañen nꞌakoña nátuuhe.
28 28 Atúuha násoonieniil arok :
« Jibugoor,
njimeeŋ jaram jipuusen etaam yaayu njiken yo.
Bucaaŋen ban dó mee nu fal faafu,
upuu waawu son sínunkureŋ saasu peepe sammee nꞌetaam,
dó peepe bu gáani nꞌguñenuul. »
29 29 Atúuha narogiil :
« Nisenuul wabaj mee utoj nubaj eruugiit nꞌetaam yaayu peepe son may bununuk banooban babaje sooh dó mꞌmutiñ bo.
Dó peepe múcahoaayuul.
30 30 Nisen may wabaj mee utoj úfuutuut bu nꞌwaaf waawu peepe waroŋ mee mimbil ufoop :
sínunkureŋ peepe sara etaam,
nꞌupuu waawu peepe son sínunkureŋ peepe sáfuuloore mee.
» Mbajo.
31 31 Ñeer Atúuha nañow mara wan akaan mee peepe ujajak pak.
Mbaj gárusa,
mbaj bújom.
Nkaan funak fammee futok nu fanur.
32 1 Atúuha maa nafaak mee étuut émit nꞌetaam son wan dó mee peepe.
33 2 Atúuha nafaak gújagagool nꞌfunak fakaan mee futok nu fanur,
fakaan mee futok nꞌgúruba náyolen.
34 3 Atúuha násoonien funak fakaan mee futok nꞌgúruba ;
nakaan fo funak foola,
mara no náyolen mee ho bafaager étuut waaf waawu peepe.
35 4 Waawe ubaj mee nan émit nꞌetaam sítuuhi mee.
Funak fan Acehériit mee Atúuha átuut mee émit nꞌetaam,
36 5 bajut ununuk wariilulo son étuuhuur mara Acehériit mee Atúuha akaanerut émit min elubúl ban bajut an abile enaaf etaam yaayu.
37 6 Bare mbaj mal nak múfuyul nꞌetaam mmuboojen yo peepe.
38 7 Acehériit mee Atúuha naŋar mof nateep amaañen.
Náfuuhenool nꞌéñundu érus yara buroŋ,
min amaañen aahu akaan an arondoŋ.
39 8 Acehériit mee Atúuha nakaan ekunko nꞌEden ban bunak búpureul mee min abaŋ dó amaañen aahu han ateep mee.
40 9 Acehériit mee Atúuha nakaan etaam yaayu min bununugóonunuk búriilul dó,
mbubaj mutiñ matiilenie ban mmúsuum futiñ.
Nꞌetut ekunko yaayu nariilen dó may ununuk úruba.
Baabu bo bucil mee buroŋ,
baabu mbucil émir wajak mee son wafeegut mee.
41 10 Mbaj fal fápurulo nꞌEden min nak fuboojen ekunko yaayu ;
to nfulanden mee uyahen woono ubaagiir.
42 11 Gayahen gátiyaara gurok go Pisoŋ :
go gugongen mee mof mara Hawila dan éwuruus yaayu yommee.
43 12 Ewúruus etakajom yon dó mꞌmof maamu,
mbaj dó may esantiñaajo son élankiin éjanet néjuuk cém.
44 13 Gayahen gáruten gurok go Gihoŋ :
go gugongen mee mof mara Kúus.
45 14 Gayahen gáfaaten gurok go Tígir :
go guteye mee ban bunak búpureul mee nꞌésuk yara Asúur.
Gabaaligen gaagu,
go nguroge mee Afúrat.
46 15 Acehériit mee Atúuha naŋar amaañen aahu abaŋ dó nꞌekunko yaayu mbil anaaf nacookoor yo.
47 16 Acehériit mee Atúuha narok amaañen aahu :
« Ujúhe utiñ mutiñ mara ununuk waawu búroom wo wammee nꞌekunko yaayu,
48 17 bare bununuk bara émir wajak mee son wafeegut mee,
jambil utiñ mutiñ bo.
Mara funak fan ubil mee futiñ mo,
aw be ecet. »
49 18 Acehériit mee Atúuha narok :
« Jagut mimbil amaañen alako noonool.
Injé be esenool áliyena han gubile ganafaoor. »
50 19 Acehériit mee Atúuha naŋar mof nateep sínunkureŋ saasu peepe sara futaŋaat son upuu waawu peepe,
náŋarul wo bu to nꞌamaañen aahu min añow bu nañum wo ewook,
mimbil wanoowan wammee mꞌburoŋ nubaj gajow gan amaañen aahu akaan wo mee.
51 20 Amaañen aahu nakaan ujow bu nꞌsikaj saasu peepe,
sínunkureŋ sara futaŋaat peepe son upuu waawu peepe.
Bare bu nu ho,
añowut áliyena han gubile ganafaoor.
52 21 Ñeer Acehériit mee Atúuha nabet amaañen aahu gaŋot gáamak.
Dó nꞌgaŋot gaagu,
Acehériit mee Atúuha naŋar gafeef ganur nꞌamaañen aahu afaak,
nabaañen eluu yaayu naŋ min yoomeen mee.
53 22 Acehériit mee Atúuha naŋar gafeef gaagu gan añagulo mee nꞌamaañen aahu min ateep akoña afaak,
naŋarulool bu to nꞌamaañen aahu.
54 23 Ñeer amaañen aahu narok :
« Yooo !
Kindiŋ an umue naŋ ínje !
Uwuulool nꞌínje núpurulo ;
eniinool nꞌínje népurulo.
Ume alaal be erogool “akoña” mara nꞌamaañen nateepia. »
55 24 Yo ecil mee amaañen be épur mꞌpaayool nꞌjaaool najow acin bugo nꞌakoñaool min gukaan an hanur.
56 25 Amaañen aahu bugo nꞌakoñaool márubaiil sifatalak ngulakoe ;
gúmirut ñisuu.
Acehériit mee nakam nꞌekunko Eden amaañen nꞌakoña
57 1 Tooge enaab erege báluho sínunkureŋ saasu peepe sara futaŋaat san Acehériit mee Atúuha átuut mee.
Funak fucee,
nerok akoña aahu :
« Maregen Atúuha aroguurok jambil jitiñ mutiñ mara ununuk waawu peepe wara ekunko ye ? »
58 2 Akoña aahu násuup enaab yaayu arok yo :
« Haani !
Elí utiñetiñ mutiñ mara ununuk wara ekunko ye.
59 3 Bare mara mutiñ mara bununuk bammee nꞌetut ekunko yaayu,
Atúuha arogólirok :
“Jambil jigor jambil jitiñ,
mo mat jicet.” »
60 4 Enaab yaayu nerok akoña aahu :
« Let maregen !
Mat jicet.
61 5 Atúuha námimir mara funak fan jiñum mo mee futiñ,
buguul bu gáliyo njóoni naŋ ho,
njímir wajak mee son wafeegut mee. »
62 6 Ñeer akoña aahu nañow mara mutiñ mara bununuk baabu mujajak,
be ésuum futiñ ban mmunogoor naŋ néeni utiñ mo,
bu gáluho.
Nafogo mo,
nábajul atiñ,
nasen may araaŋool an to mee nu ho atiñ.
63 7 Márubaiil ngúliyo,
nŋantoiil to bújooŋoor ngúmir mara sifatalak ngooma.
Nguŋar utoj wáamak guliir min gubonnoor.
64 8 Nan jírus jara gárusa jitegulo mee,
ngujam Acehériit mee Atúuha najawoore dó mee nꞌekunko yaayu.
Ñeer amaañen aahu bugo nꞌakoñaool ngukoop Acehériit mee Atúuha nꞌununuk wara ekunko yaayu.
65 9 Acehériit mee Atúuha nawook amaañen aahu min arogool :
« Aw úmey ? »
66 10 Násuupool arogool :
« Ijanjam gaweli dó nꞌekunko yaayu.
Ñeer min emmee efatalak nísebi.
Nitey ikoop. »
67 11 Acehériit mee Atúuha narogool :
« Ay agaani mara aw efatalak ?
Mo nutiñe mutiñ mara bununuk baabu ban ífireni mee ? »
68 12 Amaañen aahu násuupool arogool :
« Akoña aahu han usenaam mee,
ho asenaam mo itiñ. »
69 13 Ñeer Acehériit mee Atúuha narok akoña aahu :
« Waa ucile nukaan mo ?
» Akoña aahu násuupool arogool :
« Enaab yaayu ebantenaam min itiñ mo. »
70 14 Ñeer Acehériit mee Atúuha narok enaab yaayu :
« Nemma nukaane mee,
aw déhooro nidankae nꞌsínunkureŋ sara futaŋaat son sikaj saasu ;
aw bu gáfuuloor nꞌfari nutiñ mof mꞌburoŋi búroom bo.
71 15 Be ekaani búlahoor etuhoori nꞌakoña aahu,
nꞌetuhoor búbajumi son boola.
Búbajumool be efumi fukow aw nuŋaap bo nꞌfutonj. »
72 16 Acehériit mee Atúuha narok akoña aahu :
« Aw néeni on eŋar búteb aw be eyok máamak,
min non nebaj aleeh aw be eyok.
Gacameni be efareni bu nꞌaraaŋi,
bare ho be eheeki. »
73 17 Atúuha narok amaañen aahu :
« Nemma nujame furim akoñai min utiñ mutiñ mara bununuk ban ífireni mee,
bakaaneri bafeegut mee bucicil niranka mof maamu.
Mꞌmutaf nubile ebaj fúcahoi mꞌburoŋi búroom bo.
74 18 Etaami be eriil ununuk wabaje unuk son mafos mafeegut ban étuuhuur yara urager ebile gáani mutiñi.
75 19 Nꞌésupai nubile fúcaho káŋ bu nan ubile ebaañ bu mꞌmof man iteepi mee.
Aw kum mof,
ban aw be ebaañ oono mof. »
76 20 Amaañen aahu Adam nakaan akoñaool gajow arogool Ewa (yo yommee :
aroŋ mee) mara ho ammee jaw bugan peepe garoŋ mee.
77 21 Acehériit mee Atúuha nakaan usabadóor wara gabaŋ asen Adam bugo nꞌakoñaool gukaano.
78 22 Acehériit mee Atúuha narok :
« Maareer an ámirulomir wajak mee son wafeegut mee naŋ alaal.
Jambil ukahaalool nañuhen gañenool be ebaj mutiñ mara bununuk bacil mee buroŋ.
Néeni atiñ bo,
ho be eroŋ bu nanoonan. »
79 23 Ñeer Acehériit mee Atúuha nápurenool nꞌekunko yammee nꞌEden min ajow be enaaf etaam yan Atúuha aŋar mee nateepool.
80 24 Nan akam mee amaañen aahu afaak,
nabaŋ nꞌgápurum tinak ekunko yaayu simalayika sipooya san guroge mee « Karubiim » sayekene úkundu.
Ukúndu waawu nak úlowuloor nuyij wap bu gapooy bulago baabu bajow mee bu mꞌbununuk bacil mee buroŋ.
81 12 Bakaaner an hanur ammee Adam bucile min júnube enogenúl nꞌdúniya ban júnube yaayu néŋarul ecet.
Maa ecet yaayu egor mee bugan gaagu peepe mara búroomiil ukaana síjunube.
82 13 Júnube epii bo nꞌdúniya bala Atúuha asen Móyiis fuyuhoum faafu.
Bare Atúuha ajogeenut júnube waaf mara fuyuhoum faafu fubajoeenut.
83 14 Haani mo,
kábiriŋ Adam bu mꞌMóyiis,
ecet yaayu eliiliik bugan gaagu sembe sara yo,
haani min bugo peepe gukaanut mee júnube naŋ Adam hajamut mee furim Atúuha.
Ban Adam bálandiŋ bara an aahu abil mee éjool.