2
हेरोदेस राजा गा दिनेन जब यहुदिया गा बैतलहम गेन यीशु गा जन्म डाके, मेटे पूर्व टे भविष्य मिंकू यरुशलेम गेन हेन्डो कोकाम्बारा लाज्जे | 2 कि यहुदिया गा राजा जेगा जन्म दायेन मेणा होय, तोटेन होय? चोयाकी आलेणी पूर्व गेन दियागा इफील डोगे होय येथा दिच्के प्रणाम दडा हेन होय | 3 येते आजुम्ते हेरोदेस राजा येथा दिच्के साथोन सारा यरुशलेम हिघरा मेना ? 4 येथा दिच्नी कुरकु गा सेबाई महायाक येथा शास्त्री के म्याखठ्ठा दाटे दिकु टे कोम्बराके कि मसीह गा जन्म तोटेन दाउवा | 5 दिकुनी दिच्के मंदिके, यहुदिया गा बैतलहम गेन; चोयाकी भविष्य वाणी गेल्ला ओल्के होय ? 6 कि हे बैतलहम, जो यहुदा गा देशोन होय. आम तुनिका रिती टे यहूदा गा अधिकारी गेन सेबाई टे सानी बाणे; चोयाकी आपे तालाते म्याकोम अधिपती ओठ्बा, जो इंजगा प्राजा इस्राएल गा जागलेवा होय | 7 मेटे हेरोदेस नी भविष्यवाणी गा उखू टे हाकोटे दिकू टे कोम्बाराके, कि इफील साही तुनी टेमो डोके मेणा डा | 8 येथा दिच्नी इनी मांडीते दिकुके बैतलहम कुल्केकू, कि सेने दि सानी गा बारेण साही साही पता कोम्बाराये येथा जब देतेन घाटायेन टासो मेटे इंज्के खाबोर घाल्ली टाकी इंज भी हेजेवा डो दिच्के प्रणाम मेजबा! 9 दिकू राजा ग बातो आजुम्ते ओले मेना, येथा डोगे दि इफील दिकुनी पूर्व कोनेन डोकेनेच मेना, देतेन डेगा सम्मा सम्मा ओले येथा तोटेन सानी डा|दि जागा गा माठान पोचातींज टे रुकातीन्जे || 10 दि इफील के दोटे दिकू ठायका खुशेन मेना ? 11 येथा दि उरान पोचातींज टे दि सानी के दियागा आन्टे मरीयाम गा साथोन डोकेनेच, येथा नंगासाब लाज्जे दिच्के प्रणाम केनेच; येथा आपणा झोरा खुल्लाके डो दिच्के सोना, येथा लोबान, येठा गन्धरास गा भार पेडेच्के! 12 येथा साप्ना गा इनी चेतावणी जिते कि हेरोदेस गा मेराण येथा बाकी सेने, दिकू दुसरा कोराटे इकुगा देशोन ओले मेणा | 13 दिकू गा सेने बदोन डोगे, प्राभू म्या दूत नी साप्ना दोटे युसुफ बेन डोकेनडो मांदिके, बिडे; दि सानी के साटे डो येथा दियागा आन्ते के साटे मिस्रा देशोन साडूपजू; येथा जब आमटे बाण मांडी, तब टायेन डीघान का थांडळे; चोयाकी हेरोदेस इनी सानी के घगाटा लाक्के होय कि दिच्के घोजेजबा होय, 14 देतेन रातो का बिद्जे डो डी सानी के साटे दियागा आन्ते के साटे मिस्रा कोनेन ओले | 15 येथा हेरोदेस गा घुजू टायेन डीघान का ठंडळकु; इनी घांजी कि देतेन जो वचन प्रभू नी भविष्यवाणी गा गेल्ला मांदिके दा कि इंज नी आपणा कोन्के मिस्रा हाकोकेनेच पुरायेन होय|* 16 जब हेरोदेस नी इनी डोके, कि भविष्यवाणी कुणी इंजा साथोन माजक उडातींजके होय. मेटे देतेन खीजोटे भेट्तेन; 17 येथा कुरकु के कुलते भविष्यवाणी मिन्कुते साही साही कोम्बाराके टेमो गा रोन्गो बैतलहम गा डेगा आसो पासो सेबाई पोट्टाकु के जो दो साल गा डा, देतेन दियाते सानी डा. घोच्के कु मेना | 18 कि रामह गेन म्या करूण-नद आजुम्के मेणा, जाम डो येथा खाटताकलीप राहेल आपणा चाफनिकू गा घांजी जाम लाक्के डा, येथा शांती लाक्के मेणा डा, चोयाकी डीकू होय, बाने || 19 हेरोदेस गा घुजू बादोन डोगे, प्रभू गा दूत नी मिस्रा गेन युसुफ के सापनान दोटे मांदिके | 20 कि बिडे डो, डी सानी के साटे दिया आन्ते के साटे इस्राएल गा देशोन सेन्जू; चोयाकी जो सानी जान सा लाक्के डा. डिच घोयेन होय | 21 देतेन बीटजे डो दि सानी के येथा दियागा आन्ते के साटे इस्राएल गा देशोन हेन | 22 पेनो इनी आजुम्ते आरखीलायुस आपणा बाटे हेरोदेस गा जगह यहुदिया लीन्जेन राज्य दाडा लाज्जे होय, देतेन सेनेगा हिघ्रायेन; येथा साप्ना गेन चेतावणी जिते गलील देशोन ओले मेणा | 23 येथा नासरात जीमू गा नगरेन ओलेडो थंडळ लाज्जे; ताकी देतेन वचन पुराउ गा, जो भविष्यवाणी गा गेल्ला मांदिके डा, कि देतेन नासरी मंदीवा ||