Yakuba 2

Ka walum ikaba mburma ya tsa

1 A kurum gà damər gà, na kàa gəsum Yesuw Kiristi BATSAH kwa ŋana a za gà dukw tserdze, tì zlibe a dər a ka, ka ta walum ikaba mburma ya tsa. 2 Na bəla gà mburma sula tàa daha a ga Mbulum kurum, misle ŋgiɗ mala limana, petek ikəka lele, matsərəɗ gura i ɓəza ahər, biy na tsakala ŋa hinne, à sìkim a ba tsiye. Ama misle ŋgiɗ aaha ka, mala matawak, ŋgat a daha ka, gà manəsa petek masakəŋa taf na ikəka ya. 3 Dite kurum ka, ki zlìbwim a à mala petek aaha lele, ki gweɗwimer a: «Dara, ndza iɗəm aka təv mendze ŋgwal ŋa a faha ya.» Ama mala matawak ka, ki gweɗwimer a, «Kər ka, daha, ndza a bəɗ a faka, kige tsa, dara, ndza a bəɗ aà sik mə̀r a faha.» 4 Na ki welwim a ikaba mburma ya kataya ka, taŋa ki gwim a ka, bakal. Aɗaba ki gwim a taŋa ka, nda madzala gà gər ana ŋgwal ŋa tsiye.

5 Kurum gà damər gà ana i waya kurum hinne ya, tsarakum. Aɗaba Mbulum a pala gà ɓəzla matawak ata ika gər ahəɗ a ka, dite ta ŋgat dukw ana ŋgwal ŋa ya, agəra megìse ana ta gəs Yesuw Kiristi ya. Mbulum a ta vile a ter a mekwere Əbay ŋgar ana a gwa i sida ya, i ta vile a a gà mburma ana ta waya iye ya. 6 Ama kurum ka, ki fìrwim a aà gà ɓəzla matawak kamala za ya dze ana, meme? Aɗaba gà Əbay gər ahəɗ na ti sèwèrewa a kurum are, ti de à kurum a aka miɗ seriye ya, tsəka, gà ɓəzla matawak tsa. 7 Dite tar asa tsiye na ti tsik a dukw ana ŋgwal ŋa tsa aà zləm ŋgwal ŋa ana Mbulum a ɗe a kurum dər a?

8 Na ki zezemwim a məpala ahəm nda ndzer kamala ana Mbulum a gwa i wakita ka: «Wayum mburma, kamala na kà wayum ba kurum a» ka, kàa gwim lele. 9 Ama na bəla ki welwim a ikaba mburma ya ka, ki gwim a taŋa ka, bakal. Seriye məpala ahəm Mbulum ata ka, aka gəs kurum. 10 Na wura a zezem a gà məpala ahəm Mbulum tserdze, ama aka məsak à biy ŋgiɗ ika magər ŋa ya ka, taŋa ka, aka nəs à gà asiŋ aaha tserdze ya mbaŋa. 11 Aɗaba Mbulum a gwa ka: «Ki ge muva tsa.» A gwa asa mbaŋa ka: «Kə̀ kəɗ mburma tsa.» Kamala taŋa ya, na bəla wura aka ge muva tsa, ama aka kəɗ mburma ka, kamala ana a ge muva ya. Aka nəs à məpala ahəm Mbulum ata fit dze, ku mege aka ge muva tsa tekeɗe ibam a. 12 Aɗaba taŋa i tsik a kurum ŋa, i təv gà bazlam ana ki ti tsikwim a ya, kige tsa, i təv gà dukw ana ki ta gwim a tserdze ya ka, mə̀ məts a kurum gər tsa, sərum dər ka, Mbulum a ta ge a kwe a seriye, a wiz aà kwiŋa, wànà kàa gekwa megemir məpala ahəm ŋgar ana a gwa, a sle a aà mibeye à kwa i seriye ŋgar a ibam a, tsəna kàa gekwa tsiye? 13 Na wura ɗa ika magər kwa, mburma a ndzer are tsehe tsəka, wur ata tekeɗe, i təv ana Mbulum a ta ger a seriye ya ka, a ndzer a are tsehe tsa mbeete. Ama na mburma aka ndzek are tsehe ka, kər tekeɗe, ki ti ndze a are tsehe a Mbulum ika miɗ seriye mbaŋa.

Magəsa Mbulum nda megemir ŋa

14 A kurum gà damər gà, na bəla wura a gweɗe a: «Iye ka, Yàa gəs Mbulum nda gəzləŋ ga», ama a ge a dukw ana Mbulum a tsik a tsəna, megìse ŋgar ata ana, a ger a ŋgulum, a mbil a à ŋgat ɓav a? 15 Bəla gà damər kurum a riŋ ika vatwa Mbulum, petek tar a riŋ tsa, nda gà dukw mezime tekeɗe, a riŋ tsa asa. 16 Dite bəla misle ŋgiɗ ika magər kurum a, a gweɗe a ter a: «Ndzum nda zay lele, Mbulum mi pise a kurum ahəm, mə vəl a kurum petek, nda dukw mezime», nda bazlam pəra, a sasar a vile a ter a biy ŋgar tsəna, taŋa ana, a ge a ŋgulum a? Awaŋ, a ge a ŋgulum tsa. 17 Kamala taŋa ya mbaŋa na i təv megìse ana ki giswim a Mbulum a. Na ki gwim a megemir ŋa tsəka, duwa a riŋ a ge a ŋgulum tsa.

18 Bəla wura a gweɗe a gà misle ŋgiɗ ka: «Tàa gəs Mbulum nda gəzləŋ tar, gà biy ŋgiɗ ibam, ta gewa gà dukw ana ŋgwal ŋa ya.» Ama i gweɗere a ka: «Ɗifiŋ à megìse yak ana kə̀ gəs Mbulum a, dite ka, ki gewa dukw ana ŋgwal ŋa tsiye asa ya. Iye tekeɗe ka, i ɗifek a à biy ga ana i gewa ŋgwal ŋa ya, dite kər ki sir a dər ka, Yàa gəs Mbulum a.» 19 Kər kə̀ gəs ana Mbulum ana ŋgat ilik a tsiye? Taŋa ka, lele. Ama kə̀la ka, gà sitene tə sər mbaŋa, ti dzedzeriŋa, ta ger a magəɗa hinne.

20 Kər ana metsehe yak a riŋ ba ya? Meme na ki ɗiŋ a à wur ana a gweɗe a: «Yàa gəs Mbulum», ama ka, a ge a dukw ana ŋgwal ŋa ya tsa, dze ana, wànà megìse ŋgar ata ana, a ge a ŋgulum a? 21 Fə̀rum kwaŋ, meme na Mbulum a gəs Abəraham tsir kwa ata kamala mburma ŋgar ŋgwal ŋa lele ya. Mbulum a gəs ŋgat ana, agəra megemir ana a ger a tsiye? Aɗaba akahər ata a zla Izak kəla ŋgar aà mekìɗè a Mbulum, a ne dər kamala dukw masakəŋa ya. 22 Kà sər mendze Abəraham ana a ndza ya. Ŋgat ka, a gəs Mbulum lele. Dite a ge dukw ana a sàs a Mbulum a mbaŋa. Dukw ana a ge ya ka, a ndəv à megemir Mbulum ana a gəs a. 23 Kamala taŋa ya na dukw ana i wakita Mbulum ta wetse ya kaɗəŋ. Ta gwa ka, «Abəraham a gəs bazlam ana Mbulum a tsikar a, nda gəzləŋ ŋgar lele. Dite na Mbulum a gəs ŋgat kamala mburma ŋgar a.» Aɗaba taŋa, mewetse ŋa a riŋ mbaŋa, na Mbulum a gəs masla nda Abəraham a. 24 Yawwa samatum, aɗaba mburma a ne a ŋgwal ŋa i təv Mbulum ka, nda megemir ŋa mbaŋa, tsəka, nda megìse ɗekɗek tsa.

25 Kige tsa, kamala dəm duwa muva ŋa, tə zalar Rahab a mbaŋa. A ne ŋgwal ŋa ika miɗ Mbulum ka, aɗaba ana a kaha gà ɓəzla meslire gà Yahuda ana tə daha ìzliɗ ìzliɗ aà masamata ikaba təv i kwite ata ya, aà gà ma ŋgar a. Aləka a ɗif a tar à vatwa ŋgiɗ pam, na dite ta beye a dər aà gà mburma ata ta waya magàsà tar a. 26 Ama ar ka, kamala ba mburma ya. Ba ana mesife iɗəm tsiye ka, a ge a ŋgulum tsa. Kamala taŋa ya, wur ana a gəs Mbulum nda gəzləŋ, dite ka, a ge a megemir ŋa tsiye ka, a ge a ŋgulum ɓav tsa mbaŋa.