Mege dukw ana a tsahən aà Mbulum a
13
1 Wayum ba ilik ilik tserdze ika magər kurum,
ma da aka miɗ aka miɗ,
aɗaba kurum ika vatwa Yesuw ka,
kurum nda gà damər.
2 Gwim gər a gà mbəlakw ana tə dawaha a təv kurum a,
ma ta məts a kurum gər tsa.
Gwim a tar gər lele.
Aɗaba gà misle ŋgiɗ akahər ata ka,
tàa ge ɗa gər a gà gawla Mbulum,
ama tə sər,
naha gà gawla Mbulum ka,
tə sər tsa.
3 Dzalum gà gər aka gà mburma ana i daŋgay a,
kamala ana kurum ka,
gà ɓəzla daŋgay i təv ilik ŋa nda gà tar a mbaŋa.
Dzalum gà gər aka gà mburma ana ta ge a ter a matawak a,
kamala ana kurum tekeɗe ka,
ta ge a kurum a matawak i təv ilik ŋa nda gà tar a mbaŋa asa.
4 Ku weke ta gəs ba nda məkəs ŋgar lele,
ta ge muva tsa.
Mburma tə̀ zlə̀b à tar.
Aɗaba Mbulum a ta ge a seriye aka gər gà na tàa gəs ba tsa,
ta gewa mezelme nda təv muva ya.
5 *Ki gwim meeweke siŋgwe tsa.
Ama ŋgeywim ba ka,
a dukw ana kə̀ ŋgatum a pəra.
Aɗaba Mbulum a gwa ka:
«I miyek a à kər tsa.
I yè a kər a dala tsidze.»
6 *Aɗaba taŋa,
kwa ihər ki mirekwe a aba dzəŋdzəŋ lele,
ki gweɗekwe a nda ndzer ŋa:
«Na a ne mala mezleke iye ka,
Mbulum.
I ge a magəɗa tsa.
Dukùla na mburma ŋa a giŋ a ya?»
7 Gà na tə lah meɗe a kurum à vatwa,
ti tsik a kurum bazlam Mbulum a ka,
tə ta məts a kurum gər tsa.
Dzalum gà gər aka mendze tar ana tə ndza ɗa ya,
dite meme na ta mata ya asa mbaŋa.
Zazamum ka,
megìse tar ana ta gəs Mbulum nda gəzləŋ a mbaŋa.
8 Yesuw Kiristi ka,
à mbìɗ a aba tsa.
Mendze ana ndavana ya,
ndəna mbakum a ka,
i təv ŋgar ka,
kalkal,
tə za ba tsa.
A ndze a ka,
haa aà biybiy.
9 Ka tə dzum zləm a gà dukw ana ti ɗif a kurum dər pampam,
dite a de a à kurum a ika vatwa kurum ana ndzer ŋa ya tsa.
Aɗaba ŋgwal ŋa ka,
na ki ŋgetekewe a ndzəɗa a gəzləŋ ɓəŋɓəŋ lele i təv ŋgwal Mbulum ana a ge a kwa ya,
tsəka,
məpala ahəm gà mburma ana ta gweɗe a,
zəm naha,
kige tsa,
ka zəm naaka tsiye ka,
taf masakəŋa.
Ki gwim gər a taŋa tsa.
Medzìbe gà mburma ata ti zezem a gà dukw ata ya ka,
a ge a ter a ŋgulum ɓav tsa.
10 Yesuw Kiristi aka mbər mivile ba ŋgar kamala dukw taf masakəŋa ya a Mbulum,
a mət aɗaba kwa.
Ama gà ɓəzla mandəva kuɗa a Mbulum gà Yahuda ana ta məts aà mege megemir i mekiriwe ga ata ta kiriw nda petek a ka,
məməta ŋgar ata a mət a ka,
a ge a ter a ŋgulum tsa.
11 *Aɗaba kurum kə̀ sərum,
*batsah mala mandəva kuɗa a Mbulum gà Yahuda ka,
a batsawa dukw taf masakəŋa a Mbulum,
aà məpəla dər à bakal a mburma.
A tə̀fawa məmbəz ŋa,
a de a dər a dzə̀ɓər ga Mbulum ana i huɗ ŋa tsəɗaŋŋa ya.
Ama slu ŋana ka,
ti de a dər tsakàlàk aà ga ya,
a təv ana mburma a riŋ iɗəm tsiye.
Ta wene a i fata.
12 *Aɗaba taŋa,
Yesuw Kiristi tekeɗe,
a mət ka,
i huɗ kwite tsa.
Aka dara iɗəm a bəra ya mbaŋa.
A ge dər kataya ka,
aà məbara dər bakal aà gà mburma ya,
nda məmbəz ŋgar ata.
13 Aɗaba taŋa,
kwa tekeɗe ka,
say tàkwa a təv ŋgar a bəra a fata,
dite kə̀ gə̀sakwa ba nda gà ŋgat.
Ki gìsekwe a zìrìwe ana tə ndaɗa aaka ya mbaŋa.
14 *Aɗaba kwa ana ɗa ika gər ahəɗ a ka,
kàa ŋgatakwa təv mendze ana a ndze a aà biybiy a zukw tsa.
Ama kwa ihər ki yehekwe a ka,
na a dere a ika miɗ a mba ya.
15 Aɗaba taŋa kinehe ka,
zàmbaɗakwa à Mbulum kəla pat nda təv Yesuw.
Ma ne ka,
kamala dukw taf masakəŋa ana ki vilekwer a ya.
Kamala megweɗe ya ka:
Zlə̀bakwa à ŋgat,
ki tsikewekwe a zləm ŋgar a gà mburma kəla pat.
16 Mege dukw ana ŋgwal ŋa ya ka,
ma ta məts a kurum gər tsa,
zlakum ba lele.
Aɗaba taŋa na a ne dukw masakəŋa ana a tsahən aà Mbulum a.
17 Gəsum ahəm aà gà na tə lah a kurum aka miɗ i təv magəsa Mbulum a.
Dzum zləm a dukw ana ti tsik a kurum a ya.
Aɗaba tar ka,
gà ɓəzla makaslà kurum.
Aləka dzìrìk ta hitse a aka miɗ Mbulum,
ti tsiker a megemir tar ana ta geye ika gər ahəɗ a ya.
Na kàa gəsum aà tar ahəm ka,
ta ge a megemir Mbulum nda maŋgayaba ŋa.
Ama na kàa gəsum aà tar ahəm tsəka,
ta ge a megemir tar ka,
turtur nda arəv ŋa,
dite taŋa tekeɗe ka,
a ge a kurum a ŋgulum ɓav tsa asa mbaŋa.
18 Hamum a Mbulum kəla pat,
aɗaba mə̀r.
Mì sər ndzer,
madzala gà gər mə̀r aka da à mə̀r a mege bakal tsa.
Aɗaba a sàs a mə̀r,
mìi ge a ka,
dukw ana ŋgwal ŋa ya,
na i huɗ gà dukw ana mìi ge a tserdze ya ya.
19 *Iye ihər i ge a kurum a kamkam ndeyndey ka,
hamum a Mbulum aɗaba iye,
dite ka,
mi viliŋ vatwa aà məmbə̀ɗaha gər a təv kurum bise.
Mahàmà a Mbulum
20 Mbulum,
mala məvəla mandza zayzay a mburma,
a hitsera à Yesuw BATSAH kwa ŋa i məməta ya,
a ne dər batsah ŋa.
A kesle a kwa kamala mala makəva gà təmaŋ ana à kiv a tar a.
A ge dər kataya ka,
aɗaba məməta Yesuw ana a mət a.
Nda məmbəz ŋgar ana a dza dər a ka,
a gəs masla nda kwa,
dite na a de a aka miɗ aka miɗ,
à ndìv a tsiye.
21 I hemer a ka,
dite mà zlak kurum,
aà megemir ana ŋgwal ŋa tserdze,
a waya ki gwimer a ya.
Ŋgat ŋa nda gər ŋgar tekeɗe ka,
ma ge megemir i gəzləŋ kwa nda ahər Yesuw,
na dite mede kwa à tsehin ahər a ya.
Mezlibe ma ge ka,
biy Yesuw Kiristi aà biybiy.
*Amin.
Mandəvandəv bazlam
22 A kurum gà damər gà,
iye ihər i ge a kurum a kamkam:
Gəsum bazlam gà ana i tsik a kurum a ya,
nda maŋgayaba lele,
na dite a vile a kurum a ndzəɗa a gəzləŋ kurum a.
Aɗaba bazlam ana i wetse a kurumaha a wakita aaha ya ka,
zubul ŋa tsa,
ar ka,
kəla bazlam zaakwa pəra.
23 A sèsiŋ aà meɗife a kurum dər asa ka,
tàa pə̀lara à damər kwa Timute i daŋgay a.
Na mege aka ndzera a təv gà a faha ya bise ka,
mìi dehe a nda ŋgat məma,
na i təv ana i dehe a aà məfə̀rà aka kurum a.
24 Gwim wusa a gà bàba ŋa na ika magər kurum gà mburma Mbulum tserdze ya.
Ki gwim a gà mburma Mbulum ana tserdze ya mbaŋa asa.
Gà damər kwa ana ika ahəɗ Italiya ya,
ta ge a kurumaha wusa asa mbaŋa.
25 Mbulum ma ge a kurum ŋgwal ŋa lele,
a kurum ilik ilik tserdze.