Hadzalakwa ba agəra Batsah kwa ana à mère a ya
5
1 Gà damər mə̀r,
a ge a kurum a ŋgulum tsa,
na i wetse a kurumaha aka gər pat ana gà dukw ata ti ti ge a ba ya.
2 Aɗaba kurum nda gər kurum kà sərum lele,
pat ana BATSAH kwa ŋa a ta mère a ya ka,
paf tsara,
kamala mala akəl ana a de a a mege akəl ndaavəɗ,
sèrèh sèrèh wura a sir ahər a tsiye.
3 I təv ana gà mburma ta gweɗe a ka,
kwite mə̀r zayzay lele,
duwa a riŋ a ge a a mə̀r a tsiye ka,
tsaatsa taŋa ka,
tits nda medzeye ana a le aà tar a kuɗa.
Ti sle a aà mibeye iɗəm a tsidze.
A ne a ka,
kamala məkəs ana kəla i huɗ zìhhwe,
ndzawraw à dze ahər a ba tsara ka,
a we a ya.
4 Ama kurum kinehe ka,
kamala gà mburma ana i luvuŋ a asa tsa.
Aɗaba taŋa,
a pat ata ka,
ma ti le aà kurum kamala mala akəl ana a de a a bəra mburma ya tsa.
5 Aɗaba kurum tserdze ka,
gà mburma ana ta gewa duwa parakka i təv dzaydzay ŋa ndaapat a ivaɗ,
tsəka,
kurum gà mburma ana ta gewa duwa ndaavəɗ i luvuŋ a tsa.
6 Aɗaba taŋa,
ka tə ndzakwa ɓìlèffe ika mendze are kamala gà asiŋ gà mburma ŋgiɗ a tsa.
Ama kwa ka,
ndzakwa nda metsehe lele,
kwarakwa ba kwa ivaɗ.
7 Ndaavəɗ na gà mburma ti ndzewa are ya.
Dite ndaavəɗ asa mbaŋa na bagwal ŋa gà ɓəzla mekweye ta kwayawa aà guzum a.
8 *Ama kwa kinehe ka,
gà mburma ana mandza ŋa i təv dzaydzay ŋa ndaapat a,
tsəka,
kwa gà na i luvuŋ a tsa.
Aɗaba taŋa,
ka ta kwayakwa tsa,
say kwarakwa ba kwa lele,
tàkwa aka miɗ aka miɗ nda magəsa Yesuw Kiristi nda gəzləŋ kwa,
dite nda mawàyà ba ana ka wayakwa dər ba ika magər kwa ilik ilik tserdze ya asa mbaŋa.
Aɗaba mege dukw ata ka,
a ne kamala ana kà dùwayakwa ba nda *andiw sayaw,
na dite duwa a ndzekwe a asa tsiye ya.
Tikekwa madzala gà gər kwa ka,
aka pat ana Yesuw Kiristi a ta mbil a à kwa fit kweleŋ a.
Aɗaba ar ka,
kamala *tazak ana ti tikewa a gər i təv mege guvəl a.
9 Aɗaba Mbulum a pala kwa ka,
na dite a ta vile a kwe a mesewere are ya tsa.
Ama a pala kwa ka,
aà məmbala à kwa nda ahər Yesuw Kiristi BATSAH kwa ŋa ivaɗ.
10 Ŋgat a mət ka,
aɗaba kwa,
na dite ki ti ndzekwe a i təv ilik ŋa nda gà ŋgat a.
Ku mege kàa mbər mitekwa,
kige tsa ku mege kwa riŋ mandza ŋa nda are mba tekeɗe,
a pat ana à mère a ya ka,
ki ndzekwe a i təv ilik ŋa nda gà ŋgat.
11 Aɗaba taŋa,
mùm a baha à arəv,
kà zlakum ba ika magər kurum ilik ilik tserdze,
kamala ana kurum riŋ ihər ki gwim a gà dukw ata kinehe ya.
Mandəvandəv mifefile nda mege wusa
12 Gà damər mə̀r,
mə̀r ihər mìi ge a kurumehe a kamkam hinne:
Sərum ba nda gà na ta ge a megemir Mbulum ika magər kurum a.
Tar ka,
gà na BATSAH kwa ŋa a pala,
a dza aɗəm tar ika magər kurum,
dite ti ɗif a kurum à vatwa ŋgar a.
13 Zlə̀bum à tar,
ka wayum tar lele mbaŋa,
aɗaba megemir tar ana ta ge a agəra kurum a.
Kurum nda gà asiŋ gà mburma ŋgiɗ ana i təv mayahaba gər gà mburma Mbulum a tserdze,
ndzum ika magər kurum ka,
nda zay lele,
maàga ma ge iɗəm tsa.
14 Gà damər mə̀r,
mìi ge a kurum a kamkam asa:
Bwim à ɗaf a gà ɓəzla màsar ana ti ndze a taf masakəŋa ya.
Mùmaha à arəv a gà ɓəzla magəɗa,
dite kà zlakum gà na ndzəɗa tar a riŋ tsiye mbaŋa.
Gəsum gəzləŋ nda təv gà mburma tserdze,
kà yum ba ika miɗ mburma tsa.
15 Na wura aka ge a kurum dukw ana ŋgwal ŋa tsiye ka,
gwim metsehe,
ka ta mumar aɗəm à bakal ŋa tsa.
Ama hiywe geywim ba ka,
dukw ana ŋgwal ŋa ya ika magər kurum,
dite a gà asiŋ gà mburma tserdze mbaŋa.
16 Ŋgeyewim ba ka,
kəla pat.
17 Ka ta miyakum à mahàmà a Mbulum tsidze.
18 Ku mege ndeɗime tekeɗe ka,
gwim kəkaaha a Mbulum.
Aɗaba a sasar ka,
gwim kataya,
na kurum gà mburma ana mandza ŋa i təv ilik ŋa nda gà Yesuw Kiristi ya.
19 Ka ta palum ahəm a Mezite Mesife ŋgar tsa.
20 Dite ka ta fə̀rum aà bazlam gà na ta me a kurum a à guma Mbulum a ka,
kamala za ya tsa mbaŋa asa.
21 Dzikwim à gà bazlam ana mburma ti tsik a ya tserdze dzekwiŋ,
na dite ki sirwim a dər ka,
wànà a dara ana,
i təv Mbulum a ya,
tsəna,
pàrsa ya ya,
dite ka,
kà gəsum dukw ana kà lwim ahər iɗəm ŋgwal ŋa lele ya.
22 Ama ka,
miyakum à mege dukw bakal fit kweleŋ.
23 Mìi heme a a Mbulum ana a vile a kwe a matasla yam a gəzləŋ a,
na dite ki nwim a gà mburma ŋgar,
ki ndzwim a tsəɗaŋŋa kamala ŋgat ana a ndze a ya mbaŋa.
Dite ma kasla mesife kurum nda madzala gà gər kurum nda gà ba kurum ŋa tserdze,
na dite a pat ana Yesuw Kiristi BATSAH kwa ŋa à mère a ya ka,
bakal a ge a i təv kurum tsidze ya.
24 Mbulum ana a zal a kurum a,
na a ge a dukw ata kamala taŋa ya ya.
Aɗaba ŋgat ka,
a ge a dukw ana a gwa,
i ta ge a ya ndzer kaɗəŋ.
25 Gà damər gà,
hamum a Mbulum aɗaba mə̀r mbaŋa.
26 Gwim wusa a gà mburma Mbulum tserdze nda gəzləŋ ilik.
27 Iye ihər i ge a kurum a kamkam hinne,
nda zləm BATSAH kwa ŋa:
Ka dzeŋgwim wakita aaha a gà asiŋ gà mburma Mbulum ŋgiɗ tserdze mbaŋa.
28 Yesuw Kiristi BATSAH kwa ŋa ma ge a kurum ŋgwal ŋa aka miɗ aka miɗ.