Dukw ana a tsahən aà Mbulum a
4
1 Gà damər gà,
dukw ana a zeha mìi tsik a kurum a ya ka,
araha:
Akahər ana àvə̀ɗaka mì ɗif a kurum ka,
à mede ana a tsahən aà Mbulum a.
Araha kaɗəŋ,
mì sər ka,
mede kurum aka ne kamala taŋa ya.
Ama kinehe ka,
mì ge a kurumaha kamkam hinne,
nda zləm Yesuw BATSAH kwa ŋa:
Zazamum ka,
mede ata hiywe,
səkahum dər aka miɗ aka miɗ asa.
2 Aɗaba kurum kà sərum,
mì ɗif a kurum ka,
à dukw ana Yesuw BATSAH kwa ŋa a gwaɗa a mburma,
gwim a.
3 Aɗaba taŋa,
dukw ana Mbulum a waya ka,
nwim gà tsəɗaŋŋa ika miɗ ŋgar.
Kamala megweɗe ya ka,
ki gwim mezelme nda təv muva tsa.
4 Taŋa ku mege weke ika magər kurum ka,
tə ndza nda məkəs ŋgar ndaka vatwa ŋa lele,
kamala ana a tsahən aà Mbulum a,
mburma tə ta ŋgat vatwa aà məma à kurum a bakal tsidze.
5 Ki ndzwim a nda gà tar ka,
kamala meeweke ba kurum ana ŋgwala tsa,
dzə̀lùwùwùrwùr a kwere a kurum a tsa.
Aɗaba na a gewa kamala taŋa ya ka,
gà mburma ana tə sər Mbulum tsiye.
Ama kurum ka,
ki gwim dər kamala taŋa ya tə tsa.
6 Wura ilik ma ta ge bakal,
a ge a wirwir aà damər ŋgar a nda təv məkəs ŋgar a tsidze.
Aɗaba BATSAH kwa ŋa a ta vile a mesewere are ka,
a gà na ta gewa gà medzibe gà dukw bakal ata kamala taŋa ya.
Mì be a kurum à ɗaf,
mì tsik a kurum aba taŋa ya ka,
daga piŋŋe.
7 Aɗaba Mbulum a zal a kwa ka,
aà mege mezelme tsa.
A zal a kwa ka,
na dite ki nekwe a gà tsəɗaŋŋa ika miɗ ŋgar a ivaɗ.
8 Aɗaba taŋa,
na wura tətstəts aka raraɗaba ahər a zləm,
a waya mandza zləm a bazlam ata tsəka,
a niw taŋa ka,
bazlam mburma tsa.
Ama a niw ka,
biy Mbulum,
wele ana a vəl a kurum Mezite Mesife ŋgar ana tsəɗaŋŋa ya ivaɗ.
9 Gà damər mə̀r,
a ge a ŋgulum tsa na i wetse a kurumaha aka gər mawàyà ba kurum ana,
ki weywim a gà asiŋ gà damər kurum a.
Aɗaba Mbulum nda gər ŋgar na a ɗif a kurum à mawàyà ba ata ya.
10 Haya kaɗəŋ,
kamala taŋa ya,
kurum ihər ki weywim a gà mburma Mbulum ana ika ahəɗ Makaduniya ya tserdze mbaŋa.
Ama ka,
mìi ge a kurum a kamkam hinne asa,
na dite mawàyà ba kurum ata ki weywim a ba ya,
à sìkèh a aka miɗ aka miɗ a.
11 Mərum aba lele,
na dite mendze kurum ana ki ndzwim a ya ka,
zayya a ge a ŋgwal ŋa ya.
Dzalum aka gà dukw kurum lele.
Gwim megemir nda ahər kurum ŋa,
kamala ana mì tsik a kurum akahər ata ya.
12 Na kàa gwim dər kataya ka,
gà na tàa gəs Yesuw Kiristi nda gəzləŋ tar zukw tsiye,
ti zlibe a à kurum.
Dite kurum tekeɗe,
dukw mezime kurum riŋ mbaŋa,
ki ŋgeleywim a aba duwa ya ɓav tsa asa mbaŋa.
Pat ana Yesuw BATSAH kwa ŋa à mère a ya
13 Gà damər mə̀r,
a sàs a mə̀r ka,
sərum duwa aka gər gà məməta.
Aɗaba arəv ma ta da aà kurum a kamala gà na ta veve a Yesuw tsiye tsa.
14 Kwa ka,
kà sərakwa ndzer,
Yesuw aka mət,
dite i dəba ŋa ya ka,
Mbulum a mbəlara à ŋgat i məməta ya.
Kamala taŋa ya tekeɗe,
sərum dər ka,
gà na tàa gəs Yesuw nda gəzləŋ tar a,
aləka tàa mata ka,
Mbulum a ta mbilere à ter a i məməta ya kataya mbaŋa,
na dite ti ndze a i təv ilik ŋa nda gà Yesuw a.
15 Kamala taŋa ya,
duwa ma wise a kurum gər tsa.
Aɗaba a pat ana BATSAH kwa ŋa à mère a ya ka,
gà na tàa mata ya,
ti ne a gà ɓəzla dəba ika kwa ana kwa riŋ mandza ŋa nda are ya ɓav tsidze.
I tsik a kurum taŋa ka,
dukw ana BATSAH kwa ŋa a ɗif dər à gər ŋgar a.
16 A pat ata ka,
Mbulum à fèfil a nda magala ŋgəlakəkka,
na dite dukuməŋa à dze ahər a ba ya.
Əbay ana ika magər gà gawla Mbulum a,
a zeliŋa,
dite ta vèt a mezleliŋ Mbulum mbaŋa.
I dəba ŋa ya ka,
BATSAH kwa ŋa a terre a i gər ŋa i mbulum a kuɗa.
Dite gà mburma ana ta mata ya,
tàa gəs ŋgat nda gəzləŋ tar a ka,
tar na ti lèh a aà mimbilera i məməta ya.
17 I dəba ŋa ya asa ka,
Mbulum a yehe a kwe a gər,
a kwa ana kwa riŋ mandza ŋa nda are ya,
à dzik akaba a kwa a təv ŋgar nda hulɓukw.
Kamala taŋa ya,
kwa tserdze ki ti lìmekwe a nda gà BATSAH kwa ŋa i gər ŋa i fata,
ki ndzekwe a i təv ŋgar aà biybiy kuɗa.
18 Aɗaba taŋa,
màyum baha à arəv nda bazlam ata ika magər kurum ilik ilik tserdze.