Ruma 7

Məpala ahəm a kwere a kwa asa tsa

1 A kurum gà damər gà, kurum kà sərum gà məpala ahəm tserdze ka, lele. Ama kà sərum asa ka, məpala ahəm a ŋget a ndzəɗa aka gər mburma ka, say aka ana ŋgat a riŋ aà bəra mba ya ɗekɗek pəra. 2 I ɗif a kurum a dər aka gər mendzikiɗe ba məkəs ana i bəra zal ŋgar a. Na bəla zal ŋgar a riŋ nda are mba ka, a viler a vatwa, dite mi miyak à ŋgat, ma da a zal ŋgiɗ tsa, aɗaba məpala ahəm Musa a viler a vatwa tsa. Ama na zal ŋgar aka mət ka, a sle a aà mada a zal ŋgiɗ kuɗa, aɗaba wura a peler a ahəm asa tsa, aka be iɗəm a. 3 Kamala taŋa ya, na bəla zal ŋgar a riŋ nda are mba hiywe, dite a miyek a à ŋgat, a de a a zal ŋgiɗ ka, aka ge muva na taŋa ya. Ama na zal ŋgar ata aka mət ka, a ziwe a gər ŋgar kuɗa, ku mege ma da a zal ŋgiɗ asa tekeɗe ka, aka ge muva, aka nəs à məpala ahəm asa tsa. 4 Gà damər gà, i təv kurum tekeɗe, kamala taŋa ya mbaŋa. Kurum mandza ŋa ika miɗ məpala ahəm Musa ka, kamala ana kurum ka, gà məməta ŋa ya. Ama kinehe ka, məpala ahəm ata a ge a ndzəɗa aka gər kurum asa tsa, aɗaba ana Yesuw Kiristi a mət ka, avukw kurum a. Kamala taŋa ya, kà nwim ka, gà biy ŋgar, kamala məkəs ata a ne biy zal masula ŋana ya. Wele ata ka, na Mbulum a mbəlara à ŋgat i məməta ya ya. Aɗaba taŋa, kinehe ka, ki slekwe aà mege a ŋgulum a Mbulum nda megemir kwa ana ki gekwer a ŋgwal ŋa ya kuɗa. 5 Akahər ana kà zazamawakwa madzala gà gər kwa ɗekɗek mba ya ka, məpala ahəm a ɗifewa a kwa dər, naha ka, bakal. Ama i təv ana a ɗifewa a kwa dər kamala taŋa ya ka, kà wayakwa dər akaba mege bakal ata seyiŋ ivaɗ. Gà dukw ata gà ŋgwal ŋa tsiye ivaɗ na ta kwara ba kwa fit kweleŋ a. Kamala taŋa ya, ki gewakwa ka, dukw ana a de à kwe a a məməta ya. 6 Akahər ata ka, kwa gà ɓele məpala ahəm. Ama kinehe ka, Mbulum aka mbùrùɗara iɗəm kwa ya. Kwa ka, kamala gà məməta ŋa ya, na ika miɗ ŋgar a. Aɗaba taŋa kinehe kwa ihər ki zezemekwe a Mbulum ka, ndaka vatwa ana awiya ŋa ya, kamala ana Mezite Mesife ŋgar a ɗif a kwa dər a. Tsəka, ki zezemekwe a ndaka vatwa miviye ŋa ata, kamala ana mewetse ŋa a riŋ i wakita məpala ahəm ata ya asa tsa.

Gà məpala ahəm nda bakal

7 Kamala taŋa ya, ki gweɗekwe a kinehe dze ana, meme? Wànà məpala ahəm Musa ka, dukw bakal a? Awaŋ, kataya tsa. Ama na mege məpala ahəm Musa a riŋ tsəka, ana ka, ki sirekwe a aba i bakal a tsa. Na mege məpala ahəm ata ma gwa ka, ka ta ge are aka dukw mburma tsa, tsəka, ana ka, ki sir a ikaba à medzibe bakal ata ya tsidze. 8 Ama i təv ana kà tsarakawakwa məpala ahəm ata ya ka, bakal a yahawa vatwa i ba kwa, na dite kà dzalawakwa aà mege are aka gà duwa pampam hinne kuɗa ya. Na mege məpala ahəm a riŋ tsəka, bakal tekeɗe, ndzəɗa a ge a ihər tsa. 9 Akahər ana kà sərakwa məpala ahəm zukw tsiye ka, kà ndzawakwa kataya pəra, mewìsè gər a riŋ tsa. Ama i dəba ŋa ya, kà tsarakukwa məpala ahəm ka, bakal tekeɗe, a pàt aba i fata ya kuɗa, 10 dite na kà matawakwa ya. Mbulum a tsik a kwa ka, məpala ahəm ŋgar ana ki ŋgetekewe a dər mesife zləmana ya. Ama ka, a zla a kwara məməta ya ivaɗ. 11 I təv ana kà tsarakukwa məpala ahəm ata ya ka, bakal a yahawa vatwa aà məbànà kwa, dite kàa gekwa ka, a bets a kwa kuɗa.

12 Kamala taŋa ya, məpala ahəm a dara ka, i təv Mbulum a. Gà məpala ahəm ŋgar ana tserdze ya ka, tsəɗaŋŋa. Ar ka, ŋgwal ŋa lele, duwa manəsa ŋa iɗəm kwizikw tsidze. 13 Dite na kataya ana, dukw ata ŋgwal ŋa lele ya, na a bats kwa ya ivaɗ a? Awaŋ, kataya tsa. Ama ka, dukw bakal na a bets a kwa ya ivaɗ. Aɗaba dukw bakal ata a ge megemir nda dukw ŋgwal ŋa ata, a bets a dər kwa ya. A ge ba kataya ka, na dite kà sərakwa dər lele, naha ka, bakal kaɗəŋ a. Aɗaba Mbulum a tsik məpala ahəm ŋgar ata ka, a sasar na bakal mə pàt aba ndərzayya kamala dukw ana ŋgwal tsa ndeyndey a ya.

Ki slekwe a mezìwè gər kwa tsa

14 Kà sərakwa ndzer, məpala ahəm a dara ka, i təv Mbulum a. Ama kwa ka, gà mburma taf masakəŋa ɗekɗek pəra, kà nekwa kamala gà ɓele bakal a. 15 Kamala taŋa ya, dukw ana ki gekwe a ya ka, kà sərakwa tsa. Aɗaba dukw ana a sàs a kwa aà mege ya ka, ki gekwe a taŋa tsa ivaɗ. Ama ki gekwe a ka, dukw ana a sàs a kwa tsiye ivaɗ asa. 16 Ama na bəla ki gekwe a ka, dukw ana a sàs a kwa tsiye ka, taŋa ki gweɗekwe a, məpala ahəm ka, dukw ana ŋgwal ŋa ya. 17 Kamala taŋa ya, i təv ana ki gekwe a dukw ana ŋgwal ŋa tsiye ka, kwa nda gər kwa tsa na ki gekwe a taŋa ya, ama bakal ana mandza ŋa i ba kwa ya na a ge a ya. 18 Kà sərakwa lele, i təv kwa gà mburma taf masakəŋa aaha ka, duwa a riŋ ŋgwal ŋa ilik tsidze. Kà wayakwa mege dukw ana ŋgwal ŋa ya ndzer, ama ka, ndzəɗa kwa a sle tsa. 19 Say ki gewakwa ka, dukw ana ŋgwal ŋa, a de a kwe a a gər a tsa. Ki gekwe a ivaɗ ka, dukw ana ŋgwala tsa, a tsahən aà kwa tsiye. 20 Ama na bəla ki gekwe a dukw ana ŋgwal ŋa tsa, a sàs a kwa aà mege tsiye ka, kwa nda gər kwa tsa, na ki gekwe a taŋa ya. Na a ge a dukw ata ka, bakal ana mandza ŋa i ba kwa ya.

21 Kamala taŋa ya, dukw ana i samata a gewa ba i təv kwa ya ka, araha: Na bəla a sàs a kwa mege dukw ana ŋgwal ŋa ya ka, tsaatsa ki gekwe a ka, dukw bakal ɗekɗek pəra. 22 I gəzləŋ kwa ka, a sàs a kwa mazazama məpala ahəm Mbulum nda maŋgayaba ŋa kaɗəŋ. 23 Ama i samata asa ka, duwa ŋgiɗ a riŋ i gəzləŋ kwa na a ge a guvəl aà madzala gà gər kwa ana ŋgwal ŋa ya ya. Aɗaba dukw ata ŋgwala tsa i gəzləŋ kwa ya ka, à gis a kwa aà mege bakal, kamala ana kwa gà ɓele ŋgar a. 24-25 Kamala taŋa ya, kwa nda madzala gà gər kwa ka, a tsahən aà kwa na ki zezemekwe a məpala ahəm Mbulum a. Ama nda mege dukw ana ki gekwe a ya ka, tsaatsa a sàs a kwa ka, mazazama dukw bakal ivaɗ. Kwa ka, wiyak masakəŋa, waya ba kwa ya. Ki metekwe a dər akaba nda gà bakal kwa pəra. Weke na a sle a aà məmburdwara kwa ika vatwa ata ya kuɗa ya? Ki gekwe a kəkaaha ka, a Mbulum nda gəzləŋ kwa ilik, aɗaba ŋgat na a mbil a à kwa nda ahər Yesuw Kiristi BATSAH kwa ŋa ya.