Ruma 6

Kwa gà məməta ŋa i bakal kwa, ama kàa mbəlakwa

aɗaba Yesuw Kiristi

1 Na kataya dze ana, dite ki gweɗekwe a kinehe ana, meme? Ki sìkèhekwe a à mege bakal ivaɗ, na dite Mbulum a ge a kwe a ŋgwal ŋa, à sìkèh a kwe a dər a ya? 2 Awaŋ, kataya tsa. Aɗaba kà nekwa ika miɗ bakal ka, kamala ana gà məməta ŋa ya. Dite dze ana, meme na ki mèkwe a aà mandza i bakal asa ya? 3 Kurum kà sərum te tsiye, i təv ana ti tsilwiɓ à kwa a yam a ka, kàa nekwa ilik nda gà Yesuw Kiristi, kamala megweɗe ya ka, kàa matakwa akaba nda gà ŋgat na taŋa ya. 4 Aɗaba i təv ana ti tsilwiɓ à kwa a yam a ka, ka matakwa akaba nda gà ŋgat, dite ti le akaba kwa a biye nda gà ŋgat mbaŋa. A ge ba kataya ka, na dite kwa tekeɗe, Mbulum Tsir kwa a vile a kwe a mesife awiya ŋa ya, kamala ana a mbəlara à Yesuw Kiristi i məməta ya, nda ndzəɗa ŋgar ana a za duwa tserdze ya mbaŋa.

5 Kaɗəŋ, na kàa matakwa akaba nda gà ŋgat ka, kwa riŋ mandza ŋa i təv ilik ŋa nda gà ŋgat. Aɗaba taŋa na Mbulum a ta mbil a kwa i məməta ya, kamala ana a mbəl à ŋgat a mbaŋa ya. 6 Kà sərakwa lele, i təv ana Yesuw Kiristi a mət aà dizl magə̀làwà ŋa ya ka, Mbulum aka ndwandway ahər mendze kwa ana ŋgwala tsa, kà ndzawakwa ɗa miviye ŋa piŋŋe ya mbaŋa. A ge dər kataya ka, dite mendze kwa ata ma dzeye iɗəm a. Taŋa ka, ka ta gə̀sakwa ahəm aà bakal kamala ana kwa gà ɓele ŋgar a asa tsa. 7 Aɗaba na wura aka mət ka, bakal a sle a aà makwàrà ŋgat asa tsa. 8 Ama na kàa matakwa akaba a təv ilik ŋa nda gà Yesuw Kiristi kamala taŋa ya ka, ki sirekwe a ndzer, kwa nda gà ŋgat ka, ki ti ndzekwe a nda gà mesife mbaŋa. 9 Aɗaba kà sərakwa ndzer asa ka, Yesuw Kiristi ŋgat a mbəlara i məməta ya, a ta mite a asa tsa, aɗaba ana məməta à mbè ahər a asa tsiye. 10 I təv ana a mət a ka, a mət aɗaba bakal mburma sik ilik, tsam ka, aka ndəv. Ama kinehe ka, aka mbəlara i məməta ya, ŋgat a riŋ mandza ŋa nda gà mesife i təv Mbulum. 11 Kamala taŋa ya, kurum tekeɗe, fə̀rum aà ba kurum ka, kamala ana kurum gà məməta ŋa ya na i təv mege bakal a mbaŋa. Ama sərum dər, kurum a riŋ mandza ŋa nda gà mesife ika miɗ Mbulum ka, aɗaba mendze kurum ana i təv ilik ŋa nda gà Yesuw Kiristi ya.

12 Aɗaba taŋa, ka ta vəlum vatwa a bakal, dite ma kwara ba kurum asa tsa. Ka tə zazamum gà meeweke ba kurum ana ka wayum mege ya ɓav tsa asa mbaŋa. Aɗaba sərum dər, ba kurum ka, sifìleh a ndze a hinne tsa. 13 Kamala taŋa ya, ka ta vəlum ba kurum a ahər a bakal, ma kwara kurum aà mege dukw ana ŋgwala tsiye asa tsidze. Ama vəlum ba kurum a ahər ka, a Mbulum ivaɗ. Aɗaba kurum kà nwim ka, kamala gà mburma ana tàa mbəlara i məməta ya, tàa ŋgat mesife ana awiya ŋa ya. Vəlumar ba kurum a ahər fit, na dite ki nwim a dukw ahər ŋgar aà mege dukw ana ŋgwal ŋa ya ya. 14 Aɗaba taŋa, bakal ka, a sle a aà makwàrà kurum asa tsa, aɗaba ana ki dzelwim a gà gər aka məpala ahəm Musa, dite ma ne à kurum gà ŋgwal ŋa ika miɗ Mbulum asa tsiye. Ama ki dzelwim a ka, aka ŋgwal Mbulum ana a ge a kurum a.

Kwa kinehe ka, gà ɓele bakal asa tsa

15 Ama kinehe ka, kwa i ahər məpala ahəm Musa asa tsa. Kwa ka, i ahər ŋgwal Mbulum ana a ge a kwa ya, na a kwara kwa ya. Dite ki gweɗekwe a dze ana, meme na kinehe ya? Na kataya ana, wànà kà mətsakwa ana, aà mege bakal hiywe pəra ya? Awaŋ, kataya tsidze. 16 Kurum dze ana, kà sərum ti tsiye? Na bəla kàa vəlum ba kurum a wura, ki gweɗwim a, mìi gis ahər a ahəm ka, kàa nwim gà ɓele ŋgar na taŋa ya. Na bəla kurum ihər ki giswim a ahəm aà bakal ka, taŋa ka, kàa nwim gà ɓele bakal dukw ŋgar. I dəba ŋa ya ka, ki metwim a agəra bakal ata. Kige tsa na bəla kurum riŋ ihər ki giswim a ahəm aà Mbulum ivaɗ ka, kurum gà ɓele ŋgar na taŋa ya mbaŋa, dite ka, a ne à kurum a gà ŋgwal ŋa ika miɗ ŋgar. 17 Ama ka, ki gekwe a kəkaaha a Mbulum ivaɗ. Aɗaba piŋŋe ka, kurum gà ɓele bakal. Ama kinehe ka, kàa gəsum ahəm aà Mbulum, kàa gəsum dukw ana ndzer, ti ɗif a kurum dər a ka, nda gəzləŋ ilik. 18 Kurum ka, gà ɓele bakal asa tsa, Mbulum aka beyera iɗəm à kurum a. Kàa nwim gà ɓele ŋgar aà mege dukw ana ŋgwal ŋa ya. 19 Iye ihər i fèfil a kurum a aka gər gà ɓele ata ka, aà meɗìfè a kurum dər, na dite ki tserekwim a, a ge a ŋgulum a, aɗaba kàa tsarakum gà dukw ata lele zukw tsa. Piŋŋe ka, kà vəlum ba kurum fit aà mege dukw ana ŋgwala tsiye ya. Kàa geyewim gà bakal pampam hinne, Mbulum aka ŋgaya dər ba tsidze. Kamala taŋa ya, kinehe tekeɗe, vəlum gà dzerisl ba kurum fit aà mege dukw ana ndzer ŋa ya, na dite mendze kurum à tsehin a aà Mbulum a.

20 Aɗaba akahər ana kurum gà ɓele bakal mba ya ka, duwa a riŋ aka fàr aka kurum ndzəɗa aà mege dukw ana Mbulum a waya ya tsidze. 21 Dite akahər ana ki gewim dukw ana ŋgwala tsiye dze ana, kə ŋgatum dər là? Na gà dukw ata ta maya a kurumara à gər a kinehe ka, hwarwa a ge a kurum a hinne, aɗaba mege gà dukw ata ka, mburma ta mete a dər ivaɗ. 22 Ama kurum kinehe ka, gà ɓele bakal asa tsa, kàa beywimera iɗəm a. Kàa nwim gà ɓele Mbulum kuɗa. Aɗaba taŋa, dukw ana kə ŋgatum i təv ŋgar a ka, a ne à kurum gà tsəɗaŋŋa, na dite ki gwimer a dukw ana a tsahən ahər a ya. Dite aka mandəvandəv ŋana ka, ki ŋgetwime a dər mesife ana à ndìv a tsa aà biybiy a. 23 Aɗaba na wura aka ge bakal ka, à mite a dər. Məməta ŋgar ata a ne ka, kamala dukw mayaba ŋgar a. Ama Mbulum, ŋgat a vilekwe a ka, mesife ana à ndìv a tsa aà biybiy a, biy taf masakəŋa. Kə̀ ŋgatakwa ka, aɗaba ana kwa mandza ŋa i təv ilik ŋa nda gà Yesuw Kiristi BATSAH kwa ŋa ya.