Ruma 4

Megìse Abəraham ana Mbulum a ne dər à ŋgwal ŋa

ika miɗ ŋgar a

1 Meme na kà dzalakwa gà gər aka Abəraham, batsah tsir kwa ana akahər ata ya. Ki gweɗekwe a aka gər ŋgar dze ana, meme? A ge dze ana, dukùla? 2 Na mege Mbulum a ne à ŋgat ŋgwal ŋa ika miɗ ŋgar, agəra mege dukw ana a ge ŋgwal ŋa ya ka, ana ka, a ŋget a vatwa aà masə̀ŋgə̀rà à ba ŋgar ika miɗ Mbulum. Ama ka, aka ŋgat dukw ana à sìŋgìr a dər à ba ŋgar ika miɗ ŋgar a tsa. 3 Ar ka, kamala ana mewetse ŋa a riŋ i wakita Mbulum a, ta gwa: «Abəraham ka, aka gəs Mbulum nda gəzləŋ ŋgar.» Aɗaba taŋa na Mbulum tekeɗe, a ne à ŋgat ŋgwal ŋa ika miɗ ŋgar a. 4 Kà sərakwa dər, na bəla wura a riŋ a ge a megemir a mburma ka, i dəba ŋa ya, ta viler a duwa, aɗaba mege megemir ŋgar ata a ge ya. Ama ta viler a ka, dukw megemir ŋgar, tsəka, biy ana dukw taf masakəŋa ya tsa. 5 Ama i təv Mbulum ka, kataya tsa. Na wura aka gəs Mbulum nda gəzləŋ ŋgar, dite a ge a zlapa nda megemir ŋgar ana a gewa ya tsəka, taŋa ka, Mbulum a ne a à ŋgat ŋgwal ŋa ika miɗ ŋgar. Aɗaba ŋgat a zla vatwa ata ka, aà mene à gà ɓəzla bakal a gà ŋgwal ŋa ika miɗ ŋgar. A ge taŋa ka, biy taf. 6 Dawda tekeɗe, a tsik kamala taŋa ya mbaŋa. Akahər ana a fàfəl aka gər maŋgayaba gà mburma ana Mbulum a ne à tar gà ŋgwal ŋa ika miɗ ŋgar a ka, aka ɗama megemir tar ana ta ge ya tsidze. 7 A gwa ka:

«Maŋgayaba i təv gà na tàa tike megemir tar

ana ta gewa ya, aà ahər tsa,

ama Mbulum aka pəl a tar à bakal tar,

a beye à tar i dukw ana ŋgwala tsiye ya.

8 Maŋgayaba gà asa ka,

i təv gà na Mbulum BATSAH kwa ŋa

a ɗeme a ter a bakal tar tsiye.»

9 Dukw ana Dawda a tsik i faha ya, a sasar aà megweɗe ana, gà mburma ana gà masasa ŋa ya ɗekɗek a, na ti ta ŋgeye a ba ya? Awaŋ, gà na gà masasa ŋa tsiye tekeɗe ka, ti ta ŋgeye a ba mbaŋa. Aɗaba kàa mbər metsikikwa, Mbulum a ne à Abəraham ŋgwal ŋa ika miɗ ŋgar ka, agəra ana a gəs ŋgat nda gəzləŋ a. 10 I təv ana Abəraham a ne ŋgwal ŋa ika miɗ Mbulum ana, aka sàs ba ya, tsəna, aka sàs ba zukw tsiye? Ama kà sərakwa, akahər ata ka, aka sàs ba zukw tsidze. 11 Aka ana Abəraham aka sàs ba ŋgar zukw tsiye ka, Mbulum aka ne à ŋgat ŋgwal ŋa ika miɗ ŋgar, aɗaba ana a gəs ŋgat nda gəzləŋ a. Dite i dəba ŋa ya, Mbulum na a gwaɗar ka, sàs ba kuɗa ya. Masasa ba ŋgar ata a sàs ba ya, a ɗif dər a mburma ka, na dite tə sər dər, Abəraham aka ne ŋgwal ŋa ika miɗ Mbulum kaɗəŋ a. Kamala taŋa ya, na Abəraham a ne tsir gà na ta gəs Mbulum nda gəzləŋ tar a tserdze, ku mege tàa sàs ba tsa tekeɗe ya. Mbulum a ne à ter a gà ŋgwal ŋa ika miɗ ŋgar ka, kamala ana a ne à Abəraham ŋgwal ŋa ika miɗ ŋgar a mbaŋa. 12 Abəraham ka, a ne tsir gà mburma ana gà masasa ŋa ya mbaŋa kaɗəŋ. Ama kəla ka, say na ti zezem a kamala Abəraham a, dite ta gis a Mbulum nda gəzləŋ kamala ana ŋgat a gəs akahər ata ka, aka sàs ba ŋgar zukw tsiye mbaŋa.

Nda magəsa gəzləŋ na mburma a ŋget a dukw ana

Mbulum a tsik a

13 Kamala taŋa ya, Mbulum a tsik i sida ya, akahər ata ka, a gwaɗa a gà Abəraham nda gà ɓəza ŋgar: «I ta vile a kurum a mekwere gər ahəɗ tserdze, a ne a biy kurum.» Mbulum a tsik taŋa ka, aɗaba ana Abəraham aka zazam məpala ahəm ŋgar ata ya tsa. Ama a tsiker kataya ka, agəra ana a gəs ŋgat nda gəzləŋ a, na dite a ne à ŋgat ŋgwal ŋa ika miɗ ŋgar a. 14 Na mege gà na ti zezem a məpala ahəm Musa ya, ta ŋget a dukw ana Mbulum a tsik i sida ya, a gwa, i ta vile a ya ka, ana ka, megìse gà na ta gəs Mbulum nda gəzləŋ a, a ne a taf masakəŋa, a ge a ŋgulum tsa. Dite dukw ata Mbulum a tsik i sida ya, a gwa, i ta vile a ya tekeɗe ka, a ne a dukw taf masakəŋa mbaŋa asa. 15 Aɗaba məpala ahəm a ge a ka, dukw ana, dite matsəɓatsəɓ Mbulum a gis a dər gà na tàa zazam məpala ahəm ata tsiye ɗekɗek. Aɗaba ana məpala ahəm a riŋ tsəka, duwa a riŋ na ti nis a dər a tsa mbaŋa te.

16 Aɗaba taŋa na Mbulum a tsik i sida ya, a gwa, i ta vile a ka, a gà na ta gəs ŋgat nda gəzləŋ a ya. A ge dər kataya ka, aɗaba mburma tə sər dər, ŋgwal ŋgar ata a ge a ter a ya ka, biy taf masakəŋa. A vile a dukw ata ka, a gà ɓəza Abəraham tserdze, tsəka, a gà na a ɗif a tar à məpala ahəm Musa a ahər a ɗekɗek tsa. Ama a vile a a gà asiŋ gà mburma ana ta gəs ŋgat nda gəzləŋ tserdze kamala Abəraham ana a gəs a mbaŋa. Aɗaba Abəraham a ne ika gər kwa ka, tsir kwa tserdze. 17 Ar ka, kamala ana mewetse ŋa i wakita ya, Mbulum a gwaɗa a Abəraham ka: «I ne aà kər a batsah tsir mburma ika gər gà slàla pampam hinne.» Ŋgat a ne tsir kwa ika miɗ Mbulum ka, aɗaba ana a gəs Mbulum nda gəzləŋ ŋgar a. Aɗaba a sər, Mbulum ka, mala məmbə̀là à mburma i məməta ya, dite ŋgat asa ka, wele ana a ge dukw tserdze ka, duwa a riŋ zukw tsiye. A tsik a nda bazlam pəra, tsam ka, dukw ata a ge a ba.

18 Abəraham ka, a gəs Mbulum nda gəzləŋ ŋgar, a sər, Mbulum a ta viliŋ a kəla, ku mege aka ŋgat a dukuməŋa zukw tsa tekeɗe ya. A da aka miɗ aka miɗ nda metìkè madzala gà gər aka dukw ata i gəzləŋ ŋgar hiywe pəra, ku mege gà misle ŋgiɗ tə dzala, ta gwa, vatwa a riŋ asa tsa, na Mbulum a ge a dukw ana a tsik i sida ya, a gwa, i ta vile a ya. Kamala taŋa ya ka, Mbulum aka ge dukw ata kaɗəŋ, na dite ka, Abəraham a ne tsir gà mburma hinne kuɗa ya. Ar ka, kamala ana Mbulum a gwaɗar: «Gà ɓəza yak ti ta ge a riŋ ka, hinne, kamala gà mawusawus ana aà gəza mbulum a.» 19 Akahər ana Mbulum a tsik a Abəraham kamala taŋa ya ka, mive ŋgar aka à mege dərməka. A sər ka, ba ŋgar aka ge màndawal, dite Sara məkəs ŋgar ibam, aka ge màndawal herem herem, aka ndaha i mawà kəla ya asa mbaŋa. Ku mege kataya tekeɗe, a da aka miɗ nda magəsa dukw ana Mbulum a tsiker i sida ya, i gəzləŋ ŋgar ɓəŋɓəŋ lele, aka ya ba tsidze. 20 A sər ka, a ta ŋget a dukw ana Mbulum a tsiker i sida ya, a gwa, a ta viler a ya. Aɗaba taŋa, aka geye à gà gər ŋgar wakit wakit tsidze. Ama megìse ŋgar ana a gəs Mbulum nda gəzləŋ ŋgar a ka, a ŋgat ndzəɗa ika vatwa Mbulum ɓəŋɓəŋ lele ivaɗ, a zləbawa dər à Mbulum. 21 Aɗaba a ser ndzer, Mbulum a sle a aà mege dukw ata a tsiker i sida ya, a gwa, i ta viler a ya. 22 Aɗaba taŋa na ti tsik ahər, ta gwa ka: «Mbulum a ne à ŋgat ŋgwal ŋa ika miɗ ŋgar» a.

23 Ama bazlam ata ta wetse aba ya ka, aɗaba Abəraham ɗekɗek tsa. 24 Ta wetse ka, aɗaba kwa mbaŋa. Na kàa gə̀sakwa Mbulum ana ŋgat mala məmbə̀lara à Yesuw BATSAH kwa ŋa i məməta ya nda gəzləŋ kwa ka, a ne à kwe a gà ŋgwal ŋa ika miɗ ŋgar mbaŋa. 25 Yesuw ka, Mbulum a vəl ŋgat a ahər a mburma, na dite a mət aɗaba bakal kwa ya. I dəba ŋa ya ka, Mbulum a mbəlara à ŋgat i məməta ya, na dite ki nekwe a gà ŋgwal ŋa ika miɗ ŋgar a.