Ruma 3

Wura ilik a sle a aà məma à bakal a Mbulum tsa

1 Na kataya ana, wele ana ŋgat gà Yahuda ya, a ge a ŋgulum hinne, à zè a gà slàla ŋgiɗ ana tar gà Yahuda tsiye ya? Kige tsa, masasa ba tar ana tə sasayawa ba ya ana, a ge a ŋgulum hinne asa ya? 2 Ama ka, a ge a ŋgulum hinne aɗaba dukw tserdze kaɗəŋ. Aɗaba malahalah ŋa ka, Mbulum a ɗif à guma ŋgar a ahər a gà Yahuda. 3 I fata ya ka, kurum ki gweɗwimiŋ ka: Na gà asiŋ gà misle ŋgiɗ ika magər tar, tàa zazam bazlam ata tsəna, meme? Ama iye ihər i gweɗe a kurum a asa ka: Na tàa zazam nda ndzer tsəna, wànà kà dzalum ana, Mbulum a ta ge a dukw ŋgar ana a tsik ndzer a asa tsiye? 4 Awaŋ, kataya tsa. Ku mege gà mburma tserdze ti ne gà ɓəzla pàrsa, tàa zazam ŋgat tsa tekeɗe ka, Mbulum a ge a dukw ana a gwa, i ge a nda ndzer a hiywe pəra. Ar ka, kamala ana mewetse ŋa a riŋ i wakita Mbulum, a gwa ka:

«I təv ana kər Batsah mə̀r ŋa ki fèfil a ya ka,

ku weke a sir a dər ndzer, kà tsik taŋa ka,

ndzer kaɗəŋ, pàrsa iɗəm tsa.»

A gwa asa ka:

«I təv ana ta meke a à bakal a ka,

wura ilik à gis a kər i seriye tsidze.»

5 Bəla gà misle ŋgiɗ ta gweɗe a: Dukw ana ki gekwe a ŋgwala tsiye ka, à zlèk a mburma, dite tə sər dər ka, Mbulum ka, ŋgwal ŋa lele, bakal a riŋ i təv ŋgar tsa. Dite ki gweɗekwe a ter aaka a ana, dukùla? Wànà ki gweɗekwe a ana, Mbulum ka, mala ndzer tsiye, na i təv ana a ge a matsəɓatsəɓ, à gis a kwa nda seriye ŋgar a? I wiz taŋa ka, kamala ana gà asiŋ gà mburma ta wizewa ya mbaŋa. 6 Ama ka, kataya tsa, aɗaba Mbulum ka, mala ndzer. Na kataya tsəna, meme na a ta ge a seriye a gà mburma ana ika gər ahəɗ a tserdze asa ya?

7 Bəla gà misle ŋgiɗ ta gweɗe a asa mbaŋa: Kwa kinehe, kwa gà ɓəzla pàrsa tekeɗe ka, à zlèk a mburma, dite tə sər dər, Mbulum ka, mala ndzer, à ses a pàrsa tsa. Kamala taŋa ya, ti ti zlibe a à ŋgat ka, agəra taŋa. Dite gà misle ŋgiɗ ata ta gweɗe a asa ka: Aàmala na Mbulum à mèkwe a à bakal, a gweɗe a ka, kurum gà ɓəzla bakal, i dəba ŋa ya, seriye ŋgar à gis a kwa asa ya. 8 Ta gweɗe a ka, gekwa dukw ana ŋgwala tsiye ivaɗ, na dite ŋgwal Mbulum à pèt a aba ndərzayya lele ya. Na ki gekwe a kataya dze ana, à lèh a là? Yaw, gà misle ŋgiɗ ta wele a aà iye ya kataya, ta gweɗe a ka, iye na a tsik taŋa ya. Ama gà dukw ata ti tsik aà iye kamala taŋa ya ka, Mbulum a ta gis a dər tar a seriye ide.

Wura ilik ŋgwal ŋa ika miɗ Mbulum tsa

9 Na kamala taŋa ya ana, meme na kwa gà Yahuda ya, wànà ki zekwe a gà asiŋ gà gwala ŋgiɗ ika miɗ Mbulum ɓav a? Awaŋ, kataya tsidze. Aɗaba Yàa mbər megweɗe a kurum ka, ku mege gà Yahuda, ku mege gà na tar gà Yahuda tsiye tekeɗe, tar ka, i ahər bakal tserdze. 10 Ar ka, kamala ana mewetse ŋa a riŋ i wakita Mbulum ka, ta gwa:

«Wura a riŋ ilik ŋgwal ŋa ika miɗ Mbulum tsidze.

11 Wura a riŋ ilik nda gà metsehe, dite ka,

a yehe a Mbulum tsa.

12 Gà mburma tserdze ta miyak à vatwa ŋgar.

Tar tserdze ka, tàa nəs. Dite wura a riŋ

na a ge a dukw ana ŋgwal ŋa ya tsa,

ku mege ilik tekeɗe, a riŋ tsidze.

13 Biye ɗa tar a ne ka, kamala dive ana

mahə̀ndə̀kà ŋa ikəka ya tùwaŋŋà ya.

Ta fèfilere a ika arah a ka,

dukw ana ŋgwala tsa, ta bene a dər mburma ya.

Dite bazlam tar ana ti tsik a ya, a ndzikiɗ ba ka,

kamala mawur mesiwiɗ ana à kiɗ a mburma ya.

14 Ti ndeveye a a mburma ka, pìslìɗìɗe hinne,

nda metsìkè aà tar manəsa bazlam

kəla pat mbaŋa asa.

15 Ta mbèbe a tsəma tsəma

na aà makə̀ɗà mburma ya.

16 Ndaka vatwa tar ana ti de a dər a ka,

ti nis a à duwa pampam hinne,

nda gà tì sèwèr a are a gà mburma asa mbaŋa.

17 Tə sər vatwa ana ti ndze a dər ika magər

gà mburma zayya ya ka, tə sər tsa.

18 Dite magəɗa Mbulum a riŋ

i gəzləŋ tar ɓav tsa asa mbaŋa.

Kamala taŋa ya, wura ilik ika miɗ Mbulum

ŋgwal ŋa ka, a riŋ tsa.»

19 Ama kinehe ka, kà sərakwa ndzer, dukw ana məpala ahəm Mbulum a tsik tserdze ya, a ɗif dər ka, à gà na Mbulum a tsik a tar məpala ahəm ŋgar a ahər a. Kamala taŋa ya, wura ilik a sle a aà mene à ba ŋgar mala ndzer tsa, na ika miɗ Mbulum a. Aɗaba mburma tserdze, ti de a ka, aka miɗ ŋgar na a ti ses a ter a ikaba seriye ya, ku mege weke tekeɗe ya. 20 Fə̀rum ahər, a ge a kataya ka, aɗaba wura ilik a sle a aà mene ŋgwal ŋa ika miɗ Mbulum agəra ana a zezem a məpala ahəm ŋgar a tsa. Aɗaba məpala ahəm ata à pèt a ka, à bakal a gà mburma ndərzayya ɗekɗek, na dite ka, ti sir ahər a lele ya.

Meme na gà mburma ti ne a ŋgwal ŋa ika miɗ Mbulum a?

21 Ama kinehe ka, dukw ana gà məpala ahəm ata, nda gà dukw ana gà ɓəzla məma à guma Mbulum ti tsik akahər ata, ta gwa, a ta ge a ba aka miɗ mba ya ka, aka ge ba kaɗəŋ. Kamala megweɗe ya, Mbulum ŋa nda gər ŋgar na a ɗif à vatwa a mburma ya, na dite ti ne a gà ŋgwal ŋa ika miɗ ŋgar a. Vatwa ata ka, pam, a dara ka, nda təv məpala ahəm a tsa. 22 Vatwa ata gà mburma ti ne a dər ŋgwal ŋa ika miɗ Mbulum a ka, aɗaba megìse tar ana ta gəs Yesuw Kiristi nda gəzləŋ a. Vatwa ata ka, biy gà na ta gəs ŋgat a tserdze, tsəka, biy gà Yahuda ɗekɗek tsa. Aɗaba i təv Mbulum ka, mburma tserdze kalkal ilik pəra. 23 Aɗaba tar tserdze tàa ge bakal, tàa ŋgat mezlibe ana Mbulum a waya, a vile a ter a zləmana ya tsa. 24 Ama ka, ti ndze are tsehe a Mbulum, na dite a ge a tar ŋgwal biy taf, a ne à tar gà ŋgwal ŋa ika miɗ ŋgar a. A ge kataya ka, nda ahər Yesuw Kiristi ana a mbùrùɗara tar i bakal tar a ya. 25-26 Mbulum a tike ŋgat kamala dukw ana ta kìɗer a ya, na dite à mite a aɗaba kwa, məmbəz ŋgar a beye a à kwa i bakal a ya. Kamala taŋa ya, Mbulum a sər ba à kwa nda gà ŋgat ka, aɗaba ana kə̀ gə̀sakwa Yesuw Kiristi nda gəzləŋ kwa ya. A ge dər kataya ka, dite mburma tə sər dər, ŋgat ka, mala ndzer, a waya bakal tsa. Akahər ata ka, aka gəs gəzləŋ i təv bakal ana gà mburma ta gewa ya. A fə̀r ahər kamala ana aka ŋgatar tsiye. Ama aka bəra aaha kinehe ya ka, a ɗif dər a gà mburma kuɗa, aà tə sər dər ka, ŋgat mala ndzer, a waya bakal tsa. Ŋgat a sasar a ge a ka, dukw ana ndzer a, dite ŋgat asa ka, a waya a ne a à mburma gà ŋgwal ŋa ika miɗ ŋgar, na à gà na ta gəs Yesuw Kiristi nda gəzləŋ tar a.

27 Aɗaba na kataya ana, duwa a riŋ na ki gekwe a dər zlapa ya asa ya? Awaŋ, duwa a riŋ tsa. Aɗaba la? Agəra na mege wura a zezem a məpala ahəm Musa kalkal lele ka, ana ka, à sìŋgìr a a ba ŋgar hinne. Ama ka, Mbulum a hə̀ndə̀k i vatwa ŋgiɗ a pam, na wura a sle aà mege a dər zlapa asa tsiye. Vatwa ata ka, say biy magəsa Yesuw Kiristi nda gəzləŋ. 28 Aɗaba ka sərakwa ndzer, gà mburma ti ne a gà ŋgwal ŋa ika miɗ Mbulum ka, agəra ana ta gəs Yesuw Kiristi nda gəzləŋ a, tsəka, aɗaba ana tə zazam məpala ahəm Musa ata ya tsa. 29 Kurum kà dzalum dze ana, Mbulum ana biy gà Yahuda ɗekɗek a? Dite gà asiŋ gà mburma ŋgiɗ ti dzer a gurmits a bəɗ ti tsidze ya? Awaŋ, ŋgat ka, Mbulum tar tserdze mbaŋa. 30 Aɗaba Mbulum ka, ilik pəra, tsəka, biy ŋgiɗ a riŋ tsa. Na bəla gà Yahuda ta gis a Yesuw Kiristi nda gəzləŋ tar ka, Mbulum a ne à ter a gà ŋgwal ŋa ika miɗ ŋgar. Dite gà asiŋ gà mburma ŋgiɗ ana tar gà Yahuda tsiye tekeɗe, na tàa gəs ka, a ne à ter a gà ŋgwal ŋa ika miɗ ŋgar mbaŋa. A wele a ikaba mburma ya tsa. 31 Na bəla kù gwaɗakwa, Mbulum a ne à ter a gà ŋgwal ŋa, agəra ana ta gəs Yesuw Kiristi nda gəzləŋ tar a tekeɗe ana, məpala ahəm Musa a ne a kamala dukw taf masakəŋa ya ɓav a? Ama ka, kataya tsa. Ki ɗifekwe a ka, à ndzer ŋa ana iɗəm a ivaɗ, na taŋa ya.