Mawà Yesuw
2
1 Akahər ata ta wa Yuhana metsìlwìɓè à mburma a yam ka,
Agustus ŋgat batsah Əbay ana a kwere a ahəɗ gà Ruma ya.
Əbay ata a gwaɗa a gà gawla ŋgar:
«Ɗamum gà mburma ana ika ahəɗ ga ya fit dze.»
2 Taŋa na a ne malahalah maɗàmà mburma ana ika ahəɗ Ruma ya.
Akahər ata ka,
Əbay ŋgiɗ a riŋ,
batsah Əbay ata a tike aɗəm ŋgat,
zləm ŋgar Kwiriniyus.
A riŋ a kwere a gà Siriya ika ahəɗ Ruma mbaŋa.
3 I dəba ŋa ya,
ku weke a tsaraka bazlam ana batsah Əbay ata a tsik a ka,
a mah ba,
a da a mewetse ba a kwite ŋgar.
4-5 Yasufa ibam akahər ata ka,
ŋgat riŋ mandza ŋa i kwite Nazaret ika ahəɗ Galile.
A tsaraka kataya ka,
ta hitsera i fata ya,
ta mah ba,
tə da a Betelehem aka ahəɗ Yuda nda makasl ŋgar Mariya ana huɗ a ɗe aakara aà gama ya.
Tə daha,
ta wetse ba tar i fata.
Tə da a fata ka,
aɗaba ta wa batsah tsir ŋgar Əbay Dawda piŋŋe ka,
i fata.
6 I təv ana tar riŋ ti ndze a i Betelehem a ka,
kiye Mariya aka sle kuɗa.
Mawà kəla aka dza ahər ba.
7 Kəla ata a wa ya ka,
asləka ŋa,
maləkwara ŋgar tsara.
A wa ka,
i ga hwalwa hwalwa i dìdwìn.
A paɗa ahər petek,
a tike dər a dukw duwa batsah ŋa kamala gùlam a.
Dukw ata ka,
tə dzawa aɗəm kwizir.
A tike dər a fata ka,
aɗaba ta ŋgat təv mehinne i ga ŋgiɗ tsa.
Gà misle ŋgiɗ ta hənawa iɗəm.
Gà gawla Mbulum nda gà ɓəzla makəva gà duwa
8 Gà ɓəzla makəva gà duwa a riŋ i dala,
ta kaslawa gà dukw tar i bəra ndaavəɗ.
Tar riŋ bise nda kə̀sà Betelehem.
9 I təv ana tar riŋ aà makaslà gà dukw tar ata ya ka,
gawla Mbulum a dara a təv tar a.
Dzaydzay Əbay Mbulum a pàt aba.
A dəv i magər tar ndaavəɗ ata wùtəɗ wùtəɗ wùtəɗ.
Tə dza ba aà mege magəɗa hinne tsara.
10 Ama gawla Mbulum ata a gwaɗa a tar:
«Ki gwim magəɗa tsa,
aɗaba i dara ka,
i zla a kurumara bazlam ŋgwal ŋa ana gà mburma tserdze ta ŋgeye a dər ba hinne ya.
11 Aɗaba tàa wa a kurum mala məmbə̀là à mburma i Betelehem i kwite Dawda mbakum.
Ŋgat ka,
*Kiristi,
wele ana Mbulum a gwa,
i slir a kurumaha a ya.
Ŋgat ka,
Əbay batsah ŋa,
ika gər ahəɗ tserdze.
12 Dum,
ka tə samatum,
ki ŋgetwimeriŋa,
ki sirwim a dər ndzer kaɗəŋ.
Aɗaba a riŋ məpàɗà ŋa i petek,
mahə̀nà ŋa dər i dukuməŋa a riŋ i dìdwìn,
tə dzawa aɗəm kwizir.»
13 Zàmma tsəka,
gà asiŋ gà gawla Mbulum ŋgiɗ tàa dara a təv gawla Mbulum aaha ya.
Tə daha,
ti yahaba gər hinne.
Tə zàmbaɗa à Mbulum a fata.
Ta gwa:
14 «Mezembeɗe mege ka,
biy Mbulum ana
ika gər mburma tserdze ya.
Mandza zayzay ŋgar ika gər gà mburma ana
tserdze ika gər ahəɗ,
a waya tar a.»
15 I təv ana gà gawla Mbulum ata tə da aà gà ɓəzla makəva gà dukw ata ya,
ta mbəɗ gər a mbulum a gər ŋa ya ka,
gà ɓəzla makəva gà dukw aaha ta gwaɗaba:
«Tàkwa a Betelehem,
ka tə samatakwa dukw ana Əbay Mbulum a ɗif a kwa dər a.»
16 Ta mah ba tsara,
tə da.
Ti ta medeha ka,
tàa le aà gà Mariya nda Yasufa nda gà kəla aaha ta wa ya,
a riŋ mahə̀nà ŋa i dukw ata kamala gùlam a.
Tar dər mandza ŋa i dìdwìn kaɗəŋ.
17 Gà mburma ata ta ŋgat a kəla aaha ka,
tə dza ba aà maɗàmà bazlam ana gawla Mbulum aaha ndeɗiŋa a tsik a tar,
aɗaba kəla ata ya.
18 Gà asiŋ gà mburma ŋgiɗ ana i fata ya,
tə tsaraka bazlam tar ata kataya ka,
a ge aà tar kamala sunwa ya.
19 Ama Mariya a tike bazlam tar ata kìtsèk a zləm.
A dzalawa aaka gà gər.
20 I dəba ŋa ya,
gà ɓəzla makəva gà dukw ata ta mbəɗ gər a təv makəva gà dukw tar ana tə dara iɗəm a.
Tə daha,
tə dza ba aà mazàmbàɗà Mbulum tsara.
Ta ger wusa hinne,
aɗaba dukw ana tə tsarakara i fata,
ndəna ta ŋgatarəra ya.
Aɗaba dukw ata gawla Mbulum aaha a lah metsike a tar ndeɗiŋa ya ka,
kaɗəŋ,
pàrsa iɗəm tsa,
a ge ba kamala ana a tsik a tar a ndzer.
Ti ɗe zləm a Yesuw
21 I dəba ŋa ya,
Yesuw a ge mehinne təsəla ka,
mesèse ŋgat ide.
Tə sàs ŋgat.
Zləm ata ti ɗer a ka,
Yesuw,
kamala ana gawla Mbulum a ɗif a tar dər piŋŋe akahər ana Mariya aka ŋgat zukw tsiye.
Ti ɗe à Yesuw a Mbulum
22 I dəba ŋa ya,
məkəs aaha aka siwe ba,
wùsa aka val ika kəla ya lele,
kamala ana Musa a gwa ya ka,
aka sle.
Tə zla kəla ata,
tə da dər a ga Mbulum batsah ŋana a Yeruzalem,
ti ɗe a dər a Mbulum.
23 *Aɗaba mewetse ŋa a riŋ i məpala ahəm Mbulum ka:
«Məkəs ana aka wa asləka kəla maləkwara ŋa ya ka,
ti ɗer a dər,
aɗaba gà ɓəza ata ka,
gà biy Əbay Mbulum.»
24 *I dəba ŋa ya,
ta vəl dər ahər dukw masakəŋana məpala ahəm Əbay Mbulum a waya ya mbaŋa,
dite ka,
tə ndza tsəɗaŋŋa lele.
Ta vile a ka,
gà maadagwar sula,
kige tsa gà ɓəza huɗgum sula.
25 Ama wele duwa a riŋ,
zləm ŋgar Simeyun,
mandza ŋa i Yeruzalem i fata.
Wele ata ka,
ŋgwal mburma ndzer,
a ge magəɗa a Mbulum.
A babawa wele ana a ta mbile a à gà Isərayel a.
Ŋgat ka,
maràhà ŋa nda Mezite Mesife Mbulum i ba ŋgar.
26 Mezite Mesife Mbulum ata na a gwaɗar:
«Say ki ta mite a ka,
kàa ŋgat a mala məmbala à mburma ana Mbulum a gwa,
i slir a kurumaha a ya ndzer a dzekwiŋ.»
27 Dite i dəba ŋa ya,
Mezite Mesife Mbulum a gasar ahər a ga Mbulum batsah ŋa ata.
A təv ana gà tsir Yesuw nda mama ŋgar tə daha à ŋgat a fata ya,
aà mege dukw ana məpala ahəm Mbulum a wiz a ka,
28 Simeyun a zla aà tar Yesuw a,
a tike akahər ŋgar.
A ge dərraha kəkaaha a Mbulum.
A gwaɗaraha:
29 «Əbay Mbulum,
dukw ana kà tsikiŋ akahər ata
i sida ya ka,
aka ge ba kaɗəŋ.
Ama kinehe ka,
iye ana mala megemir yak a,
i mite a ka,
zayya na gəzləŋ ga ya.
30 Aɗaba Yàa ŋgat a mala məmbə̀là à mburma yak ata
31 kù gwa,
i vile a agəra gà mburma tserdze ya,
nda are gà kuɗa.
32 *Aɗaba ŋgat na təv dzaydzay ŋa ana
a ti ɗif a à vatwa yak a gà mburma ana
ika gər ahəɗ tserdze ya,
dite na
tì zlibe a à gà Isərayel gà mburma yak,
aɗaba ana ŋgat i gwala tar a.»
33 Bazlam Simeyun ana a tsik aɗaba Yesuw a ka,
a ge aà gà tsir ŋgar nda mama ŋgar ka,
kamala sunwa ya.
34 Simeyun a pise a tar ahəm,
a gwaɗa a mama Yesuw:
«Mbulum a zla kəla aaha ka,
aà madzàwà à gà Isərayel hinne aà mbulum a.
Dite aà mehitse à gà asiŋ ŋa aà mbulum hinne asa.
Ŋgat na a ɗif a à vatwa ndzer ŋa ya.
Ama ka,
gà mburma hinne ti ti niw a ŋgat.
35 Kamala taŋa ya,
madzala gà gər gà mburma ata tekeɗe ka,
a pèt a a təv dzaydzay ŋa ndərzayya lele.
Məkəs aaha,
i yak ka,
arəv kəla yak ata a dwil a aà kər gəzləŋ a tur tur tur,
kamala akwa ana à gis a lùŋguɗ a.»
Hana, məkəs ana a mà à guma Mbulum a
36 Məkəs duwa a riŋ i Yeruzalem,
zləm ŋgar Hana,
a màwa à guma Mbulum a mburma mbaŋa.
Ŋgat ka,
dəm Fanuyel ana gwala gà Aser a.
Ŋgat ka,
aka mbər mege màndawal.
Aka ndza i zal ka,
mive təsəla,
à gər ana a da a zal nda daala ŋa ya.
37 I dəba ŋa ya,
zal ŋgar a mət,
a ndza i ga ŋgar madakwa ŋa haa mive ŋgar a ge dzik tsamakər gəra faɗ.
A zàwa a ga Mbulum batsah ŋa ata tsidze.
Ŋgat a riŋ a gewa meslire a Mbulum kəla pat,
ku mege ndaavəɗ,
ku mege ndaapat tekeɗe.
A gewa ndəra,
a hamawa dər akaba a Mbulum mbaŋa.
38 I təv ana tar riŋ i fata ya ka,
ŋgat tekeɗe,
a daha a təv tar,
a dza ba aà mazàmbàɗà a Mbulum,
a ger wusa hinne.
Dite i dəba ŋa ya,
a dza ba aà maɗàvà zləm a kəla ata a gà mburma ana tserdze ta bebe a wele ana Mbulum a ta mbil a dər à gà Yeruzalem a.
Gà tsir Yesuw nda mama ŋgar ta mbəɗ gər a Nazaret
39 Gà tsir Yesuw nda gà mama ŋgar tə ndəv à dukw ana tserdze məpala ahəm Əbay Mbulum a tsik a ka,
ta mbəɗ gər à Yesuw aka ahəɗ Galile a kwite tar Nazaret.
40 Aləka kəla ata a gəl ba,
a sime.
A tsah lele,
Mbulum a piser ahəm,
a waya ŋgat.
Yesuw a ge mive kurwa gəra sula ka, a da
a ga Mbulum batsah ŋana
41 *Gà tsir Yesuw nda mama ŋgar tə dawa a *megirive Paska a Yeruzalem kəla viye.
42 Aləka Yesuw a ge mive kurwa gəra sula ka,
tə da nda gà tsir ŋgar a megirive ata tserdze,
kamala ana gà tsir ŋgar tə dawa ya.
43 Aləka i dəba ŋa ya,
megirive ata a ndəv ka,
ta mbìɗ a gər a ma.
Ama Yesuw ka,
a mətsa aà tar i Yeruzalem a.
Gà tsir ŋgar nda mama ŋgar tàa sər aàba tsa.
44 Ta gwa i tar ka,
gà Yesuw tàa mbər mede aka miɗ nda gà asiŋ gà mburma mə̀r.
Tə da wurwas ka,
tə dza ba aà mayaha ŋgat i liwiŋ gà wur tar a,
nda gà masla tar a.
45 Ama tàa ŋgat Yesuw ɓav tsa.
Ta mbəɗ gər a Yeruzalem asa,
tə daha,
ti yaha ŋgat i fata.
46 Ama i huɗ mehinne makər a ka,
tàa le ahər a riŋ mandza ŋa i ga Mbulum batsah ŋa ata i fata.
A riŋ i liwiŋ gà ɓəzla medzeŋge məpala ahəm Mbulum gà Yahuda.
Ŋgat a riŋ à dze a zləm a medzeŋge tar ana ti dzeŋgewa ya.
Dite ŋgat tekeɗe,
a tsèm aà ter a bazlam ana a tsaraka ya.
47 A ge aà gà mburma ata tserdze tə tsaraka bazlam ŋgar ata ya ka,
kamala sunwa ya.
Aɗaba dukw ana a tsik a ya ka,
metsehe iɗəm ka,
hinne.
48 Gà tsir ŋgar nda mama ŋgar ta ŋgatar ka,
a ge aà tar kamala dukw mene aà mburma ya mbaŋa.
Mama ŋgar a gwaɗar:
«Aàla na kà ya ba à mə̀r kataya ya,
kəla gà?
Mər nda tsir yak ka,
maa ya ba aà mayaha kər ka,
hinne.»
49 Yesuw a gwaɗa a tar aaka:
«Ki yehwim a iye ana,
aàmala?
Wànà kà sərum tsiye ka,
say i ndze a i ga tsir gà ya?»
50 Ama tə tsaraka bazlam ata a tsik a tar kataya ya tsa.
51 Dite i dəba ŋa ya,
gà Yesuw nda gà tsir ŋgar ata ta mbəɗ gər a kwite Nazaret.
Tə daha a fata ka,
Yesuw a gəsawa dukw ana ti tsikewar a lele.
Mama ŋgar ibam,
a tikewa gà dukw ana a gewa ya,
a gər ŋgar lele asa.
52 I dəba ŋa ya,
Yesuw a səkah à magəla ba,
dite a ŋgat metsehe a gər lele asa mbaŋa.
A gewa dukw ana a tsahən aà gà Mbulum nda gà mburma ya.