moont awshittetanne huss awshitt
21
1 moont awshittetanne huss awshittin akk;
moont tureeshshatenne huss tureeshsh hetarpen;
pakatetanno sed kaneeshsh amm kinnaannintamu.
2 saparaan miil yerusaalem awshittetanno haypaat se irshaddi sirantep dikkisant,
moontalle Mooha kapaatt lekkannin antu akk.
3 nass kaanenno sheeddaan qareet,
"toare por Moohot ulli kallaanniyyu otant siip qalle kiyy;
iyyaa ollenno kallaannina;
iyyaanno siipayy koddinan.
moohaanno mashshayyess iyyaa olle kinnaannina,
moohaaddonno iyyaa koddina;
4 ilmamaanno dahenn iyyaa ila uushuqina.
oot kallat pahaytet tarpit maalla,
toxt shoke dappet,
shoke pooyt,
shoke rakkotanno sedeeshsh amm kinnaanninanemu" kidiyyu ishaamiyyon dakay.
5 se sheedda daamum qari laiyyenno,
"toare antu akkan heikk awshiyaassin kodina" hekid.
ukkannass,
"oot lel hin iyy amaanamenne shaakket kodd maalla tsaafii" ani kid.
6 lamm sedepanno ani kid,
"hekaysaatt!
alfaanne omeka,
hiraytaanne muutaytot an;
nam deepoodess ayka haq kiyyat qaran patt iddaanina;
7 iyy inpushiyu sed tayina;
ananno moohan iyyi koddina;
iyyanno meetawu koddina;
8 hekoddu male huurampayyaanne iyyaan amaana diinniyaanno,
oshshiyyaanno,
iyyaan nam ikanniyyanno,
arpalayyaanno,
sakolayyaanno,
iyyaan tsootsa amaaniyyaanno,
eerpolayyaanno dahenn hitsaaddu pakatet apitt se tiinetin doohishshu qalless koddina;
sedenno toxt lakkiyyaa kida.
yerusaalem awshittet
9 hitamiyyaa tapp hin waalletadda tapp se jiiayta muutayta tapp uqqalli innaakoodin qapad ila iyy shokku dey illo,
"arep hooyii!
haypaat laah settetin hed akkinnina" an kid.
10 laaffotannenno utet kaant derat qarop anan aan illo yerusaalem saparaan miil moontalle Mooha kapaatt lekkannisho an akkiyy,
11 itanno serka moohaatenn qum daka tsoretep,
qum iiyaasbiitepa kinnannin illo kaawatap haahisahaahinnin;
12 ohint kaant deratenno qafta,
ohint settenno harrat hundann lakk qafta;
harrat hundann lakk settenno hitaymiyya hundann lakk ulli ell lushin,
harrat se kapass mahh kaf israaelet hundann lakk tsaafam.
13 por lashsh yaamishooll harrat halpatt,
por lashsh yaamishoss miskitt qarass harrat halpatt,
por lashsh yaamishoss pihitot qarass harrat halpatt,
por lashsh peishoolanno harrat halpatt kiyy.
14 ohint saparaanettetenno sheeht hundann lakk qaft;
sheeht se qarassenno mahhada orr hitaym hundann lakk heka laah settet tsaafam.
15 hitaymishsh hin sed an lel,
halitt worqet se iyyat saparaanettenne harrat saparaanettetenne ohint saparaanettetin waaddiyu qapa.
16 saparaanettenno dind afur qapan,
derussa saparaanettetenno qum paldumaadd mittass kiyyaan.
hitaymishsh hin saparaanett waaddotin waadd illo derussaadd kilometret kum lakkenn tseet afur kodden;
paldunshaddenne jifumooddanno qum settep kiyyan.
17 hitaymishsh settenno waaddot namaten ohint se waadd;
itanno waaddot tseetanne hund afurenn afur koddit.
18 ohint hinet iiyasbit ila soorumant;
saparaanettenno iyaan worqet miilt kaawatap somm ila soorumamen;
19 sheeht ohint saparaanettetenno daka hawhaw kiyyu tsoren sirant;
sheeht shokkiyyot iyasbit,
lakkiyyot sanper,
halpattiyyot kalqetoon,
afuriyot markit,
20 heniyot sartonkis,
lehiyot sartiyon,
tapiyot kiristilop,
lakkushiyot piral,
tsinqiyot waraawir,
hundiyot kirisbiraasis,
hundann shokkiyyot yaakint,
hundann lakkiyyot ametestsinos kida.
21 harrat hundann lakka hinett inqot hundann lakk sett kida;
harrat hin mashshamashshaddess inqotb shakkaaha ila soorumant.
paana saparaanettetenno worqet miilt kawaatap haahisahaahinnishu ila soorumam.
22 oot Moohot pold hin heikk fottiyyonne laahatin man miiloshadd kodden maalla,
amm saparaan qalle man miilot henxakkemu.
23 oot serka Mooha saparaanett attumaniyanenne laah settenno ispaadd kodd maalla,
saparaanettess lashsh shoke lehot attumasaass amm fadusinniyyamu.
24 siipat attumashadden mimmitaatinan;
daamada husslahatenno serkooddon it deyinan;
25 oot awaddat saparaan qalle teekit maalla,
harrat saparaanett amm lashsh shakkaah naf duhamintamu;
26 serkaanne kaannussa siip it ilop kalinan;
27 iyyaan matsaafa kiyyat heka laah sett kodd qall tsaafam pateesh,
iyyaan nam uuqiyanne oshum erkanniyyanne eerpa ishaamiyy dahenn amm apure it ilop kalinanemu.