daamum par kum
20
1 hitaymishsh se qulfet didim hawl settetenne sansala kaan harkayy qalli qapad moontalleett lekkanniyyon akk.
2 iyyat paf sett qap par kum hid;
paf settenno maaka pahayt se taapiloos shoke seetsan kidamiyyu kida.
3 hak par kum hin kaysaanninu ikkim iyyat siip patann indapusinnin hitaymishsh hin paf sett didim se kelop allkash;
qari duh;
maatam qari kod;
ukanna helpa qoji furisama iyy fadusinnin.
4 lamm sheedda lekin akk;
iyyaan sheeddaan qari laddiyyessenno hayyotum iyyaa horatin quurinan iddaassam;
nafset orr se oot Yesus maanyetumaaddu minannenne oot lel Mooha minann mashshaaddu quurametin akk;
iyyaa orr pinant settenne paahnat setti shoomatta diiy,
ishaakanno miintaddu shoke harkaddu qari kodatta diiy kida;
iyyaanno toxt ila sohaden kristoos olle par kum daamumen.
5 hin hat lamm hak par kum kaysaanninoss amm sohanninanemu;
hin toxt ila sohatta hiraymat.
6 iyyaan toxt ila sohatta heka hiraym qootanniyy iyyaan qoramenne miilampayya kida;
amm toxt lakkiyyot iyyaa qari hayyotum heqqaftamu;
iyyaa suukamma (qeesawwa) Moohaatenne heka kristoos koddinan,
iyy olle par kum daamuminan.
pushmaatta seetsanat
7 et par kum hin kaysaado seetsanat hidanaayy ila fursamina;
8 siip se husslah dahenn qara kallaanniyy,
kookenne maakook kidamiyy patandapusisaassenne tor kushusisaass sohannina;
dihaassaaddonno shahatt pakatet kapa kiyyop kiyy.
9 huss dahenn qari pulpulamaan paat miilampayyaatenne saparaan hoxsasham patmantaren;
apittanno moontalle Mooha kapa lekkad iyyaa dam.
10 taapiloos se patin iyyaa dapusiyyenno pakatet apitt se tiinetin doohishshu,
pinant settenne himampayt eerpampayt uqqalle kiyyaan ilop all kashamen;
kallapanne awadd parparaashsh hak parparat ulli miidaminan.
horat muutayta
11 sheeddaan at kaanenne iyy sheeddaan qari laiyyin akk;
moontanne hussanno tura feeladen;
poranno amm iyyaa heakkaademu;
12 orr raaw iyyaan kakkaanenne iyyaan tittinnax sheeddaan turass ellen antu akk;
matsaafaddaanno qahisamen;
matsaafa pil heka kiyyatatenno qahisam;
orr se raawenno qum erkamaaddu hin matsaafaddaan qari tsaafam mittass horataddu qeeddaden,
13 pakatetanno orr raaw it ila kiyy daatt,
toxtanne sioolenno hin raaw iyyaa ila kiyy dayyen;
namat mashshmashshayyess qum erkamooyy mittass horatayy qeeddad.
14 toxtanne sioolenno pakatet apitt ilass allkashamen,
pakatet apitt settetenno toxt lakkiyya kida.
15 nam mahhatiyy matsaafa kiyyat qari tsaafama akkaatta diiy dahenn pakatet apitt qalless allkasham.