haq kiyyatat
22
1 hitaymishsh hin haq kiyyat se kaawatap miil sheedda daamum Moohaatenne heka laah sett kapa sohanniyyu ani akkiyy.
2 haq hin otant paana kaan heka saparaanett qallen tarpin.
haq sett kapa pihitotanne miskittass qoyr kiyyat iyy lehaalle shokkoohann,
paralle hundann lakkin daliyyu kiyy.
lappa qoyr settetenno siip dininnin.
3 amm saparaan qalle pishaymat kinnaanninamu.
sheedda Moohaatenne heka laah sett saparaan qalless koddinan,
erkamamppayyaayyanno iyyass shomanninan,
4 miintayyenno akkinan;
mahhaayyenno miintaddu mina kinnaannina.
5 amm sed kanneeshshsh awaddat kinnaannintamu,
oot Moohot poldat iyyaa attumanninu maalla,
amm attumat ispa shoke heka lashsh iyyaa fadusinnishshamu;
parparaashsh haka parparatess daamuminan.
dexema Yesus
6 lamm hitaymishsh hin sedep ani kid,
"lel hin dahenn iyy amaanamenne shaakket kida;
Moohot,
pold hin laaffooshayy himampayya daanniyyu iyaan helpa deh ili koddina erkamampayyaayy patpahisaass hitaymishshayy hit.
7 yesussenno,
"toare!
shakarin kidina deyina!
nam lel him matsaafa sed lushanniyyu iyy hartood!"
he ani kid.
8 iyy sed dakayenne akk an yewaannis.
helpaan antu sed dakayenne akke hitaymishsh se hin ani akkiyyi shoomattaassin lukkooyy qari sunk.
9 hitaymishsh hin lamm,
"sedep koda diiyii!
hedenne kafaayt himampayyaanne orr lel matsaafa sed lushanniyyu olle ananno erkamampayt;
Mooha shoomadu" ani kid.
10 lamm sedepanno ani kid,
"helpaan hedehaadene lel him matsaafa sed maatamin duha diiyii;
11 sedeeshsh siitampayt he siitooyy mina kinnaadu;
oshshittanno he oshshumu;
tsillampaytanno hetsillu;
miilampaytanno hemiilu."
12 "toare,
shakarrin kidina deyina;
kalisot antu qum erkamooyy mitt nam nam daanninu an olle kishsh.
13 alfaanne omeka,
turaqattaanne kann oorisot,
hiraytaanne muutaytot an.
14 orr dalot qoyr kiyyat damaassenne kaalt saparaanett qallin kalaass hayyotum qafnaatta uuwaataddu jiqanniyy iyyaa hartood.
15 herradaanne sakolayyaanne,
arpalayyaanne,
iyyaan nam ikanniyyanne,
orr tsootsa shoomanniyyanne,
iyyaan eerpa hoxsaanniyyanne eerpan kallaanniyy dahenn saparaan patann kiyyan.
16 antu Yesus ikkim hitaymishshaawu maanyetum sed maaparadda kristaanat ishaaminossin hit.
antu hittinanne hotta taawit,
iskitt parashot se otawiyyu."
17 laaffot miilotanne haypanishet settenno,
"hooyii" hekidin;
nam dakayiyyonno,
"hooyii" kidu;
nam deepoodenno hedeyu;
iyy fadiyyonno haq kiyyat heriy male patt uku.
18 nam lel him matsaafa sed qalli tsaafam dakayiyyu dahenness antu qiminninkiyy lelin;
et aynonno lel sed qaras akkan shokkooh naf padawo Moohot jiiaytadaan matsaafa sed qalli tsaafam iyy qari padawina;
19 et aynono lel se matsaafa him sed qalli tsaafam qara akkan shokkooh naf hattiyyo,
qoyr kiyyatatenne saparaan miil matsaafa sed qari tsaafam qara Moohot qootanaayy hattinnina.
20 iyy hin ishaamiyyu,
"shaakketass,
shakarrin kidina deyina!"
hekidin.
ameen,
Yesus pold,
hooyii!
21 dikkuma pold heka Yesus kristoos dahetaynua olle kiyyaadenii.
ameen.