laah settenne nam kum tseetanne hund afurenn afur
14
1 toare laahatin utet tsiyon qarass ell antu akk.
nam kum tseetanne hund afurenn afur (144, 000) iyyaan mahhaayyenne mahh appaayy miintaddu mini tsaafam iyy olle kiyy.
2 nass haq irrampaytatenne hordana qaqawa iyyaan kaanetep kiyyun moontalle dakay;
nass antu dakayenno nass shonqaan kaan pekena kidamiy dawamiyane dakaysamaanniyop kiyy.
3 sheeddaanettenne uuma se kiyyat qapu afur turass;
qimaayyaan turassenno laalet awshittet laaladen;
nam kum tseet hund afurenn afur hin huss qara qaxaman qeeddam pateesh amm aynonno laalet sett kolla hefottemu.
4 oot iyyaa taqqeela diinniyan maalla amm iskatt olle heoshumenemu;
por laahatin anniyop dahenn iyyaan iyy kanni anniy hin iyyaa.
iyyaa,
iyyaan moohaassenne laah sett qartamma kodda otant orr ila qayam kida.
5 kapaddu qallenno amm eerpa hesohadenemu;
amm haasuttaanno qari heakkaademu.
hitaymiyya halpatt
6 lamm hitaymishsh pil iyy otant moont ilin hayanniyun akk;
iyyanno siip huss qara kallaanniyassenne,
kafassenne maytassenne,
hin kap hawhaw kiyyu ishaamiyyu dahenness lel masmasunt heka parpar se iyyat ishaaminu qap.
7 nass kaanennenno,
"lashsh iyyat horat uqqari quurinu hepaitte;
Mooha huuraa!
serkiyaa!
iyy se moontanne hussanno pakatetanno ayka haqatenno uumi shoomadaa!"
hekid.
8 hitaymishsh pil lakkiyaanno,
"paapilon hin kaant ukot arpalumaadd se jiiayta Mooha sohashinnishu siip ukkitt hesunkit!
hesunkit!"
kidaan hitaymishsh se tureesh kanni aan.a
9 hitaymishsh pil halpattiyaanno iyyaa kann qap nass kaanen,
"iyyaan pinant settenne pahanashayy shoomanniyy,
ishaak settenno miintaddu shoke harkaddu qari kodanniy et kinnaadane,
10 ukot wayneet jiiayta Mooha it akkan pil uqqall lahama male waalletall oorisant ukinan,
settep hitaymiyya miilampayyaanne laah sett turass apittanne tiinetan miidaminan.
11 qayyaa apitt se iyyaa miidinotenno parparaash hak parparatess erreel sohannina;
hin pinant settessene pahanashayy shoomanniy,
ishaak mahh settettenno qeeddanniy dahenn kallapanne awadda amm haystta heqapanemu."
kiditete iyyaa kanni aan.
12 miilampayyaan acac Mooha lushanniyanne Yesus amaanan qimiyy duupattot iyyaa fadusinniyyu arxila kida.
13 moontallettanno nass,
"sed tsaafii;
sedeeshsh hin heka pold kodd toyiy iyyaan hartood!"
laaffot miilotanno,
"heye!
ikkim tashoshaddu ila hayssanninaness erkamooddu iyyaa kanni annina" kidiyyon dakay.
jiiayta Mooha
14 lamm hentooy;
toare urrashshet atatin akk;
urrashshet se qarassenno meet namatep kiyyu laiyy,
mashshayy qaranno qoyqoyt worqetat kiyy;
harkayyallenno paaja qareed qap.
15 hitaymishsh pilanno man miilot talla sohad illo iyy se urrashshet qari laiyess,
"helpa mooqetat kayte!
paajaatt hayyii illo moqii,
uunt husslah mooqama kayte" hekid nass kaanin ullup.
16 iyy se urrashshet qari laiyenno paajaanett hayy,
husslahatenno mooqam.
17 hitaymishsh pilanno man miilot se moontalle kiyyu talla sohad;
iyyanno lamm paaja qareed qap.
18 hitaymishsh se apitt qaran hayyotum qaponno por laaqqa Mooha uqqar dehasa kapa sohad hitaymishsh se paaja qareed qaposs,
"dalot woynet hepalhite paajaatt hin qareed hayyii illo dalot woynet husslah qara kishshu qidii orqudop qapii" hekid nass kaanin ullup.
19 hitaymishsh settenno paajaanett husslah qarop hayy,
dalot woynet husslah qara kishotenno qid orqudop qap illo por woynet uqqall jiipa heka jiiayta Mooha se kaan qallep allkash.
20 woynet settenno por woynet uqqall jiipa se saparaan patan kiyyu qalless iqawisant;
por woynet uqqalli jiipa qallenno diik erreel luukama fart kelin paxaay,
lahaash lamm kilometret tseet halpattap kishshu koddaayy sohad urq.