pinant lakk
13
1 lamm pinant pakatet ila sohannishun akk;
pinant settenno kaassa hundanne mashsh tapp qaft;
kaassaan qaranno sawtawwa hund kiyy.
mashshada pinant sett qaranno mahh otittaat kiyy.
2 pinant hin antu akkenno qayrant pahanannin;
lukka pinant settetenno lukka soortaat paahnaannin,
kapaddenno kap karmaatep kiyy.
paf settenno humunayyenne sheeddooyyanne hayyotum kaanenno pinant setti daayy.
3 mashshada pinant set ila ishshokku peesat qallin toyaatep kishshu qap antu akk;
hekoddu male peesat se qallin toyaatep kishshonno hedinatt.
husslah dahenn shammattaan pinant se kanni aan.
4 pinant setti hayyutum daattaayy minann siipat daahen paf setti shoomaden;
lamm,
"aynu pinant sedep kiyy?
aynu it ada fottina?"
kidaan pinant settesenno shoomaden.
5 pinant settess kap it foojanne otittan ishaamintu idaassam;
hayyotum it leha hund afurenn lakk inxerkannintonno idaassam.
6 pinant settenno moohaanne mahh Moohaatenne,
por kallashayyetenne hin moontalle kallaanniyyanno ota hirt.
7 ikkim miilampayya adintu inpushintossenno hayyotumat idaassam;
kafanne maytanne kap hawhawi kiyyonne siip dahenn qarassenno hayyotumat idaassam.
8 hak husslah uumameeshsh hirtete orr se mahhaaddu maskap kiyyat heka laah se qalam qari tsaafama diiy,
husslah qara kallaanniyy dahenn pinant setti shomanninan.
9 nam lappa qapu hedakayu!
10 iyy poojaminu poojamina;
iyy pillawin ikawusaminu pillawann ikawusaminaa;
duupattaanne amaantet miilampayya qara fadamishshu ar ila kida.
11 pinant piletenno huss ila sohannishshon akk;
pinant settenno qum laahatep kaassa lakk qaft,
qum paf settetepanno ishaamin;
12 hayyotum pinant tureeshatennenno ootaayy heikk erkkannin.
hussanne iyyaan uqqara kallaanniyy dahenn ikkim pinant tureeshati shoomanninan kodusiyy.
pinant se op ishoomanniyyanenno it se sed tureeshsh peesat qallin toyaatep kishshu idinatt kida.
13 lamm pinant lakkiyyot hak it orr turi apitt moontalle lekkashshinnintoss ishaakadaan kakaan erkannin.
14 ikkim pinant hiraym turi ishaakada erkannintu hayyutumat idaassam maalla orr huss qara kallaanniyy patandapusinnin;
pinant se pillawin peesawt dinattess ikkim paahnat soruminanesenno orr huss qara kallaanniyy acacin.
15 pinant lakkiyyot ikkim paahnat pinant shokkiyyaati laaffot daannintoss hayyotumat iddaassam.
settenno,
ikkim paahnat hin ishaama fottintonne hin ishoomatta diinniyy dahenn rawusisa fottintoss kida.
16 pinant lakkiyyot hin kakkaannenne tittinnaxanno shorokiyyaanne teekampayyaanno poldallaanne aylammaanno dahenn ikkim harkaddu miskittishsh qarass shoke miintaddu mina ishshaak kodanninaness iyyaa koom.
17 paana sedenn nam ishshaak mahh pinant sett akkinniyyu shoke dihaassa mahh sett dap shokkooh naf akkan piddattaassenno koddo kashaassenno amm fottinamu.
18 qallqaapattot fadusinniyyu ar ila kida;
nam qalliqaapanniyyu he dihaassa pinant sett dihadu;
dihaassayn akkinniyyan nam kida;
dihaassaayyanno 666 [tseet lehenne hund lehenn leh] kida.