hitaymishsh settenne matsaafa qool se tinnax
10
1 lamm hitaymishsh irrampayt pil urrashshet uwaad moontalleett lekanniyyun akk;
mashshayy qaranno kurpanot (alawut roopat) kiyy,
miintayyenno lashshap kishsh,
lukkooyyanno qapayaa apittatep kiyyan;
2 matsaafa qool se tinnax maramiyyu qahisam harkayy qalli qapad.
lukketayy miskittishshetann pakatet qarass,
pihitishetann lamm huss qarass ell.
3 karma daattiyyopanno nass kaanin ullup.
helpaan iyyat ullupe hordana tapp nassaddu dakaysiyyen.
4 helpaan hordanaan tapp nassaddu dakaysiyyene antu tsaafaasin qaapad;
hekoddu male nass moontallett,
"nass se horodanaan tapp dakaysiyyen iqalli qapadu male tsaafa diiyii" kidiyyun dakay.
5 hitaymishsh hin pakatetanne huss qari ell antu akk harkayy miskittishsh moontallel qapad illo
6 mahh Mooha se parparaash hak parparati kallaanniyyun,
moontanne hin uqqalle kiyy,
hussanne hin uqqalle kiyy,
pakatetanne hin uqqalle kiyy uumin,
kakataan,
"sedeeshsh amm olanninamu!
7 hekoddu male lashsh se hitaymishsh tappiyyot kaas keehinniyyo,
qum iyyat aylamooyy himampayya lel mittass ishaama Mooha hin dekam kaysaanninan" hekid.
8 nass hin moontalleett ishaamiyyu antu dakay lakkiyyaass,
"hitaymishsh se pakatetanne huss qari ell qara matsaafa se qahisam harkayy qalle kiyyu aanii qeeddii" ani kid.
9 antu hitaymishsh se kapop aane,
"matsaafa se tinnax ani dayyiin" ikkid;
iyyanno,
"qeedadu damii,
kardayt haddawnnina;
lamm kapayt qalle tankap meawina" he ani kid.
10 ananno hark hitaymishsh sett qalle matsaafa se tinnain qeeddad dam;
helpaan antu dame tankap kapaw qalle meaw;
antu dam kanna lamm kardaawu hehaddaw.
11 sekanna,
" oot siip leketenne maytanne,
orr kap hawhawi kiyyu ishaamiyyonne daamadaatessenno ammannenno him lela hed fadusinnin" he ani kidant.