maanyet lakk
11
1 sekanna shonpoqqot halittap kishshu waaddoti koddintu ani daassam;
sedepanno ani kidam,
"sohadu man miilot heka Moohaatenne por laaqqa uqqari Mooha dehasa waaddii;
hin ulla Mooha shoomanniyyanno dihii.
2 hekoddu male oot por hin man miilot patin kiyyu orr ayhuta kodda diiyyi daassam maalla waadda diiyii;
iyyaanno leha hund afurenn lakkess saparaan miil qar iqanninan.
3 maanyawaawu lakk ikkim uuwwaat dappet uuwaanninan,
lashsh kum shokkonne tseet lakkenn hund leh him lelinanessin irrot iddaanina.
4 iyyaanno qoyr ekert lakkenne iyyaan ispot uqqari haayamiyyu lakk hin pold husslah turi elliyy kida.
5 aynonno et iyyaa miida fadiyyo apitt kapaddu qalle sohannina olishshadaaddonno damina;
nam iyyaa miida fadiyyu et kinnaado settep ikawusama iyy fadusinnin.
6 helpaan iyyaa him uqqalli leliyyan ilass ikkim roopat roopa diinninoss moont duhaass hayutum qapan;
settep lamm haq diiki kodaassenne helpaan iyyaa hinnaadene jiiayta hawhawi kiyyun husslah dawaassenno hayutum qapan.
7 helpaan iyyaa maanyetumaaddu dikkiyyen kanna pinant se didim kela sohannintu iyyaa adina inpushina allrawinnina.
8 pukkaaddonno paana saparaan kaan op paahnatin sotom shoke kipts kidiyyan hembiyyan qalless sunkina;
saparaanettenno iyyaan poldaaddu uqqalli rahham kida.
9 orr maytanne kafanne,
kap hawhawi kiyyonne siip ila sohad lashsh halpattann pakass pukkaaddu tooyanninan;
mookamaanno dawrinan.
10 oot himampayya hin lakk orr husslah qara kallaanniyyu rakkusiyyen maalla orr husslah qara kallaanniyy toxt himampayyaanettetenn ikkaaness masmasinan;
dayyanno olli daddaanninan.
11 lashsh halpattann pak kanna lamm laaffot kiyyat daannishshu Mooha kapa dey illo pukkadaan qallep kal,
iyyaanno lukkooddun ellen;
orr se tooyaanniyyonno ikkaaness huuren.
12 se kanna himampayyaan lakk nass,
"areel hooyaa" kidiyyu moontalle dakayen;
olishshadaaddonno he akkitete iyyaa moonttallel urrashshetin tawen.
13 esseteeh hussat ikkaani shild;
saparaan qallenno hark hundiyyot allpat;
shildaanettennenno nam kum tapp raaw;
iyyaan hatenno ikkaaness huuren;
Mooha moontallettessenno serka dehayyen.
14 pelawot lakkiyyot hetarpit;
toare pelawot halpattiyyot shakar kidint deyint.
keehisama kaas tappiyaat
15 hitaymishsh tappiyyaanno kaas sett keehiyy;
moontalleettanno nassada kakkaan,
"daamum husslah heka pold heka moohaaynotenne heka kristoos hekaayyet kodd;
iyyat parparaashsh haka parparatess daamumina;"
kidiyy dakaysamaad.
16 qimaayaa hund lakkenn afura hin Mooha turi sheeddoddu qari laiyyenno miintaddonn Mooha turi sunken ishoomaden;
17 sedepanno kiden,
"hed se kiyyonne ulla kalu
heikk fottiyyu pold moohaallo,
oot att irroshayt se kaant qapatt illo daamunt maalla hedin aypisannin.
18 siipat hejiiad;
jiiaytaaytenno hedey;
helpaan orr raaw horat qeeddanninan hepaen;
aylamoot himampayyaassenne
miilampayyaanne hin mahaayt serkinniyy,
hin tittinnaxassenne hin kakkaaness helpaan att heriyyaaddu daannintu hepaen;
helpaan att iyyaan huss patiy patinnintu hepaen" kiden.
19 man miilot heka Mooha hin moontalle kiyyonno heqahisam;
taapota kakaayyetenno man miilot sett talla akkaad.
paqanaanne hordanaanne qaqawwaanne shildaanne paddayt kaannenno deyen.