9
1 hitaymishsh heniyyaanno kaas sett keehiy;
toare iskitt moontallett hussallep pein akk,
qulfet didim hawl settetenno iddaasam.
2 iyyat didim settenno qahiyye qayyaa afa apitt kuuhisa kuuhinniyyu ila sohanniyyop kiyyu hawl se kela sohad;
lashshanne hayyaanno qayyaa hawl settetenn poorinnawen.
3 qayyaa se ilanno torrayya huss qarop sohad,
hayyotum heka kiish huss qaratep kiyyonno iyyaa daassam.
4 orr se maatam Mooha iyyaa mina teek pateeshsh ikkim iyyaa shoqqa huss qara kiyyonno koddo akkan raadenno koddo qoyr shokkooh naf imiidiness iyyaa lelant.
5 torrayya settessenno leha hen orr se miidaass male amm ikasaass ihedaassantemu;
iyyaanno orr se miidinaan,
qum et kiish nam poko nam laashamiyyotep kida.
6 awsette orrat toxt fadanninan;
hekoddu male amm akkanninanemu,
toxtanno hadanninan;
hekoddu male toxt iyyaa tura sekaannint.
7 torrayyaa settenno farassaan tori dikkisamep kiyy;
mashshaddu qaraanno qoyiqoyt inpusha it worqetap kishshu qapan,
miintaddonno miint namatep kishsh;
8 mashshaddonno mashsh iskattatep kiyy;
iillaaddonno iilla karmaatep kiyyan;
9 uuwaat tor it silf ila soorumantep kishshonno qapan;
nass karpallooddetenno nass serekeella farassaan tori kulufiyaytep kiyy.
10 siitta kiishshatep kiyy iyyaa akkanin pokiyyanenno qapan;
siittooddu ilanno humun iyaa leha hen namin miidinan qapan.
11 daamanno qapan,
Daam settenno hitaymishsh didimat kida;
mahhayyenno kap ipretatenn apatoona,
kap kiriketatennenno aboliyon kidamin.
12 pelawot shokkiyyot hetarpi;
toare,
sed kanna pelawot lakk deyina.
13 hitaymishsh lehiyyaanno kaas sett keehiyy;
qema por laaqqa uqqari Mooha dehasa se worqet ila sorumam Mooha tura kiyyu mina nassat sohanniyyon dakay;
14 nass settenno hitaymishsh lehiyya se kaas qapadess kide,
"hitaymiyya afur hin haq efraatsis se kaan ili hidam all furiyyii!"
15 hitaymiyya afur hin saatet sedessenne lashsh sedessenne leha sedessenne par sedi dikkisam hotta nam qara hark halpattiyyaa ikkim allrawninnaness furisamen.
16 lekussa orr adant hin farassaan qari qaaiyyetenno miiloonet tseet lakk koddaaddun dakay.
17 farassaanettenne orr se farassaan qari qaaiyy antu raaetin akkenno qum it arrakaneet kishshop kiyyan;
iyyaanno uuwaat silf it apittap roomaatenne daka "yaakint" kidamiyyu piss moontt qapu pooranne qum tiinetatepb kawneelaap kiyyu qapan;
mashsh farassaanett mashsh karmaat paahnaannin;
kapaddu qalle apittanne qayyaanne tiinet sohad.
18 jiiaytada halpatt hin kapaaddu qalle sohadenn,
apittanne qayyaanne tiinetann medda nam ila hark halpattiyyaa ikawsam.
19 irrot farassaanettetenno kapaddonne siittooddu ila kida;
siittooddu maakaap kiyyaan,
mashshanno qapan;
iyyaann namanno miidin.
20 orr jiiaytada hinin raawa kela hat patandapat erkama harkaaddu qara amm hemitaatenemu;
qayyanne tsootsaan akka shoke dakaya shoke anta fotta diinniyy worqetanne pirretanne silfanne dakaanne qoyr ilanno soorumami shoomattaanno amm allhediiyyenemu.
21 settep lamm nam ikasaaddonne soumaaddonne arpalumaaddonne hashanshaddu qaranno amm hemitaatenemu.