qahisama maatam tappiyyaat
8
1 helpaan laahatin maatam tappiyya qahiyye pak saatetatep kishshoss rui kidot moontalli kodd.
2 hitaymiyya tapp iyyaan Mooha turi elliyyannon akk,
iyyaassenno kaas tapp daassam.
3 hitaymishsh Mooha hepil iyy mehaddaan worqet ila soorumam op hitsaana uqqalli aarsiyyan qapad deyy illo por laaqqa Mooha uqqari dehasa kapi ell;
por laaqqa uqqari dehasa heka worqet se sheedda Mooha tura kiyyu qara hitsaana lek iyy iyyat dinkam miilampayyaa dahenn olle dehanninu iddaassam.
4 qayya hitsaana settetenno dinkam miilampayya olle hark hitaymishsh sett qalle erreel Mooha turop dehaad.
5 hitaymishsh settenno hin hitsaanot uqqalli aarsamiyyu qeedd por se laaqqa uqqari deehaanniyyan qara apitt uqqalli innaak illo huss qarop happ;
hordanaanne qaqawwaanne paqananne shilda hussatenno kodden.
kaassadaan tapp
6 hitaymiyya tapp iyyaan kaassadaan tapp qapanno keehisaass dikkisaden.
7 hitaymishsh turaqattaatenno kaas sett keehiyy;
paddaytanne apitt diikin laham hussallep kasham,
huss qaranno hark halpattiyyot hedooh;
qoyr qaranno hark halpattiyyot hedooh;
shoqqa raadenno dahenn hedooh.
8 hitaymishsh lakkiyyot kaas sett keehiyy;
akkan utet kaantep kiyyu hedoohitete pakatet ilop kasham;
pakatet qaranno hark halpattiyyot diik kodd;
9 pinanaan kiyyat qap pakatet ila kallaanniyy ilanno hark halpattiyyot heraawen;
konka qaranno hark halpattiyyot hepati.
10 hitaymishsh halpattiyyot kaas sett keehiyye iskitt kaan muqutap opawiyyonno moontallett pei,
iyyanno haqada urqiyyanne ayka qara hark halpattiyya qarass pei.
11 mahh iskitt settetenno arkayaa kidamin.
haq se qara hark halpattiyaanno ihaddawiyyu kodd;
haq se haddawiyyu minann orr lek raaw.
12 hitaymishsh afuriyyaanno kaas sett keehiyy;
lashshanne lehaanne iska qaranno hark halpattiyya daawam;
semmaalla ikkim attumashaddu qara hark halpattiyyot poorinnat koddinoss;
kallapatanne awoddat qara hark halpattiyyot attumat dap.
13 sekanna hoohayt otant moont illin hayanniyon akk;
iyyanno nass kaanenn,
"oot hitaymiyya halpatt hin hat nass kaas dakaysinninan maalla iyaan huss qara kallaaniyy dahenness pelawu!
pelawu!
pelawu!"
kidan ullupiyyon dakay.