siip maatamat qari koddam kum tseet hund afuren afur
7
1 sed kanna hitaymiyya Mooha afur dind afurenn qema huss qari ellen antu akk;
iyyaanno ikkim haayyot huss qarass shoke pakatet qarass shoke qoyr qarassenno inhaayyawiness haayya huss qarop dind afurin deyiyyu ulli qapen.
2 hitaymishsh hepil,
iyy maatam Mooha se ulla kalu qapad por lashsh yaamishshooll deyiyyon akk;
iyyanno hitaymiyya afur hin ikkim hussanne pakatet miidinan hayutumat iddaassamess nassayy err qeedd illo,
3 "haka innu miint aylamma moohaaynu qari maatam kodinnoss,
hussanno pakatetanno shoke qoyranno miida diiyyaa!"
kid ullup.
4 dihaassa orr se maatamat qari kodametenno hendakay;
siip israaelet dahenn qalle orr hin maatamat qari kodam kum tseet hund afurenn afur kida.
5 kaf yihuta ila kum hundann lakk qarass maatamat kodam,
kaf roopel ila kum hundann lak,
kaf kaat ila kum hundann lakk,
6 kaf asaar ila kum hundann lakk,
kaf niftaalem ila kum hundann lakk,
kaf minaas ila kum hundann lakk,
7 kaf simoon ila kum hundann lakk,
kaf lewi ila kum hundann lakk,
kaf isaakor ila kum hundann lakk,
8 kaf sapiloon ila kum hundann lakk,
kaf yoosef ila kum hundann lakk,
kaf piniyaam ila kum hundann lakk,
qarass maatamat kodam.
siip uuwaat axat uuwad
9 se kanna siip namat diha fotta diinnaayyin akk,
iyyaanno iyyaan siip ilanne kaf ilanne mayt ilanne siip kap hawhawi kiyyu ishaamiyy dahenn ilanno sohad kida;
uuwaat atatenno uuwaden laappa qilaxatatenno harkaddu qalli qapaden illo sheeddaanettenne laah sett turi ellen;
10 nass kaanennenno ullupan,
"dinila heka se sheeddaan qari laiyy,
heka moohaaynotenne heka laah settet" kidin.
11 hitaymiyyaanettenno dahenn sheeddaanettenne qimaayaanettenne uuma kiyyat qapu afur patanno mantaren ulli ellen;
sheeddaan turassenno sunken,
Mooha shoomaden;
12 sedepanno kiden,
"ameen!
wososanne serkaanne qallishshaakaanno
aypilaanne kaanussaanne irrotanne kokkuntanno
parparaashsh haka parparat moohaaynu koddenii!
ameen."
13 qimaayaan ilanno ishshokku,
"hin uuwaawwa axat uuwad orrame?
aha deyen?"
hekid an kaassad.
14 antu illo,
"polda,
hed upa" ikkid.
iyyat lamm sedep ani kid,
"hinayyu iyyaan rakkot se kaant ila sohad dey kida;
uuwwaataddonno diik laah settetenn jiqaden attawusaden.
15 semmaalla sheedda Mooha tura kiyyan;
kallapanne awadanno man miiloshayy talla erkannin,
iyy se sheeddaan qari laiyyenno iyyaa olle kallaanina.
16 sed kanneeshsh amm tuffinanemu,
amm deeponninanemu,
ototanno hoolilaanno amm iyyaa qappanninanemu;
17 maana maalla,
laah hin otant sheeddaanett ila kiyyu shinkaytaaddu iyyaa koddina,
haq ayka kiyyat kapopanno iyyaa turi qattina;
moohaanno ilmama dahenn iyyaa ila alliuushuqina."