qahisama maatamaddaan tappat
6
1 helpaan laahatin maatamaddaan tapp ila heka hiraym qahinniyyon akk,
uuma kiyyat qapu afura se ila ishshokku nass hordanaatep kiyyun,
"hooyii" kidiyyon dakay.
2 lamm fart atin akk;
iyy fart se qari laxiyyenno paant qapad,
qoyqoyt serkaatenno iddaassam,
iyyanno ipushiyu kodd illo inpusha aan.
3 helpaan laahatin maatam lakkiyya qahhinniyyo uuma kiyyat qapu lakkiyyot "hooyii" kidiyyon dakay.
4 fart pil idaylax kidenno sohad;
iyy fart se qari laiyyess andot huss qara allpatisan ikkim orrat orrirawnninani kodusisaass hayyotumat iddaassam;
pillaw kaanenno iddaassam.
5 helpaan laahatin maatam halpattiyya furiyye,
uuma kiyyat qapu halpattiyyot "hooyii" kidiyyon dakay.
lamm fart poorin akk;
hin fart se qari laiyy kiilot harkayy qalli qapad.
6 nass,
otant uuma kiyyat qapu afur sett qalle sohadep kiyyun dakay;
nass settenno,
"kaappa pak kiilot,
kalisot lashsh shakk koddu;
poorra kiilot shakkanne pak,
kalisot lashsh shakk koddu;
hor tifanne woynet miida diiyii" kidiyyon dakay.
7 helpaan iyyat maatam arfiyyaa furiyye nass uuma arfiyya,
"hooyii" kidiyyon dakay.
8 lamm fart shiqiyyun akk,
hin fart se qari laiyy mahhaayy toxt kidamin.
sioolenno iyy kann annin.
toxtanne sioolenno ikkim adantanne laaxotanne baaq nayqanne pinanaannenno,
orr huss qara kiyyu qara pakpakayy (jiqot) rawinninaness hayutumat idaasam.
9 helpaan iyyat maatam heniya furiyye,
nafset orr se oot lel Moohaatenne maanyetum se iyyaa dayyen minin qalametin por op laaqqa Mooha uqqari dehanniyyan kannaat akk.
10 iyyaanno nass kaanenn ullupin,
"pold heikk fottiyyu,
miilotanne tsillampaytallo,
haka awwaametess hin husslah qara kiyy qari horat quuraanne oot diikaaynoti haarot oorisa diinint?"
kiden.
11 mashmashaddosenno uuwaat atat iddaassam;
hak dihasaa kataaddu erkamampayyaanne kafaaddu hin hekaaddop ikawusamina,
kaysaanninaness ikkim helpa qoji duupanninaness iyyaa lelant.
12 helpaan iyyat maatam lehiyyaanno qahhinniyyon akk,
shilda kaanenno kodden;
lashanno uuwaat dappetatep ponnaatt,
lehaanno dahenn diikap rormaad;
13 qum peleset helpa kashannaate kota irrampayyan yumashawan dalotidd qara yeishshop iska moontalletenno allyexen.
14 moontanno qum matsaafa qoolatep marant allhatt,
uutawwaanne lak otant pakatet qalle kiyyonno dahenn poraddu ila allqeeddamen.
15 daamadda hussatenne pexashisampayyaanne kaadayya orratoratenno shorokiyyaanno irrampayyaanno aylammaanno poldaallaanno dahenn pohotaddaanne shilk utawwa tallass dekaden.
16 utawwaanne shilkadaass,
"innu qari sunkaa!
iyy se sheeddaan qari laiyy turanne jiiayta laah sett kela innu deekaa!
17 lashsh jiiaytaaddu hin kaant hepaitte;
aynu turi ella fottina?"
he ikiden.