matsaafannne laah sett
5
1 hark miskittishsh heka iyy se sheedda qari ladd qalle matsaafa qool iyy maram tallanne altin tsaafa qapu maatam tappin duhamin akk.
2 lamm hitaymishsh irrampayt shokku nass kaanin,
"iyy matsaafa se qall qahisaassenne maatamaddaanettenno furisa fottinu ayno?"
kidiyyu ishaamiyyon akk.
3 moontallenno huss qaranno shoke huss kannaattanno koddo iyy matsaafa sed qall qahisa shoke qall tooya fott amm hekiyyamu.
4 nam matsaafa se qahisaanne tooyot ifadusinniyyu akkaatta diittaayyenn ikaanessin pooy.
5 qimaayaan ilanno iyy shokku,
"pooya diiyii,
toare karma mayt yihuta kodd,
hittin taawit hepushe;
matsaafa se qall qahisaanne maatamaddaan tappanno iyy furisa fottina" he ani kid.
6 otant sheeddanettetenne uuma afura settetenne qimaayaanetti ilass laah qalamep kiyyu ell antu akk;
laah settenno kaassa tappanne inda tapp qap.
iyaanno laaffot Mooha tapp hin huss dahenn qarop hitam kida.
7 laah settenno hedey illo hark miskittishsh se sheedda qari laiyy qalle matsaafa se qeedd.
8 helpaan iyyat matsaafa se qeedde uuma afura settenne qimaayaan hund lakkenn afur laah se turass sunken;
mashshmashshaddossenno pekenaanne mehadda worqet ila soorumam hitsaana se dinkam miilampayyaa koddin,
innaakkood qapaden.
9 sedep kiden laalet awshittetanno laaladen,
"matsaafa sed maram qeeddaassenne
maatamaddaan furisa hed fadusinnin;
maana maalla,
heqalant,
diikaytin kafanne kapanne maytanne,
siip dahenn ila,
orr Mooha qayt.
10 ikkim daamum moohaaynot suukamma koddinanessenno iyy kodit;
iyyaanno huss qarass daamuminan."
11 helpaan antu ullaash tooyiyyo sheeddanettenne uuma settenne qimaayyaan qudann kannann nass hitampayaan leketin dakay;
lekussooddonno kumadda lekenne miiliyoonawwa lekenn dihamin;
12 iyyaanno nass kaanenn,
"laah hin qalam irrotanne shorokum,
ufunatanne qimussa,
kaanussaanne serkaanne
aypilaanno qeeddatta iyy fadusinnin"
hekiden laaladen.
13 lamm uuma moontallenne hussallenne huss kannaattenne pakatet ila kiyyu ilanno dahenn sedep kidin antu dakay,
"iyy se sheeddaan qari laiyyenne,
laah settessenno
aypilanne kaanussaanne serkaanne irrotanno
parparaashsh hak parparat ikoddenii."
14 uuma se kiyyat qapu afurenno,
"ameen" hekiden;
qimaayaanettenno miintaddu lahan qapaden ishshoomaden.