sheedda moontallet
4
1 sekanna,
moontalle karfa qahisamin akk;
nass hin nass kaasatep kiyyu antu tureeshsh dakay,
"areell hooyii,
iyaan ittureesh kodda fadusinniyyan hed akkinnina."
he an kid,
2 ananno esseteehin laaffotin kinnaad;
illo sheeddan moontalle akk;
sheeddaan qarassenno iyy laiyy kiyy.
3 hin sheeddaan qari laiyy daka iyasbitennea sertinonb kidamiyyu heriyatiyy lomb paahnaannin.
sheeddaan kapaashanno kurpanot (alawut roop) it inqotc markitaatepd kishshu kiyy.
4 settep lamm sheedda hund lakkenne afur sheeddaan patmantar;
sheeddaan qarassenno qimaayyaa hund lakkenn afur uuwaat atat uuwad qoyqoyt worqetatenno mashshaddu qari haayad ulli qaaiyy.
5 sheeddaan qaranno paqananne hordanaanne qaqawwa sohannin;
sheeddaan turanno muquta opawiyyu tapp kiyy;
iyaanno laaffot Mooha tapp sett kida.
6 sheeddaan tura pakatet kaawatap pilliiqishshu kiyy.
otant sheeddaanet tallanne qudann kannann uuma kiyyat qapu afur iyaan miinteeshshanne patalleeshsh inda lek qapu kiyy.
7 iyaa ila shokkiyyot karma paahnaannin,
lakkiyyot horm paahnaannin,
halpattiyyot miint namatep kishshu qapan,
afuriyyot hoohayt hayanniyyu paahnaannin.
8 uuma afura settenno mashshmashaddoss karpalla leh lehe qapan;
karpallaaddonno erranne lahann,
indaann innaakkoden;
awaddanne kallapanno orrkanna mita male,
"miilot,
miilot,
miilot Mooha pold iyy heikk fottiyyu,
iyy ulla kalonne iyy kiyyu
iyy deynonno"
hekidin.
9 helpaan uumotin iyy se sheeddaan qari laiyyenne parparaashsh haka parparati kallaanninoss serkaanne kaanussaanne aypila dehanniyanne,
10 qimaayya hund lakkenn afuretinett iyy se sheeddaan qari laiyy,
parparaashsh haka parparati kallaanniyyu turi sunkaan ikilpiyattan,
qoyqoytadaaddonno sheeddaan turi haayen illo,
11 "poldaaynonne moohaaynollo,
oot att heikk umt
hin umamenne kallaanniyy hinnashaytin kodden maalla,
serkaanne kaanussaanne irrot qeeddatta hed fadusinnin"
kiden.