Hitaym maapar kristaana efesoneti hitam
2
1 "Hitaymishsh maapar kristaana se efesone kiyyu sedep kid tsaafii.
Hin iska tapp harkayy miskittishsh qalli qapadenne otant mehaddaan worqet ila soorumam op ispa uqqari haayiyan tapp il mimmitaatiyyu sedep kidin.
2 Erkamaattanne payyahaaytenne duupattaaytenno henxup;
Orr nannayqi duupatta diittaayt,
iyyaan orr hitaym kodda male 'innu orr hitaym' kidiyy ishaakan eerpampayyaa koddaaddu reehaaytenno henxup;
3 Duupattan qimaaytenne oot mahhaawu maalla irraxatet quura male rakkot qeeddattaaytenno henxup.
4 Hekoddu male iyaan antu hed qariqapiyyu kiyy;
Settenno hoxsunshayt pahaytet alldiitt.
5 Ammann por att uqqar sunkit qaapadu;
juppot qara mitaatii;
hin att tureeshsh erkannishshu erkayii;
hin inkinnekuless deyinhina hin att ispaayt uqqari haayannishshu por se ila allqeeddina.
6 Hekoddu male akkan shokku att inxaypisamishshu kiyy;
Settenno maaniyyaa,
erkama niqolet hin antu qar hittinniyyu hedenno qarhittitt.
7 "Hin laaffot maaparadda kristaanati lelishshu nam lappa qapu hedakayu.
Nam inpushiyyoss qoyr kiyyat se kennetet Mooha ila kiyyu qara ikkim qunda daminossin kodina."
Hitaym maapar kristaana Samirneseti hitam
8 "Hitaymishsh maapar kristaana Samirneseti sedep kid tsaafii;
"Se hiraymaanne muutayta kodd,
se toy lamm ammann ulla kiyyu sedep kidin,
9 Rakkoshaytenne hiyumaayt henxup,
hekoddu male att shorokitt;
iyyaan daaet seetsan kodd,
ayhuta kodda male 'innu ayhuta' kidiyy hed otaaddu henxup.
10 rakkot ittureesh hed qari deyintu huura diiyii.
toare ikkim ekkawsamintaness taapiloos inn ila karayin man hidanatep kalinnina;
lashsh hundassenno rakkot qeeddannintan;
hak toxtat iamaanam koddii;
qoyqoyt kiyyatatennon hed daannina.
11 "hin laaffot maaparadda kristaanati lelishshu nam lappa qapu hedakayu;
nam inpush amm toxt lakkiyaatin miidaminamu."
hitaym se maapar kristaana berkamooneti hitam
12 "hitaymishsh se maapar kristaana berkamoonete kiyyoss sedep kid tsaafii,
"hin pillaw dind lakkin qareed qapad sedep kidin,
13 att por se sheedda seetsan ulla kiyyan ila kallaattaayt henxup;
hekoddu male mahhaawonno qiminnikishsh qapannin,
amaantet se att an qara qaftu amm hemmarmitemu;
helpaan antibaas maanyeshiyyu hin amaanam por se seetsanat ulla kallaanniyyo saparaann qalli ikawsam nafenno amm an amaana allhediittemu.
14 hekoddu male iyaan antu hed qariqapiyyu akkan shokku kiyy;
settenno,
orr karaddu iyyaan kollinnat palaxam qap otanshayn ila kiyy;
palaxam hin iyy se ikkim israaelet iyaan tsootsa dehaad damaannenne arpaluman kohatisaminani palaaq kors kida.
15 settep orr qum orr sedetep kollila niqoleti lushanniyyanno otanshayn ila kiyyan.
16 ammann juppot qara mitaatii;
hin inkinnekuless shakarin kidina deyina pillaw se kapawu qalle sohanniyyun iyyaa adina.
17 "hin laaffot maaparadda kristaanati lelishshu nam lappa qapu hedakayu!"
iyy se inpushess manna qaran iddaannina;
daka at mahh awshitt uqqari tsaafamennon iddaannina;
nam daka se qeeddad pateeshsh nam mahh sed upu shokkooh naf amm hekiyyamu.
hitaym maapar kristaana tiyatsroneti hitam
18 "hitaymishsh se maapar kristaana tiyatsironete kiyyu sedep kid tsaafii,
"meet Mooha hin inda haalayt apittatep kiyy qaponne lukka naaset pork apitt ila kishshop kiyy qapu sedep kidin,
19 erkamaattanne hoxsunshayt,
amaanteshaytenne qarqaarsaaytenno duupattaaytenno lamm erkamaatt heka kanneeshsh heka tureeshsh qara tawnaattaaddonno henxup.
20 hekoddu male iyaan antu hed qariqapiyyu kiyy;
settenno elsapel se,
'antu himampaytet' kidishshu ikkim erhamaawu nyauurinanenne damaan tsootsa dehaad daminani kollinnishshonne patandapusinnishshu ulli diitt.
21 ikkim juppot qara mitaatintoss helpan idayy;
it lamm arpalumaadd qara mitaataass amm hehinnaattemu.
22 semmaalla baaqannin afandalli all it kashina,
iyyaan it olle arpalumiyyanno et erkamaaddu hin nayq iyyaa it olle erkayyen alldiitta illo jupposhaddu qara mitaata diiyyane rakkot nayqatennin iyyaa qari deyina;
23 meddaaddanno toxtannin rawinnina;
maaparadda kristanaatenno dahenn iyy mutsuraanne qaap nam ishshaakiyyu an koddaawu ufunanninan;
mashshimashshaynessenno qum erkamoonnatessin inni daannina.
24 hekoddu male inn iyyaan tiyatsirone kiyy kollila hin nayq qeeddatta diiyyess dahenn,
settep lamm inn iyyaan hin orr shakkan 'kollila seetsan hin qim dekam' kidiyyan kann anta diinniy qarass amm haisot pilt feihinnamu;
25 hekoddu male hak antu mitaatinu hin inn qaftan dikkiy luushadaa.
26 iyy se pushenne hak muutaaytassenno hasaawu kaysinniyyoss hayyotum se antu appaawu qara qeeddadetep kiyyun siip hawhawi kiyyu qari iddaannina;
27 iyyat halitt silfatenn iyyaa peashshinnina;
mehaddaan huss ila soorumamepanno iyyaall dokkonnina nukkunnannina;
28 iskitt parashotatennona iddaannina.
29 "hin laaffot maaparadda kristaanat lelishshu nam laappa qapu hedakayu."