Raaet yewannis akk
1
1 Raaet hin iyyaan helpa deh ili kodda fadusinniyy aylamooyy akkisaass hin Moohot Yesus Kristoosi day kida.
Yesus hitaymishshaayy hitaann raaet sed ayleshayy yewaanisi ufunaytiyy.
2 Yewaannisenno oot lel Moohaatenne oot kollila shaakket hin Yesus Kristoos kolliy iyyat akk dahenness maanyet kodd.
3 Oot helpaan dehaaden maalla,
nam him matsaafa sed waarusinniyyu iyy hartood.
Settep lamm orr lel him sed dakayiyyanne iyyaan matsaafa sed qalli tsaafam lushanniyy iyyaan hartood.
Paanussaan maapar kristaana tapp hin issiyaalle kiyyi hitam
4-5 An yewannis kapa maaparadda kristaana tapp hin issiyaalle kiyyass;
Mooha se kiyyu,
ulla kalonne deyinu kapa,
laaffot se sheeddooyy tura kishshu tapp kapa,
Yesus kristoos se maanyet amaanam kodd,
se toxt ila sohattan qart kodd,
se piddampayt daamada husslah kodd kapa dikkuma Moohaatenne andot inni koddenii.
Se innu hoxsaad jupposhaynu ilanno diikayn innu passiyy,
6 Se ikkimin Moohaayyenne appayyi erkanninu daamadaanne suukamma innu kodess,
serkaanne irrot parparaashsh haka parparat ikoddenii!
ameen.
7 Toare iyyat urrashetann deyina;
Orr se iyy madenno hata male namat dahenn iyy akkina;
Siip husslahatenno dahenn iyyat deyiyyo pooyinan;
Lel hin shaakket;
Ameen.
8 Se kiyyu,
ulla kalonne lamm deyinu Mooha pold se heikk fottiyyu "alfaanne omekaa,
hiraymanne muutaytot an!"
hekidin.
Yewannis raaetann kristoos akk
9 Antu kafittaann Yewannis se inn olle Yesus Kristoos amaanan rakkoshayyenne daamumaayyenne duupattaayy qootanniyyu,
lel Moohaatenne kollila shaakket hin Yesus kolliyyi maanyet koddaawu minann utunnat haq ila kishshu fetsimu kidamishshon kiyy;
10 Lashsh poldateb helpaan antu laaffot miilotin kiyyo nass kaan heka kaasatep kiyyun ippateesh dakay.
11 Nass settenno,
"hin att akkishshu matsaafaalli tsaafii illo,
efesonepanne samirnesepanne berkamopanno tiyatsironepanno sartesepanno filaatilfiyaapanno lotoqiyaapanno maaparadda kristaana tappi hitii."
he ani kid.
12 Antu illo se an olle ishaamiyyu ufunaatta ipateesh mitaat;
Helpaan antu ipateesh mitaatekuless iyaan worqet ila soorumam ispot uqqari haayamiyyu tappin akk;
13 Otant iyyaan op ispa uqqari haayiyyan ila iyy meet nam pahun akk;
Iyanno uuwaat hak lukkoyyatin paishshu uuwad,
Tompossayyenno sheep worqet ila soorumamenn hidad.
14 Mashshayyenne rifant mashshayyetenno paddaytapanne futtaap heat;
Indooyyanno haalayt apittatep kiyyan;
15 Lukkoyyanno silf naas kidamiyyu pork apitt ila kiyyop kiyyan;
Nassaayyenno nass haq kaanetep kiyy.
16 Harkayy miskitt qalless iska tapp qapad;
kapayy qallenno pillaw dind lakkin qaareed sohad;
Miintayyenno qum lashsh haahisa haahinishotep otawin.
17 Helpaan antu iyy akke nam toyepin kodd lukkoyy kel sunk;
Lamm iyyat harkayy miskitt an qari qap illo "naha diiyii!
hiraymanne muutaytot an;
18 Antu kiyyatannin kiyy;
sed tureeshsh hentoy,
ammann lamm hak parparatess kiyyatannin kiyyaannina;
toxtatenne siool qarassenno hayyotumin qapa.
19 Ammann hin att akkitenne hin ammannenno kiyyanne hin sed kanneeshsh koddinanno tsaafii.
20 Hin dekam heka iskaan tappatenne hin worqet ila sorumam op ispa uqqari haayiyyan tapp se att harkaawu miskitt qalle akkitt hin iyaa;
Iskaan tapp hitaymiyya maapar kristaana tappat kida;
Hin op ispa uqari haayiyan tappanno maapar kristaana tapp kida.