laaffot shaakketatenne hekat eerpa
4
1 moyshadot!
husslah qara himampayya eerpampaayaan lek oot iyyaa sohaden maalla,
laaffot dahenn amaana diiyyaa.
sekapeeshsh laaffot Mooha koddaaddenne kodda diittaadd orkela reehaa.
2 laaffot Mooha koddaadd inn inreehintan ufunaannintan sedenn kida:
laaffot hin Yesus kristoos nam koddaayy,
sohan akkaattaayy amaanishu dahenn laaffot Moohaat.
3 laaffot hin Yesus kristoos nam koddaayy sohan akkaattaayy,
amaana diinnishu dahenn amm laaffot moohaatemu;
hin laaffot olishsh kristooset kida;
laaffot settenno it se deyint kidant inn dakayten kida.
ammann nafenno laaffot hinet husslah qara hekishsh.
4 medda!
inn heka Moohaat;
laaffot hin inn ila kishshu,
laaffot se husslah qara kishshu qara tawt.
semmaalla inn himampayya eerpampayyaan heppushen.
5 iyyaa heka husslahat;
semmaalla iyyaa ishaamiyyanenno heka husslahateeh;
husslahatenno iyyaa kap dakayin.
6 innu heka Moohaat;
hin Mooha up dahenn innu kap dakayin;
hin heka Mooha kodda diiy lamm amm innu kap dakayiyyanemu.
laaffot shaakketatenne laaffot eerpa innu reehinnu ufunaanninnu sedenn kida.
Moohot hoxsunt
7 moyshadoot!
oot hoxsunt Mooha kapa koddit maalla,
mashshimashshaynu orr hoxsaannaa;
hin hoxsunt qapu dahenn meet Moohaat,
moohaanno up.
8 oot Moohot hoxsunt kodd maalla,
nam,
nam hoxsaatta diinniyyu dahenn amm Mooha heupamu.
9 Moohot ikkimin meetaayyin kiyyat akkanninnos meetaay shokkooh husslah qarop hit.
sedenn Moohot hoxsunt se iyyat innu qapu akkiy.
10 hoxsunt sedep kida:
innu Mooha hoxsattaaynun kodda male,
iyyat innu hoxsaattaayyenne jupposhaynu all patisa meetaayy innu hitaayyenn kida.
11 moyshadoot!
et Moohot sedep innu hoxsaadu koddo,
mashshmashshaynu orr hoxsatta innu fadusinnin.
12 amm nam Mooha akk hekiyyamu;
etin innu mashshmashshaynu orr hoxsaanno,
moohaanno innu qalle kinnaannina.
hoxsunshayyenno innu qalless it kaysaatt koddint.
13 iyy olle kaallaataaynonne iyyanno innu qalle kaallaataayy innu inxufnaann,
oot Moohot laafoshayy innu dayy maalla kida.
14 Mooha appat meetaayy dinsampayt husslah koddinu hitaayy henxakkin;
innonno maanyet kida.
15 nam,
"Yesus meet Moohaat" kidiyyu amaaniyyu dahenn qalle Mooha kallaannin;
iyyanno Mooha olle kallaannin.
16 innonno hoxsunt se Moohot innu qapu henxufn illo amaanin.
Moohot hoxsunt;
nam hoxsuntin kallaanniyyu moohann kallaannin.
moohaanno iyyalle kinnaannin.
17 husslah qara oot innu iyyap kinnu maalla,
ikkimin lashsh horatate huura diinninnoss hoxsunt paana sedenn otanshaynu qalli kaysaatt.
18 hoxsunt kaysila qarin paitt,
huurra qeeddin allkashin male,
hoxsunt ila amm huurra hekiyyanemu;
oot huurra horat olle qapamiyyan maalla,
nam huuriyyu hoxsunshiyy amm kaysila qarin hepaittemu.
19 oot Moohot turaqatta innu hoxsaad maallan innonno iyy hoxsaannin.
20 nam "moohan hoxsaannin" kidiyyu illo kafittayy qari hittinniyyu eerpampayt kida;
kafittayy se iyyat indan akkiyyu et hoxsaatta diinniyyu koddo,
Mooha se iyyat akka diinniyyu ashshannass hoxsaatta fottina?
21 lamm acac kristoos innu day se,
"nam Mooha hoxsaanniyyu kafittayyenno hehoxsaadu" kidiyyu kida.