amaantetin husslah pusha
5
1 Yesuset kristoosa koddaayy nam amaaniyyu dahenn meet Moohaat kida;
nam,
Mooha appa hoxsaanniyyu dahenn meetaayyenno hoxsaannin.
2 etin innu Mooha hoxsaanninkinnu illo acacaddaayyanno lushanninkinno,
sedenn iyyaan medda Mooha hoxsaanniyy koddaaynu henxufn.
3 Mooha hoxsaatta kidot,
acacaddaayy lushatta kida;
acacaddaayyanno amm hehursamu.
4 maana maalla,
nam meet Mooha kodd dahenn husslahatenn pushin,
husslahatin innu pushinnonno amaanteshaynon kida.
5 nam Yesuset meet Mooha koddaay amaaniyyu pateeshsh,
nam husslahatin pushiyyu ayno?
maanyetum oot kristoos daassam
6 iyy haqanne diikin dey Yesus kristoos kida.
haqat ahalisamaayy akkinnin;
diikanno toxshayy akkinnin.
iyyat dey haqaneeh kodda male,
haqanne diikannenno kida.
hin shaakket koddaaddoss laaffot miilot maanyet.
maana maalla,
laaffot miilot shaakket kida.
7 maanyet halpatt kiyy;
8 iyyaanno laaffotanne,
haqanne,
diik kida.
hin halpatt maanyetumaaddonn olless senin.
9 maanyetum nami qeeddanninkinna;
hekoddu male,
maanyetum Mooha heikk qara taw.
maanyetum Moohot oot meetayyet lel hin iyy
10 nam meet moohaatin amaaniyyu maanyetum sed mutsurooyyalle kiyy.
nam Mooha amaana diinniyyu lamm,
maanyetum se Moohot oot meetaayyet lel,
oot iyyat amaana diinniyyu maalla,
eerpampaytass iyy kodin.
11 maanyetum setteno,
se Moohot kiyyat parpar innu daattaayyenne kiyyat settenno metaayyin kinnaattaadd leliyyu kida.
12 nam meet Mooha qapu kiyyat qapa;
nam meet Mooha dap lamm,
amm kiyyat heqapamu.
kiyyat parpar
13 inn iyyaan mahh meet moohaatin amaaniyy,
kiyyat parpar qafnaattaayn ikkim ufunaannintanessin sed inni tsaaf.
14 amaantet qint innu iyy qara qafnu,
akkan heikk etin qum hasaayet dinkamanno innoss dakayna.
15 hin innu dinkamanninkinnu dahenn ikkim iyyat innu qara dakayiyyu etin ufunaanno,
hin innu iyy qara dinkamann dahenn ikkimin qeeddanninnoss henxufn.
16 namat et kafittaayy juppot toxt qarann inpausisa diinnishshu erkanniyyu iyyat akko,
he Mooha iyy dinkamu.
moohaanno orr juppot toxt qarin pausisa diinishshu erkayyess kiyyat daannin.
hekoddu male juppot toxt qarin nam pausinnishshu kiyy.
juppot sedep kishshoss amm Mooha dinkamu kidinkiyyamu.
17 erkamaan nayq dahenn juppot kida.
hekoddu male,
juppot toxt qarin nam pausisa diinnishshu kiyy.
18 nam meet Mooha kodd dahenn ikkim juppot erkasa diinniyyu henxufn;
nam meet Mooha kodd Yesus kristoos ikkim iyy lushiyyonne iyy se nayqanno ikkim iyy qappatta diinninu henxufn.
19 innu heka Mooha koddaaynonne husslah lamm dahenn iyy se nayqi piddamaayy henxufn.
20 meet Mooha deyaayy illo ikkimin Mooha shaakk ufunaanninnu qaap innu daattaayy henxufn.
Yesus kristoos kapann Mooha se shaakket kodd olle shokkohumin qafna,
Yesus kristoos Mooha shaakkenne kiyyat parparat kida.
21 medda!
hin Mooha kodda diiy Mooha kodatta qara illushadaa.