medda Mooha
3
1 ikkimin medda Mooha kidaminu hembaminnoss Mooha appat hoxsunt ashshann kishshu innu daattaayy tooyaa!
shaakketass innu medda Moohaat;
husslah maalla innu uffunaatta diiy,
oot iyyat Mooha uffunaatta diiy maalla kida.
2 moyshaadoot!
ammann innu medda Moohaat;
ittureesh ikkim innu maana koddinonno sanu amm heuffunashantemu.
hekoddu male,
helpaan kristoos akkaanniyyo,
pahanashayy shaakk oot innu akkinu maalla,
ikkimin iyy paahnaanninnu henxufn.
3 ikkim hin koddinaness nam kristoos qari irraxatet haayanniyyu dahenn,
qum kristoos miilampayt koddep iyyanno immiillinin.
4 juppot kidot,
halitt Mooha qar tarpa oot it koddit maalla,
nam juppot erkanniyyu dahenn halitt Mooha qar tarpin.
5 kristoos juppot orr all patisa deyaayyenne,
juppot dapaayenno heufutan.
6 nam kristoosin kallaaniyyu dahenn amm juppot erkanniyyamu.
nam juppot erkanniyyonno,
amm kristoos hexakkemu;
amm ufunaataassenno heupamu.
7 medda!
aynonno patin inn indapusinnin;
qum kristoos tsillampayt koddep nam tsilluma erkanniyyu dahenn tsillampayt kida.
8 oot taapiloos hiraym qara hirattan juppot erkanniyyu maalla,
nam juppot erkanniyyu dahenn kaf taapiloos kida.
meet Mooha maalla deyenno,
erkama taapiloos all pulpulass kida.
9 hin meet Mooha kod dalad dahenn oot kinnat moohaatenno iyy ila kiyyaannishshu maalla,
amm juppot erkanninamu;
oot iyyat meet Mooha kodd dalad maalla,
juppot erkasaanno amm fottinamu.
10 hin tsillum erkasa diinniyyanne hin kafaaddu hoxsatta diinniyy dahenn amm medda moohaatemu;
medda Moohaatenne medda taapiloos orkela reehanniyyanenne ishshaahmmanniyyan sedenn kida.
orr hoxsatta
11 hitaym inn turaqatta dakayten se "mashshimashshaynu orr hoxsaanna" kidiyyu kida.
12 qum qayel se kafitt iyy se nayq kodd insharayy ikayyep kodda amm innu fadusinnishshamu;
iyyat insharayy maana maalla ikayy?
oot erkamaayy iyyaan nayq koddenenne erkama insharayy heka tsillot kodden maalla kida.
13 kafoot!
husslah et inn qari hittinniyyo yeesha diiyyaa.
14 oot innu kafaynu hoxsaanninkinnu maalla,
toxtalleeshsh por kiyyatatep tarpaaynu henxufna.
nam hoxsunt dap toxt ila kallaannin kida.
15 nam kafayy qari hittinniyyu dahenn,
nam,
nam ikanniyyu kida;
nam,
nam ikanniyyonno kiyyat parpar ikkim dapinoss heufutan.
16 hoxsunt maana ikkim koddit innu ufunaanninkinnu,
Yesus kristoos kiyashayy innu tarpisa daattaayyenn kida;
innonno kiyashaynu oot kafaaynot tarpisa daatta innu fadusinnin.
17 namat et husslah qari shorokumu illo rakkampayt tooya illo imutsurotta diiyyo,
ashshannass hoxsunt Mooha iyy qalle kiyatta fottint?
18 medda!
hoxsunshinnu shaakketanne it erkaman akkaannishshu kodditu male,
lelanneeh shokkene ishaamaanneeh kodda diittu.
19 orr shaakket koddaaynu sedennin ufunaannina,
mutsuraannonno iyy turi haysisinninna.
20 sedenn,
et mutsuraannu nayqunshaynu innu akkinniyyane,
Moohot mutsuraannu qareell kiyy kida;
iyyanno akkan heikket upa.
21 moyshadoot!
et mutsuraannu nayqunshaynu innu akkisa diiniyyan koddo,
huura male Mooha turi ella fottinhina.
22 oot innu iyyaan acacada Mooha lushaniyyane iyyaan iyy masmasusinniyy koddin maalla,
hin innu dinkamanninkinu dahennin iyy qara akkannina.
23 acaca moohaatenno ikkimin meetayy Yesus kristoos amaaninnossenne paana kristoos innu acacin mashshmashshaynu orr hoxsaanninnoss kida.
24 nam acac Mooha lushanniyyu dahenn moohaan kallaannin;
moohaanno iyy olle kallaannin.
Moohot innu qalle kallaattaayy innu ufunaanninnu,
laaffot miilot se iyyat innu dayyen kida.