kristoos innu qara ellin
2
1 meddoot!
sed antu inni tsaafiyyu ikkim inn juppot inxerkanniness kida.
hekoddu male et namat juppot erkay kid,
Mooha appa kapa iyy innu ellinun qafna;
iyyanno se tsillampayt kodd Yesus kristoos kida.
2 iyyat jupposhaynu allxushuqin;
jupposhaynooh kodda male juppot husslah dahenn kida.
3 Mooha ufunaattaaynu innu inxufnaanninnu acacadaayy lushattaann kida.
4 nam "Mooha henxup" kidiyyu illo acacadaayy lushatta diinniyyu et kiyyaado,
eerpampayt kida;
shaakketanno amm iyy qalle hekishshamu.
5 hekoddu male,
nam lel moohaati acacamiyyu dahenn hoxsunt iyyat Mooha qapu kaysila qaran paitt;
orr moohan kallaanniyy koddaynonno ufunashamiyyu sedenn kida.
6 nam "moohaannin kallaannin" kidiyyu,
qum kristoos kallaadep kallaatta iyy fadusinnin.
acac awshitt
7 mooyshadot!
acac hin antu inn tsaafiyyu acac ololayt inn hiraym qara ufunaatten male,
amm awshittemu;
acac ololayt settenno,
lel Mooha se inn dakayten kida.
8 hekoddu male acac awshitt se kristoosenne kiyyashayn ila shaakket kodd akkaadin inni tsaafin.
poorinnat tarpishsh attumat shaakket attumannishsh.
9 nam "attumat ilan kallaannin" kidiyyu illo kafittayy qar hittinniyyu sanu poorinnat ila kiyy.
10 nam kafittayy qar hoxsaanniyyu dahenn attumat ila kal;
iyy minann amm orrat juppotalli sunkinanemu.
11 lamm hin kafittayy qar hittinniyyu poorinnat ila kal;
poorinnat ilanno mimmitaatin;
oot poorinnatanno indaayy joollit maalla,
por iyyat uqqari anniyyonno amm heupamu.
12 meddoot!
oot jupposhinn mahhaayyenn allhattu inni kidant maallan inni tsaafin.
13 appada!
se hiraym qara kiyyu oot inn ufunaatten maallan inni tsaaf.
helitt!
ota inn iyy se nayqin pushshen maallan inni tsaaf.
14 medda!
oot inn Mooha appa ufunaatten maallan inni tsaaf.
appada!
oot inn iyy se hiraym qara kiyyu ufunaatten maallan inni tsaaf.
helitt!
oot inn iyyaan qiqim kodditen,
lel Mooha mutsuraann qalle kallaanniyyonne inn se nayqin pushshen maallan inni tsaaf.
15 husslah shoke heka husslah hoxsaatta diiyyaa.
nam husslah hoxsaanniyyu amm Mooha appa hoxsaanniyyamu.
16 maana maalla,
hin husslah qalle kiyy dahenn iyyaanno,
hadat soha,
indan akkan hadattaanne,
kallatin foojot husslah kapeeshsh male,
amm Mooha appa kapamu.
17 husslahatenne hadat husslah tarpinan.
hekoddu male,
nam has Mooha kaysinniyyu hak parparatess kallaannina.
olishsh kristoos ketta illushadaa
18 medda!
helpa hin helpa muutaytaat;
olishsh kristoos deyina kidamishsho heddakayten;
toare ammann nafenno olishshada kristoos iyaan leki hesohaden.
sedenn helpa muutayta koddaaddu henxufn.
19 iyyaa otanshaynu ila sohaden.
hekoddu male turannenno iyyaa amm kafaaynomu.
iyyaa kafaaynu koddan kid,
innu olle qimaayen kallaannaayen.
hekoddu male,
iyyaa dahenn kafaaynu kodda diittaaddu ikkim ishshaahmanninoss,
innu kapa reehattan sohaden.
20 hekoddu male kristoos laaffot miilot inni dayy;
semmmaalla dahaynenn shaakket heufutan.
21 hin antu inn tsaafiyyu,
amm shaakket ufunaatta diittaayn maallaamu,
inn shaakket heufutan.
shaakket ilanno eerpa ikkim kinnaatta diinniyyan heufutan.
22 Yesuset kristoos koddaayy nam qeeddatta diinniyyu pateeshsh eerpampayt ayno?
nam hin olishsh kristoos kida.
iyyanno nam Mooha appaanne meet qeeddatta diinniyyu kida.
23 nam meet Mooha qeeddatta diinniyyu amm Mooha appa qeeddanniyyamu.
nam meet Mooha amaaniyyu illo iyy maanyet kodiyu Mooha appa ollenno shokkohum qap.
24 se inn hirayma qara dakayten mutsuraann qalli kallaadu;
inn lamm lel hin inn turaqatta dakayten et mutsuraann qalli kallaado,
meetanne Mooha appa olle shokkohum qafnaannintan.
25 irraxatet se kristoos innu dayyenno,
kiyyat parparat kida.
26 oot orr se patin inn dapusinniyotess sedin inni tsaaf.
27 oot inn laaffot miilot Yesus qara qeeddatten,
it inn ila kallaanishshu maalla,
kollisampayt pil amm inni fadusinniyyamu.
it heikett inn kollinnint;
hin it inn kollinishshonno shaakket male,
amm eerpaamu.
semaalla paana se it inn kollinnishshu qarass kristoosin kallaadaa.