miiluman kallaatta
4
1 oot kristoos sohaayyin rakkot qeeddad maalla,
innanno qum nam se mehadda adant hidadetep qimaa dikkisadaa;
nam sohooyyin rakkot qeeddad juppot erkasa all ellashiyy.
2 sekanneeshsh iyyat kallaanniyyu hadat soha hin nayq kaysisan kodda male has Mooha kaysisaann kida.
3 hin orr Mooha amaana diiyy erkanniyyan,
erkama nam deesanniyyanne hadat sohaatenne taarotanne liilt male hasayyikoddaanne ukot lekisaanne tsootsa shoomatta hin nam uuqiyin sapan se inn qalle tarpiten hekayu.
4 ammann lamm oot inn qum turatep iyyaa olle hasaynikodda diinnishshan maalla,
shammanniyyan illo inn otin.
5 hekoddu male iyy se iyyaan kiyyanne iyyaan raaw qari horat quura dikkisadess mitaattila daanninan.
6 sed minann orr raaw nafessenno lel masmasunt lelam;
semmaalla qum nam heikketep sohaaddu qarass horat quuramint;
hor laaffoshaddonn has Mooha mittas kallaanninan.
daayyada Mooha paana dikkin peashshisa
7 muutayta akkan heikk hedehaad;
semmaalla ikkim kokkaatta dinkamatta fottintaness qaap dikk qafnaadaa;
itturtooyadaa.
8 oot hoxsunt juppot lekit qar uuwashinnishshu maalla,
dikkiyyaa heikk qareell orrhoxsaadaa.
9 kumulla male keessummumi orrqeqqeeddadaa.
10 qum nam se amaanam daayy Mooha se hawhawi kikkiyyu Moohot dikkumooyyin daanniyyu peashinniyyop,
nam nam daayy Mooha se iyyi daassamenn nam shokku hesu.
11 inn ila nam lel Mooha leliyyu hin Moohot leliyyu lelu;
nam erkanniyyu irrot se Moohot iddayyin erkayyu;
sedenno ikkim Moohot akkan heikketin Yesus kristoos kapin serkisaminoss kida;
serkaanne hayyotum hak parparat iyyi koddenii;
ameen.
helpa rakkotate kokkaatta
12 kafoot!
et rakkot doohha doohishshu inn ekkasa inn qari paitto,
afa akkan turin kodda diiyy inn qari paennep kodan shammatta diiyyaa;
13 sekkapeesh helpaan kristoos serkooyyin akkaanniyyo,
ikkim masmasunshinn ikkaant koddintoss,
helpaan inn rakkoshayy qootannishane masmasaa.
14 eti mahh kristoos minin otamishshane oot laaffot serka hin laaffot Mooha koddit inn qari haysannishshu maalla,
hehartootten.
15 inn ila aynonno qum nam se nam ikayyetep,
shoke keraap,
shoke nayqisampaytap,
shoke nam ishaama nam qallep ullinhaash kaliyyop koddan rakkot qeeddatta diiyyu.
16 hekoddu male,
nam kristaana kodda minin rakkot qari paishshu et kinnaado mahh kristoos minann Mooha aypisadu male deesawa diiyyu.
17 helpaan horat man moohaate hiramintu hedehaadene;
et horat hin siip Mooha qari hiramshshu koddito kat muutayta siip se lel masmasunt heka Moohaat acacama diinniyyu maana koddina?
18 matsaafa miilot kidiyyaa,
"et tsillampayt rakkotin diniyyu koddo,
siip Mooha huura diinniyyonne juppampayyaa ashshann koddinan?
19 semmaalla orr has Mooha mitti rakkot qeeddanniyyu uumampayt se amaanamess iddaattaan erkamaan dikk erkasa iyyaa all indiinnin.