halitt peashila siip moohaati daassam
5
1 semmalla an se iyyaa olle qimaayt maapara kristaana koddenne,
rakkot kristoosessenno maanyet kodd,
settep lamm serkaan ittureesh akkaannin qalle qootanninu,
qimaayyaa maapara kristaana hin otanshayn talla kiyyin korsin.
2 siip Mooha hin inn harki haayam lushaa;
inn lushintan,
irrotin kodda male paana se Moohot fadiyun has dikkin koddu,
kodashshet olle hanhaman kodda male has se inn Mooha erkasa qaftannin koddu.
3 paahnat dikk siipi koddaa male irrotin qari feaman peashshisa diiyyaa.
4 eti sedep koditane,
helpaan shinkayt hin kaan deyo qoyqoyt serkaan tarpa diinniyat qeeddannintan.
5 settep lamm inn orraxashiyyaa,
qimaayyaa acacamaa;
dahetaynenn dippatum uuwaatap uuwattan olli hesaa;
"Moohot foojampayyaa qar hittinnin,
dippatayyaas lamm daayy daannin" hekidant tsaafante.
6 semmaalla ikkim Moohot hooraan iyyat qape errop inn qapinoss hark Mooha se dahenn fottiyyu kanneett lahaat iqqapaa.
7 Moohot innass qaapannine;
qaap inn baaqurusinniyyu dahenn iyy qari kashadaa.
8 itturtooyattan kallaadaa;
qimaa!
olishshaann taapiloos iyyaan iyyat kirdinninu fadaann qum karma daattiyyotep inn qudanne inn kannin mimmitaatin.
9 kafaann hin husslah qara kiyy rakkot sedep kishshu ikkim qeeddanniyyan ufnaadaa illo amaantetin qima shiittaa.
10 et helpa qoji rakkot qeeddattan kanna Mooha se daayy dahenn nam daaniyyu,
Yesus kristoos kapin por serkooyy heka parparatep inn hemb,
mashshayyess qar oorina inn awshuminnina,
inn qiminnina,
inn kokkinnina,
inn ellashinnina.
11 parparaashsh hak parparat irrot hekatayy kodditu!
ameen.
paanussa muutayta
12 sillaas kafittaawu se antu iamaanami dihanniyyu kapannin hitaym sed hummax inn tsaaf;
antu inn tsaafenno inn korsaassenne dikkuma Mooha hin inn inkallaannishshan shaakket koddaaddu pat inni pahisaass kida.
semmaalla dikkuma Mooha hinin qimaa ellaa.
13 maapar kiritaana se qumaaynep pahisam,
paapiloone kiyyu paanussa inn qara hit.
meetaawu marqoosenno paanussa inn qara hit.
14 hoxsunt kristaanumatin mashshimashayn orrdinkan paanussa olli dehayyaa.
inn iyyaan heka kristoos kodd dahenness andot kodditu.
ameen.