inkawwaanne appada
3
1 settep lamm inn inkawwa!
appada manayneti acacamaa;
sed minan appada karattiddu et lel moohaatin amaana diinniyyan nafenno lel Mooha dakaya male qalpet inkot manaaddu minann por moohaatep deya fottinan.
2 iyyaa deya fottinan,
kiyashayn se miiltenne serkaan inn nami qaftan tooyaan kida.
3 sommumaann siraan patalleel akkaanniyy,
mashsh soorumattaanne worqet sirattaan shoke uuwaat sira uwattan kodda diiyyenii.
4 hekoddu male sommumaann siraan pata diinniyy Mooha turi heriyatiddu lomb,
dikkumaanne etantumin siram,
mutsuraall dekam koddenii.
5 maana maalla,
helpa olote inkawwa miilampayyaan irraxateshaddu Mooha qari haayad paana sedenn siraden illo appada manaddoti acacamen.
6 iyyaa acacamenenn,
qum saarat aprihaamess,
"poldaawo!"
kidan hemban iacacantep kida;
innanno et iyaan nam nahinniyy huura male iyyaan dikk erkattane meddaadd kodditen.
7 settep lamm innanno appada!
qallqaapattan inkawwa manayn olle kallaadaa,
oot iyyaa inn qareell tashshampayyaa koddenenne daayy kiyyatatenno inn olle taayinan maalla serkiyyaa;
paana sedenn iyaan dinkamaayni kohayt koddina amm kiyyaaninnanemu.
iyaan dikk erkasa minann miidama
8 sedeeshsh dahetaynin ollisenan kallaadaa;
rakkot nam pil hekataynep tooyaa,
hoxsunt kafumatin orr hoxsaadaa;
orr diddikkanne dippatayyaa koddaa.
9 nayqunt nayquntin mitaattisa diiyyaa,
otittanno otittan mitaattisa diiyyaa;
sekapeeshsh qoraa;
inn hembanten,
sed erkasan qoran tayaass kida.
10 matsaafa miilot,
"nam kiyyat hoxsaanniyyu,
lashsh diddikkatenno akka fadiyyu,
arrapayy nayqunt ishaama qara,
kapayyenno eerpa ishaama qara all dawru.
11 iyaan nayq ketta all sekaadu;
iyaan dikk erkayyu;
andotanno fadadu,
kanni aanu;
12 inda pold por tsillampayyaatep tooyine;
lappooyyanno dinkamaaddu dakayaass heqahisamen;
nayqisampayya qarass lamm
poldat miint jiiaytaat akkinnin."
hekidin.
13 et iyaan dikk erkasa kokkaannishshane,
aynu inn miidina?
14 iyaan dikk erkasan et miidamishan nafenno,
qoran akkannintan;
sissikila orr tura nahan baaqqura diiyyaa.
15 kristoos pold mutsuraann qalli serkiyyaa;
pold kiyyatayineti kodadaa;
oot irraxatet se inn qaftaneti nam inn kaassanniyyu dahenness mitaattila daattaass helpa min iyyaan dikkisad koddaa.
16 mitaattilaannanno etantumanne serkan koddenii,
orr se kallat se dikk inn kristoosin kinnaattan qaftan qari iyaan nayq ishaamiyy ikkim lilimaanniness qaap dikk qafnaadaa.
17 et has Mooha sedep koddo,
iyaan nayq erkasan miidama kapeeshsh iyaan dikk erkasan miidama hedikka.
18 kristoos mashshayyess Mooha kapop innu dehasaass,
tsillampayt kodditete innu iyyaan tsillampayyaa kodda diiyyess jupposhaynu minann shokkoohin itturi rakkot qeeddad toy;
iyyat sohan hetoy;
laaffotan lamm iyy kiyyat qapu kodd.
19 laaffot sedenn nafsawwaani hidaalle kiyyass aan lel masmasunt lel.
20 nafsawwaanettenno,
orr se turann sapan noohe markapoot dikkisamiyyo Moohot duupattaayyin lushiyyo acacama diiyy kida.
iyyaan markapa se qallep kal illo haq se kela passad,
iyyaan qoji;
iyyaanno nam lakkusheteeh.
21 haq settenno paahnat ahalilaan ammann inn dininniyat kida;
ahalila hinenno ussaat dakinti miilisa kodda male dinkam qaap miil akkatta Mooha kapop dehaanniyyu kida;
iyyat inn dininninu,
tooita ila sohatta kristoosenn kida.
22 kristoos moontallep aan illo Mooha appa kapa miskitt qara kiyy;
hitaymiyyaanne hayyot,
irrampayyaanno iyyass piddamen.