daka kiyyat qaponne siip miil
2
1 semmaalla nayqunt dahenn,
nam paasaanno dahenn,
ippeepaanno,
maxashanumanno,
kexemaanno dahenn allpatiyyaa.
2 qum meddaan ammann dalad aanna hadanniyyanep innanno dinaaynin kaanaass kollila laaffot hin miil hadadaa;
3 poldat idikk koddaayy hellokattene.
4 semmaalla pold se daka kiyyatin kiyyu kodd,
kapop dehaadaa;
daka hin iyy orrat alltuffaden,
Mooha kapa lamm ipahisamenne serka qapu kida.
5 inn lamm Yesus kristoos kapann daayy laaffot iyy Mooha masmasusinniyyu dehasa fottaass suukamma Mooha (qeesawwa) iyyaan miil koddaass,
qum dakallaann kiyyatin kiyyatep man laaffot miilot kodda soorumamaa.
6 maana maalla,
matsaafa miilot qarass,
lel,
"toare!
daka pahisamenne serkisam,
daka sheeht koddinun tsiyoon haayina,
nam iyy amaaniyyu amm deesawnamu,"
kidiyyu tsaafam.
7 semmaalla inn iyyaan amaaniyyass daka hin iserkisam;
orr se amaana diinniyyoss lamm,
"daka se man dihampayyaa alltuffaden
kaysila man kodd."
8 lamm,
"toare,
daka siip kohaytinninonne,
shilk siip sunkinninu."
hekidin.
iyyaa kohaytisaminanenno,
lel sett acacama diittaan kida;
sedenno ikkim hin iyyaa qari painninaness Moohot ulli haay.
9 hekodu male inn erkamaan kaan heka Mooha se poorinnat ilaashsh por attumashayy se nam shamusinnishshotep inn hemb ikkim eeshshintaness dalashot pahisant,
suukamma (qeesewwa) Daam,
siip miil,
kaf Moohot reehad kida.
10 tureeshsh inn amm siip moohaatemu;
ammann lamm siipaayy kodditen.
tureeshsh Moohot amm innass hemutsuroodemu,
ammann lamm innass mutsurood.
aylamma Moohaat
11 kafoot,
oot inn are husslah qara kessummaanne patayyaa kodditen maalla,
hadat soha hin nafset adiyy ketta ikkim sekannintanessin inn dinkamannin.
12 saapaass et "nayqisampayyaa" kidiyyan inn keeyiyyan koddu nafenno,
helpaan Moohot inn shooyyatta deyiyyo orr Mooha amaana diiy ikkim erkamaann hin dikk akkinan illo Mooha aypisanninaness helpaan inn otanshaddu ila kallaannishshane kallat dikk kallaadaa.
13 oot pold maalla kidaa hayyot husslahati dahenn acacamaa;
daamassenno koddo oot iyyat iyyaa dahenn qareell hayyotum qapu maalla iacacamaa.
14 peashisampayyaa hussatessenno koddo acacamaa;
iyyaa nayqisampayyaa horsisaassenne orr iyyaan dikk erkanniyy aypisattaass Daam kapa hitamen.
15 has Mooha,
ikkim inn iyaan dikk erkasan kap orr se ufnat dap duhintaness kida.
16 qum erkamampayyaa moohaatep shayn kallaadaa male shayn kallaattaayn nayqunt qarin deka koda diiyyaa.
17 nam dahenn serkiyyaa,
kafaaynu kristaana hoxsaadaa,
Mooha huuraa,
Daam serkiyyaa.
paahnat rakkot kristooset
18 inn aylamma,
poldallaann serkiyyaa illo iacacamaa;
inn acacamintan,
hin diddikkasseeh kodda male hin nannayqassenno kida.
19 maana maalla,
eti namat nayquntayy male rakkot qeeddanniyyu illo oot Mooha maalla rakkot se ila duupanniyyo aypila akkannin.
20 et nayqunt koditan illo horat qeeddatta duupannishshane,
aypila maanat qaftan?
hekoddu male et iyaan dikk erkattan illo rakkot qeeddatta duupannishshane,
Mooha kapa aypila akkannintan.
21 inn hembanten sedess kida;
ikkim paanaayyin annintaness kristoos inn maalla rakkot qeeddattan paahnat inni kodd.
22 amm iyyat juppot hexerkayyemu;
amm eerpaanno kapayy qalle hesohadenemu.
23 helpaan iyyaa iyy otiyyane amm iyyaa heooriyyemu;
helpaan iyyat rakkot qeeddanniyyo Mooha se tsilluman horat quuriyyoss mashshayy tarpiyy dayy male amm kap iyyaa hetarpiyyemu.
24 ikkimin juppot ketta reehanninnu tsilluman kallaanninnoss,
iyyat mashshayy sohooyyin jupposhaynu masqalet qari haiyy;
innanno peesashayyenn hedinatten.
25 inn qum helemmaan qishshawetep purjaajiten,
ammann lamm por shinkaytanne lushampayt nafseshaynetep mitaatten.