hitaym betsiroos shokkiyya
1
1 betsiroos nam hitaym heka Yesus kristoos kapa,
inn iyyaan patayya kodd bantsoosenne,
kalaatiyaanne,
qaptoqiyaanne,
issiyaanne,
pitaaniyaall pulpulam kallaanniyass hitaym hitam;
2 inn iyyaan qum Mooha,
appat turaqatta qaapad qari pahisam Yesus kristoos acacamassenne diikaayyin jiqamaass laaffot miilotin miilteness dikkuma Moohaatenne andot inni lekenii.
irraxatet kiyyat qaftu
3 Mooha,
appa poldaaynu heka Yesus kristoos se toxt ila sohatta Yesus kristoos minann irraxatet kiyyat qaftu innu day,
se lekussa mutsuroottaayyetin dalatta awshittann meddooyy innu kod heaypisamu.
4 iyyat taymaan pata diinniyy,
ussaatootta diinniyyanne kerda diinniyy moontall innu dikkiyy.
5 lamm innanno dina se lashsh muutaytaate akkaanninoss amaantetanne irrot moohaaten lushanten.
6 et helpa qoji ekkawsama hawhawi kiyyu inn rakkusinniyyu nafenno sedin masmasaa.
7 ekkawsama hin maalla inn qari deyiyyu,
amaanteshinn shaakket koddaadd ishshaakaass kida.
worqet allpatishshu nafenno appittann ekawsamin.
semmaalla amaanteshinn se worqet qareell serka qaaftu ekkawusama it faddusinnin.
amaanteshayn se ekkawusantenno helpaan Yesus kristoos deyiyyo aypilaanne serkaanne woses inni akkusinnint.
8 inn Yesus kristoos akka male hoxsaannin,
ammann nafenno akka male amaanin;
masmasunt kaant lelama fottama diinnishshu,
serka kaan qaftonnenno masmasin.
9 dina nafseshayn se inn amaantetin lushannishshanenno qeeddannikkishshan.
10 oot daayy se inn daassaminotess himampayyaan him lel nafenno,
iqimess dina sed kannifuqen.
11 laaffot kristoos se iyyaa ila kishshonno,
oot rakkot kristoosetenne oot serkaan rakkot kanna deyinat turi qatta lelt;
iyyaanno lamm hin paana ashshann kiyyonne helpa hekanne ikkim koddinaness kann fuqen.
12 himampayyaan erkayyen,
iissess kodda male inn erkasaaddu iyyaass heakkaatt.
iyyaa inni erkayyen,
lel masmasunt se orrat ammann irrot laaffot miilot se moontalleett hitantenn inn lelen patpahisaann kida.
sed lamm hitaymiyya Mooha nafenno akkaass hadannin.
miiluman kallaatta
13 semmaalla qaapayn pahisadaa illo erkama dikkisadaa;
minixaash kallaadaa;
dikkuma Mooha hin helpaan Yesus kristoos deyiyyo inn akkannintan irraxatet kodadaa.
14 meddaan acacamiyy koddaa.
hadat se nayq inn sed tureeshsh ufunaatta male inkallaattenep kishshu kanni anta diiyyaa.
15 hekoddu male qum Mooha hin inn hemb imiil koddep innanno kallaashayn dahennenn iyyaan miil koddaa;
16 "oot antu iyy miil kodd maalla,
innanno miilampayya koddaa."
hekidant tsaafante.
17 Mooha se miint tooyan qariqatta erkasa diinniyyu,
nam qari qum erkamooyy mitt horat quuriyyoss et "appaaynu" kidishan hembishan koddo,
helpaan inn are husslah qara keessummum kallaannishshane Mooha huuran kallaadaa.
18 kallaashayn se aypot koddit inn appadaann qara tayten kela inn poojanten,
pirret shoke worqet se allipatishshun kodda diittaadd heufutan.
19 inn piddanten,
diik kristoos se serkisam qum diik laah se haasuttanne ooshshum dapetep kiyyonn kida.
20 iyyat husslah uumama turann pahisam,
ammann sapan muutaytaate inn maalla akkaad.
21 innanno Mooha se toxt ila iyy sohashshiyyenne se serka iddayy Yesus kapin amaanikkishshan.
semmaalla amaanteshaynenne irraxateshinn Mooha kida.
22 sedeeshsh shaakket acacaman oot inn nafseshayn miilisatten maalla,
kafaayni hoxsunt dikk qafnaadaa;
mutsuroonn qalleell dikkiyyaa orrhoxsaadaa.
23 inn lakkiyya dalatten,
hotta pata diinniyyu,
lel Mooha se kiyyat qaponne hak parparat ulla kallaanniyyu ila male,
amm hotta se patiyyu ilamu.
24 maana maalla,
qum matsaafa miilot leliyyop,
"hin soha uuwad dahenn qum oyhat,
serkoyyanno qum pulalat;
oyhat ruuqiyy,
pulalanno yeiyy;
25 lel pold lamm hak parparatess ulla kallaannin."
lel masmasunt se inn lelamenno hin iyy.