hitaym bawloos
filimoonass
paanussa
1
1 an bawloos se Yesus kristoos maalla hidamenne kafittaaynu tsimotoos kapa,
filimoon se hoxsasham innu olle erkanniyyossenne
2 kafitteshaynu afipiyaassenne,
arkibaas se innu olle wottaattar Yesus koddessenne,
kristaana se manaayt orqud qapamiyossenno,
3 Mooha appaaynonne poldaaynu Yesus kristoos kapa has dikkanne andot inni koddenii.
aypila bawloos filimoonass
4 antu Mooha dinkamanniyyo hed qaapatannin helpa min moohaawu aypisannin.
5 amaantet se att Yesus poldi qaftonne hoxsunt att miilampayya dahenni qaftu hendakay.
6 ikkim amaanteshayt orr pili qoota kokkaannintu qimintossin Mooha dinkamin.
maana maalla,
heka kristoos koddaaynonn hin dikk innu qafnu dahenn ikkim patpahinan ufunashaminaness kida.
7 kafitoot!
hoxsunshitt masmasunt lekitenne qimussa ani daatt.
maana maalla,
erkamaattann mutsura kristaana haysaden.
kaassiyy bawloos oot onesimoosi dehayy
8 semmaalla iyaan att erkannintu hed acacaas kristoosenn amm huura henqapamu makess,
9 hekoddu male sedep koda kapeeshsh antu bawloos qimaayt hin kristoos maalla hidam hoxsuntannin hed dinkamin.
10 antu hed dinkamiyyu oot meetaawu oot onesimoos se antu man hidanate kiyyo amaantetin haayetess kida.
11 onesimoos setureeshsh akkan iyyat hedi erkayy amm hekiyyanemu.
amman lamm hedessenno anassenno erkannina.
12 toare iyyin mitaattinnina hedi hitina;
iyyat nam antu ikkaani hoxsaanniyyu.
13 lel masmasunt minann antu hidamiyyo,
et iyyat an kapi hat poraayt ili ani hes kid anas dikkaannaay.
14 hekoddu male hin dikk erkasot irrootin koda male ikkim hasaaytin koddnu maalla,
hed qara kaassatta male akkan shokkooh naf erkasa amm henfademu.
15 iyyat maalla helpa qoji hed keetta rehad,
ittureesh hed olle kallaattaass koddinta.
16 iyyat sed kanneeshsh hed olle kallaanninu ayletap kodda male kafitt hoxsasham aylet qara tawop kida.
iyyat anass kafitt hoxsasham;
hekoddu male oot iyyat hedi hesinonne kristoosin kafittaayt kodd maalla,
hedess sed qareell ihoxsasham.
17 lamm et qum kafittaytetep an qeeddatto iyyanno settep qeeddadu.
18 akkan iyyat hed qarin kal shokkooh naf et kiyyaado,
shoke et kuurat qara kiyyaado,
an qari dihii.
19 antu bawloos sed harkaawonnin hedi tsaaf:
hin iyy qara kiyyanno hedessin oorinnina.
oot att mashshaytess kiyyat awshitet akkatt maalla kuurampaytaawu koddaayt am hed mashin oorinninhinamu.
20 sedeeshsh kafittoot,
ikkim akkan dikk ani erkannintossin poldin hed dinkamin;
tonhedess kristoosin mutsuraawu masmasusiyyii.
21 ikkim acacamintu amaanaannin hin antu hed kaassanniyyu qareell tawnisan ikkim erkannintu ufunaattan hedi tsaaf.
22 lamm sed olle ikkim dinkamaann dakaysamaanninu antu inn kapop deynos irrayinkiyy.
semmaalla,
por antu ulli haysaninnu ani dikkiyyii.
paanussa muutayta